Marc 3 - La Sainte Bible en Langue Yipunu

Dibaala na gogu ugasa

¹ Jesus amamuekota o Ndagu Yibenguna. Amuna mumaba dibaala adimaba na gogu ugasa.

² Batu bamosi bamaromba diela ufuengilila Jesus. Kabogu bamamuketanga ulaba yeri obelusa mutu mu yilumbu yitsona.

³ Jesus amavosa na dibaala adimaba na gogu ugasa rie: Relama, lerugati!

⁴ Mbana Jesus amawivula rie: Diambu yi divu diwelimina mu migaga mietu? Uvaga maboti mu yilumbu yitsona vo uvaga mabi? Ugobula mutu vo umuboka? Tumba bamavola sui.

⁵ Jesus amabagengila yisuisu, diuleba murima andi umapinda amagaangu na yingeba mu diambu diugala umirima miogu. Amavosa na dibaala rie: Simbula gogu agu. Amagusimbula; gogu andi umabeluga.

⁶ BaJuif abamaba baPharisie bamapala o Ndagu Yibenguna na vana vana bamatunga fundu na bambatsi baHerode nana bobokila Jesus.

Yinombu uruga yiruyi ombu Jesus

⁷ Jesus amagusuga nowenda o yiari yimubu na badukitsi bandi. Yinombu yimamuduka o Galilee no Judee

⁸ no Jerusalem no Idumee no yiari yiJourdain no migula miTyre na Sidon. Batu bapuela bamaruga ombu Jesus mu mbari bamagulungu motsu ama amavaganga.

⁹ Kabogu amavosa na badukitsi bandi rie: Tombilianu bota jigeyi yiri bagombandasana.

¹⁰ Anobelusanga batu bapuela botsu abamaba na maali bamasindasana umubemba.

¹¹ Yiotsu ayi batu abamaba na binyunyi bibi bamamulabilanga bamagudama va gusu andi nogamuga rie: Ndeʼ la Muana Nsambi.

¹² Tumba amabagandisa rie: Duyanjabisa ombu batu.

Jesus usola esoli digumi na bilumbi bibeji

¹³ Mbana Jesus amamata o julu mukongu; amanengila aba amaronda, bamamuduka.

¹⁴ Va gari ogu amasola digumi na babeji aba amanengila bilumbi. Amabasola ulinganga nandi na amabasindiga ulonsanga.

¹⁵ Amabavega mangolu upalisa binyunyi bibi.

¹⁶ Miina madigumi na babeji aba amasola amama: Simon (Jesus amamuvega diina diPierre,)

¹⁷ Jacques na Jean, baana baZebedee (Jesus amabavega diina diBoanerges, divindugulu rie: baana babukanyi;)

¹⁸ na Andre na Philippe na Barthelemy na Matthieu na Thomas na Jacques muana Alphee; na Thaddee na Simon muisi Canaan

¹⁹ na Judas Iscariote jandi omafunda Jesus.

Biburu biJesus

²⁰ Mbana Jesus amagabuga o ndagu. Batu bapuela bamagukama vana te na Jesus na badukitsi bandi basamamuedila diweru uji.

²¹ Biburu biJesus banodigulu bamawenda uyemulanda mu mbari bamagulu yiri batu bevosi rie: Amalaguga.

Jesus uwagula ewaguli abemufuengilili

²² Milonsi mimigaga abamasunduyila o Jerusalem bamavosa rie: Jandi amafubana murima na Beelzebul, diwendi rie: Diabu! Basusu bamasinga rie: Yivunda yibinyunyi bibi emuveyi mangolu upalisa binyunyi bieni.

²³ Kabogu Jesus amabanengila; amababuayila nongu nobawivula rie: Tsie Satan orungulila ukebinga?

²⁴ Dilongu diotsu adi batu betoyingi joʼ beni na joʼ beni digotsiemuga?

²⁵ Mukuta uotsu aguvu na burandu ugotsiemuga?

²⁶ Kabogu pa Satan eketoyisa na durumu duandi duvu na dupasu, dugotsiemuga?

²⁷ Mutu agorungula upatula dibaala adivu na mangolu biandi te na olemutunga mbana oyenakindanga biandi biotsu.

²⁸ Guluanu adi nyidutsinguli rie: Batu abevayi masumu maminongu na minongu botandu monyi, nesi abevosili Nsambi mambu makulini

²⁹ tumba abevosili Yinyunyi ayiruyili ombu Nsambi kulini bagotandu, via!

³⁰ Jesus amavosa nana mu mbari bamavosanga rie: Jandi amafubana murima na yinyunyi yibi.

Nguji na baana banguji baJesus

³¹ Nguji na baana banguji baJesus bamaruga. Bamasikama va gusu kana na bamasindiga yilumbi uyenengila Jesus.

³² Batu bapuela abamaba nandi vana bamamutsingula rie: Nguji na baana banguji bagu baji va gusu kana, begurombi.

³³ Jesus amabawivula rie: Anyi avu nguji ami na banyi bavu baana banguji bami?

³⁴ Mbana amabagengila yisuisu novosa rie: Ababa la nguji ami na baana banguji bami.

³⁵ Uotsu oyivayingi adi Nsambi erondi aji muana nguji ami vo nguji ami.