Marc 5 - La Sainte Bible en Langue Yipunu

Jesus amapalisa yinyunyi yibi ombu dibaala

¹ Kabogu bamasabuga yiliba yiGalilee o yiari yibisi Gerasenie.

² Yika Jesus esunduyi mu bota dibaala omapalila o mambina amaruga ombu gandi.

³ Jandi amaba na yinyunyi yibi na amatsananga o mambina. Asamagarungu utungu nesi na bapanga.

⁴ Temu tsipuela bamamutunga na bapanga tumba amabatabulanga nopansanga bivangu; mutu asamaba na mangolu umuviolila.

⁵ Nyangu na mukolu amalinganga o mambina nesi o mikongu; amayenagamuganga na amakenemisanga na mamanyi.

⁶ Anolabilila Jesus amawenda mbangu uyegudama va gusu andi.

⁷ Amagamuga rie: Jesus Muana Nsambi aguvu uneni, diambu yi divu va gari jetu nagu? Kokolu tsiagu guyatulasa maguga!

⁸ (Amavosa nana mu mbari Jesus amaruma yinyupyi yibi upala.)

⁹ Mbana Jesus amamuwivula rie: Diina diagu yi? Jandi amawagula rie: Diina diami divu Dibuli, tuji bapuela!

¹⁰ Jandi amalenda Jesus na yindandi rie: Kokolu, guyasindiga binyunyi biami o yairi yisusu.

¹¹ Vamaba mugamba uneni ubangulu abamalinganga va mukongu eni.

¹² Binyunyi bibi bimavosa na Jesus rie: Tusingisi utsana ombu bangulu.

¹³ Jesus amabasingisa dionyi. Binyunyi bibi bimapalila dibaala na bimakota ombu bangulu. Vana vana bangulu botsu, diwendi rie: bebeli na tosini beji, bamavindama mukongu na botsu bamafu mu yiliba.

¹⁴ Bakelisi babangulu bamarina na bamanyavisa musamu o misiengi nesi o masaku. Batu bamawenda uyelaba nana dimabila.

¹⁵ Banotola ombu Jesus bamalaba dibaala adimapalusu binyunyi bibi, diwendi rie: Dibuli. Amaba atsana, amaduara na amaba asigama. Bamagaangu na goma.

¹⁶ Abamadilaba bamatsingula basusu adimalabana ombu dibaala adimaba na binyunyi bibi nombu bangulu.

¹⁷ Kabogu bamawivula Jesus ugusuga o yiari yiogu.

¹⁸ Ava Jesus amanangimina o bota jandi omaleba na binyunyi bibi amamutsingula rie: Nyirondi uwenda nagu.

¹⁹ Jesus asamagaru tumba amamutsingula rie: Gabuga o ndagu agu nombu batu bagu nobatsingula motsu ama Fumu amaguvayila na nana amagulasila yingeba.

²⁰ Ava dibaala dieni amayenagabuyilanga amabanganga na bitsiku o yiari yiDigumi Dimisiengi; botsu abamamugulungu bamakambulu.

Muana mugetu uJairus na mugetu agumabemba yiduaru yiJesus

²¹ Jesus amagabuga o disimu dina diyiliba. Avana amarasuna bapuela bemuvivi.

²² Va gari ogu vamaba dibaala diina diandi Jairus, omaba yivunda yiNdagu Yibenguna. Anolaba Jesus amagudama va gusu andi

²³ na amamulenda na yindandi rie: Muana ami umugetu ugeyi yika ufu efu. Kokolu yimusakayila miogu yiri oba na polu.

²⁴ Yika besoyimi batu bapuela bamamuduka te na bamamubandasana.

²⁵ Va gari ogu vamaba mugetu agumaba na muvuva umalungu yigumi na bilima bibeji.

²⁶ Jandi amanyambasana mbongu tsiandi ufuta banganga tumba asamalaba yilimba.

²⁷ Amagulu nana bevosili Jesus, kabogu amamuduka na amavioga o nsima andi va gari yinombu uyebemba yiduaru yiandi.

²⁸ Amatasa rie: Pa nyubemba ne biduaru biandi nyubeluga.

²⁹ Vana vana muvuva umakamuga na amagulu dunyuru yika sui.

³⁰ Vana temu eni Jesus amagulu yiri mangolu mamapala kabogu amageluga nowivula rie: Anyi amabemba biduaru biami?

³¹ Badukitsi bandi bamamuwagula rie: Bapuela bapuela begubandisini ne nana guiwivuli, anyi amambemba?

³² Tumba Jesus amagengila yiari na yiari ujaba agumamubemba.

³³ Mugetu anojaba adimamuvagulu amakueka noregama; amagudama va gusu andi na amatubula motsu.

³⁴ Jesus amamutsingula rie: Muana ami, yitu yiagu yimagubelusa. Wenda na buranga, gumabeluga.

³⁵ Yiotsu ayi Jesus evosi nana bilumbi bimaruga o ndagu Jairus na bamamutsingula rie: Muana agu amafu. Dibandu yi guimuetsoyisila Mulonsi?

³⁶ Tumba Jesus asamadikipa na amavosa nandi rie: Sunsa murima! Payili yitu!

³⁷ Jesus asamasingisa basusu uwenda nandi yika Pierre na Jacques na muana nguji andi Jean.

³⁸ Banotola o ndagu Jairus, Jesus amarasuna puela batu ulila belili na ugamuga begamuyi.

³⁹ Amakota nobawivula rie: Mu mbari yi duivayili nduku? Dibandu yi duilili? Muana asafu tumba amalengula mua yilu.

⁴⁰ Anolaba yiri bemupeji amapalisa botsu basusu na amakotisa yika taji na nguji muana na jogu abamaruga nandi.

⁴¹ Jesus amagaanga gogu muana na amavosa nandi rie: Talitha koum, divindugulu rie: Menu nyirumi rie: Muana umugetu ugeyi, relama!

⁴² Vana vana muana umugetu amarambuga na amatsana. (Jandi amaba na digumi na bilima bibeji.) Banodilaba, botsu bamakambulu puela.

⁴³ Jesus amabalubusa rie: Duyaditsingula mutu! Mbana amabuesa rie: Muveyianu biguji.