Marc 13 - La Sainte Bible en Langue Yipunu

Jesus ubiga ebiyi nana Ndagu Nsambi jiupansiyila

¹ Ava Jesus na badukitsi bandi bamapalila o yibenguna, mudukitsi umosi anogengila Ndagu Nsambi amasimina rie: Mulonsi, gengilati! Ka muna mamanyi ma! Ka muna tungitsi ji!

² Jesus amawaka rie: Nyiina, guilabi Ndagu, tumba jaba o gusu vagosiala ne dimanyi adigopansu; Ndagu jiotsu jiurakuga.

Maguga amolabana va disukusulu dibulongu

³ Jesus amatsana va julu mukongu umiOlive va nsungisini na Ndagu Nsambi. Pierre na Jean na Andre bamamurasuna guna, banolabilila Ndagu Nsambi bamamuwivula rie:

⁴ Tutsinguli temu yi mambu meni mobila? Yilimba yi yiulasa yiri mambu meni molabana?

⁵ Mbana Jesus amabalubusa rie: Kebananu yiri mutu agodudunsa.

⁶ Bapuela boruga na diina diami novosa rie: Nyiji Christ! Bodunsa batu bapuela.

⁷ Duyalaba keri ava dugululu makumbula madivita amavu yiari na yiari; vengu mambu meni moleba. Tumba disukusulu dibulongu digoba mu temu eni.

⁸ Bisi dilongu dimosi botoga na bisi dilongu disusu na bakaga botoga na bakaga basusu; voba masisana mabutamba mu biari biotsu na voba dungosu dunsala. Dionyi diuba yika dibandu dimaguga.

⁹ Tumba jenu lubuganu; bodufimdisa na bodudimba o Mandagu maBibenguna; bodubega va gusu bakaga na va gusu bivunda bimalongu mu diambu diami; mu temu eni dubasamunina Musamu Uboti.

¹⁰ Musamu Uboti ulesamunu ombu batu botsu.

¹¹ Ava bodufundisila duyaletasa adi duwagula, muna diweru dieni vosanu adi dudila. Mambu meni magoba amenu, moruyila ombu Yinyunyi yiNsambi.

¹² Muana nguji owakisa nesi muana nguji andi ombu bango dikasi yiri oboku na taji ovaga munongu mosi na muana andi; baana bovina bataji na banguji bogu na bobawakisa ombu bango dikasi yiri boboku.

¹³ Botsu boduvina mu diambu didiina diami. Tumba oyiwari ogobulu.

Dubungu adulabana

¹⁴ Dulaba dubungu va mbura ajigaa jiwelimina. (Jandi oyirangi atsiyisi!) Jogu aboba o Judee barini o mikongu.

¹⁵ Jandi oguba va julu muansa ayaviosa temu umuekota o ndagu andi ubonga abiandi.

¹⁶ Jandi oguba o musiru ayagabuga uyebonga yijungi yiai di.

¹⁷ Ka muna maguga ma bagetu aboba na mimi na abonuisanga mabenyi bolaba mu bilumbu bieni!

¹⁸ Sambilanu yiri mambu meni magodurasuna ava yitsubi!

¹⁹ Mu temu eni maguga moba maneni. Ubongila va diweru adi Nsambi amasundila biotsu te na namunyi maguga mamunongu eni mbe masakalabana; o gusu vagoba masusu mamunongu eni, via!

²⁰ Mbe Fumu asamatabula diambu ugufisa bilumbu bieni mbe mutu ne umosi agogobulu; tumba amabigufisa mu diambu dijogu aba amasola.

²¹ Pa mutu odutsingula rie: Christ aji vava vo aji vana, duyamuvayila yitu.

²² Mu mbari voba bachrist bamfurulu na babiyitsi bamfurulu; bovaga bilimba na bimaga uweliga udunsa aba Nsambi amasola.

²³ Kabogu lubuganu, nyimadutubulila motsu.

Durugu duMuana Mutu

²⁴ Yiotsu ayi maguga meni movioga, wisi upindusu, tsungi jigomuebatsa muetsa,

²⁵ bambuelili bobonduga na julu jiotsu jiukungusu.

²⁶ Mbana Muana Mutu oruga va gari mamungi; bomulaba na mangolu maneni na bundumba.

²⁷ Mbana osindiga biansa o biari biotsu bibina bibutamba ugukiga aba Nsambi amasola te no masuka mabulongu.

Divindugulu dinongu jimumanga

²⁸ Rangiminanu yibagunu yimumanga; pa bitayi biwansi duijabi yiri mfula yika utuba.

²⁹ Munongu mosi ava duilabili mambu meni, jabanu yiri durugu duMuana Mutu duka bebeli.

³⁰ Ngensa nyidutsinguli rie: Dukula duedudu dugolefu te na mambu meni molabana.

³¹ Julu na butamba biutsiemuga tumba mambu mami magotsiemuga, via!

Yika Nsambi ejabi diweru

³² Mutu agojaba yilumbu yieni vo diweru; ne biansa ne Muana yika Taji buandi edijabi.

³³ Lubuganu, duyawenda bilu mu mbari dugejabi diweru dieni.

³⁴ Diuba nana dibaala adimalinga; amasila ndagu andi na basalitsi bandi na amavega mutu mutu yisalu yiandi. Amaruma mukelisi umunu ndagu rie: Guyawenda yilu.

³⁵ Kabogu jenu wenu moganu mu mbari dugejabi temu aji fumu ndagu oruyila, tanguji va tsisiga vo va gari wisi vo va mavuvungi vo kedi.

³⁶ Pa odusutusu ayadurasuna bilu.

³⁷ Adi nyidutsinguli, nyiditsinguli ombu botsu rie: Moganu, duyawenda bilu.