Malachie 1 - La Sainte Bible en Langue Yipunu

¹ Guluanu bulumbi abu Fumu amavega Malachie utsingula baIsrael.

BaIsrael aba Fumu amasola

² Fumu amavosa rie: Nyimaduronda. Jenu duikwivuli rie: Durondu dumunongu yi gumaturondila? Fumu amawaka rie: Esau tsia muana nguji Jacob? Ne nana nyimaronda Jacob,

³ tumba nyimabusa Esau. Nyimamupatula mikongu miandi, agu bisi Edom bamatsanina. Nyimawakisa bulongu buogu ombu makoju.

⁴ Pa bisi Edom bovosa rie: Jetu tumabungu tumba tumuereliga bivongu abimapansu! Fumu Mabadi owagula rie: Barungingi, nyumuebapansa na bonengulungu rie: Dilongu dibi! Batu aba Fumu amanyoyila mutubu!

⁵ Jenu baIsrael dulaba na misu menu na duvosa rie: Fumu aji tindi muneni, mangolu mandi meviolili te na mandilu maIsrael!

Muyitsa agugaa uwelimina na Fumu

⁶ Menu Fumu Mabadi nyitsinguli bavagulitsi bapagu rie: Muana eyitsi taji andi na musalitsi eyitsi fumu andi. Pa menu nyivu taji, duyitsu duka? Pa menu nyivu Fumu, dibandu yi batu bagekitsili? Duindensi, mbana duiwivuli rie: Tsie tumagulensila?

⁷ Duibeyi abivu bisumuga o binyensulu biami bipagu na duikwivuli rie: Diambu yi tumagulensila? Mu mbari duisalisi binyensulu biami bipagu kulini!

⁸ Ava duibeyili yibulu ayivu yidunga, adina tsiri dibi? Ava duibeyili yibulu ayipitsuyi vo ayivu yibomfi, adina wandi tsiri dibi? Pa duivayi dedi mosi ombu murumitsi enu odudila na buranga? Odukelisa na nsangu? Fumu Mabadi oyiwivuli nana.

⁹ Kabogu weliganu undembiyila menu Nsambi enu yiri nyudulasa yingeba. Duitasi nyudugulu? Tsatsabi!

¹⁰ Uviolila ubueji pa umosi va gari enu odibiga maguyi maNdagu Nsambi yiri dugobangisa muji kulini va yinyensulu yiami yipagu. Dugendasi ubueji na pagu tsienu tsigendasi ubueji wandi. Menu Fumu Mabadi oyidivosi.

¹¹ Ubandila o disukusulu dimosi dibutamba te no disusu, diina diami divu na diduma va gari malongu. Mu mbura tsiotsu benyensi pagu tsimbunga jiboti ukitsa na bepagulili pagu atsivu tsiwelimina. Nyiina, bisi malongu bejabi buneni buami. Menu Fumu Mabadi oyidivosi.

¹² Tumba jenu duindensi na duilensi binyensulu bipagu ava duibeyili pagu atsigaa tsiwelimina.

¹³ Duivosi wandi rie: Ka muna diambu di! Fumu Mabadi evosi rie: Tsiri undensa? Duipagulili abimadagu vo abitsonduyi vo abivu bibomfi. Je nyusinga pagu tsimunongu eni?

¹⁴ Ka muna mulogu gu uvu na mutu oyivangini upagulila mulumi yiruitsi aguvu mu mugamba andi, tumba evinsi ayibeli! Nyivu kaga jineni, aji bisi malongu motsu bedumi. Menu Fumu Mabadi oyidivosi!