Marc 16 - La Sainte Bible en Langue Yipunu

Durambugu duJesus

¹ Yilumbu yisamedi yinosuka Marie Magdala na Salome na Marie nguji Jacques bamasumba miyombu uyegotsa mfumbi Jesus.

² Ava matebugulu mayilumbu yitsona bamawenda o ngila.

³ Ava bakivu mu nsila bamawivusana rie: Anyi otugusulila dimanyi adidibiyi ngila?

⁴ Dimaba dimanyi dineni. Banobuaga misu bamalaba yiri dimanyi dimakegusululu.

⁵ Bamakota o ngila agu bamalaba mufudu atsana o yiari yimabaala, aduara yilinga yivema; bamalaba goma jineni.

⁶ Amabatsingula rie: Duyalaba goma. Duirombi Jesus muisi Nazareth ajimagomunu va kurusu. Tumba agatsi; amarambuga o dufu! Tsia vava amatsigulu?

⁷ Wendanu ombu badukitsi nombu Pierre uyebatsingula yilumbi yieyiyi rie: Jesus amadurela o Galilee aguna dumulabila nana amaledutsingulila.

⁸ Banogaangu na keri na goma bamapala o ngila na bamarina mambangu. Mu diambu digoma ogu basamamueyivosa. [

Jesus ulabana elabini ombu Marie Magdala

⁹ Jesus anorambuga o dufu, muna kedi yilumbu yitsona amalelabana ombu Marie Magdala agumapalusu yisambuali yibinyunyi bibi.

¹⁰ Amatolisa musamu ombu bambatsi baJesus abamanyonganga nolilanga.

¹¹ Ava bamagululu jandi evosi rie: Jesus aji monyu na nyimamulaba basamamuvayila yitu.

Jesus ulabana elabini ombu badukitsi babeji

¹² Mbana Jesus amamuelabana nderi munongu ususu ombu batu babeji abamawenda o mupaka.

¹³ Bamagabuga uditolisa ombu basusu tumba basamabavayila yitu wandi.

Jesus uiabana elabini ombu digumi na mudukitsi umosi

¹⁴ Mbana Jesus amalabana ombu digumi na mudukitsi umosi ava bamabila va tavula. Amabasiemba rie: Aa bango paga, dibandu yi dusamavayila abamandaba yitu?

¹⁵ Mbana amabatsingula rie: Wendanu o bulongu buotsu na samunanu Musamu Uboti ombu batu botsu.

¹⁶ Uotsu aguvayila yitu nobatusu ogobulu tumba uotsu agugovayila yitu ovegu mbela dufu.

¹⁷ Bango yitu bovaga bimaga biebibi: bopalisa binyunyi bibi na mangolu madiina diami; bovosanga na mambembu magona;

¹⁸ pa bogaanga banyoga vo uji biguji nonu abimalombu bigobavaga diambu; bosakiga bibedu miogu na biubeluga.

Jesus ematusu o julu

¹⁹ Fumu Jesus anomana ubalonsa nana amamatusu o julu, amatsana va mabaala maNsambi.

²⁰ Badukitsi bamawenda uyenalonsanga Musamu Uboti yiari na yiari. Fumu amabanganga nogu na amabalasa yiri malongi mogu mamaba mangensa mu mbari amabavega mangolu uvaga bimaga.]