Luke 9 - La Sainte Bible en Langue Yipunu

Jesus usindiga esindiyi digumi na badukitsi babeji uyenalonsanga

¹ Jesus amabengusana digumi na badukitsi bandi babeji va mbura mosi na amabagabila mangolu na musuga upalisa binyunyi bibi nobelusa bibedu.

² Amabasindiga yiari na yiari uyenasamuna Durumu duNsambi nobelusa bibedu.

³ Amabalonsa rie: Ava duilingili duyabega yima: ne duvengu ne komi ne biguji ne bikutu bisusu.

⁴ Mu mandagu ama dukota, tsananu muna na amuna durambuyila wandi.

⁵ Pa batu bagedudili ka gusuganu mu musiengi eni na bagandilianu rie: Tugomueruga gunu; dionyi diubalubusa.

⁶ Badukitsi bamasogama na bamayenawendanga o misiengi miotsu uyenasamunanga Musamu Uboti noyenabelusanga bibedu yiari nayiari.

Ukambuiu uHerode

⁷ Herode murumitsi uGalilee amagulu motsu amamavagungu; amakambulu mu dionyi mu mbari batu bamavosa puela mambu. Bamavosa rie: Kabogu Jean Baptiste amarambuga o dufu.

⁸ Tumba basusu bamawaka rie: Tsiri jandi, Elie amamuelabana. Na basusu bamavosa rie: Mubiyitsi ukala amarambuga o dufu.

⁹ Herode amavosa rie: Nyimatabusa Jean muru tumba dibaala diedidi adi nyigulu misamu miemimi anyi? Kabogu amarombanga ulaba Jesus.

Jesus ulisila elisili tosini yiranu tsibabaala

¹⁰ Bilumbi bamagabuga na bamatsingula Jesus motsu amamavagu. Bamawenda o yiari ayinengulu Bethsaida, mua vala na batu.

¹¹ Batu banodigulu bamabaduka. Jesus amabasayimina na amabalonsa mambu maDurumu duNsambi na amabelusa jogu abamabelanga.

¹² Ava tsisiga digumi na badukitsi babeji bamatsingula Jesus rie: Baganini yiri bayenawenda o mimbu nesi o masaku uyenaromba bilatsi mu mbari mbura ejiji jigaa na yisalu.

¹³ Jesus amabawagula rie: Jenu beni baveyianu biguji. Tumba bamamuwaka rie: Tuna yika mapa maranu na banyama bamamba babeji. Guirondi yiri tuwenda uyesumbila batu bebaba biguji?

¹⁴ (Vamaba tosini yiranu tsibabaala.) Jesus amatsingula badukitsi bandi rie: Batsanisianu, diguki diguki magumara-maranu.

¹⁵ Badukitsi bamamugululu kabogu bamabatsanisa.

¹⁶ Mbana Jesus amabonga mapa maranu na banyama bamamba babeji; anobuaga misu o julu amagabusila Nsambi diboti mu diambu dibiguji. Mbana amabitabula na amabivega ombu badukitsi ubigabila batu.

¹⁷ Botsu bamaji na bamagukuru. Bibuku abimasialulu bimabasa digumi na ponsi beji.

Pierre utubula etubuli yiri Jesus aji Christ

¹⁸ Yilumbu yimosi ayi Jesus amasambila pinsa badukitsi bandi bamamurasuna. Amabawivula rie: Yi batu beposili?

¹⁹ Bamawagula rie: Bamosi bevosi yiri guji Jean Baptiste. Basusu bevosi yiri guji Elie na basusu yiri guji mubiyitsi ukala agumarambuga o dufu.

²⁰ Amabawivula rie: Tumba jenu yi duitasi? Pierre amamugabusila rie: Guji Christ agumaruyila ombu Nsambi.

Jesus ebalonsi nana ofuila na nana orambuyila

²¹ Jesus amabaruma rie: Duyaditsingula batu.

²² Amabuela rie: Muana Mutu olaba maguga maneni; bivunda na bavagulitsi bapagu na milonsi mimigaga bomubusa. Va julu vana oboku na orambuga o dufu mu yilumbu yimurieru.

²³ Mbana amavosa ombu botsu rie: Pa mutu etondi alebusa mandi motsu nonangula kurusu andi yilumbu na yilumbu nondukanga.

²⁴ Mu mbari oyirondi ukegobula otsiemuga tumba oyikevega mu diambu diami ogobulu.

²⁵ Ne pa mutu odila bulongu buotsu tumba otsiemuga vo ubungana, ubueji uka?

²⁶ Pa mutu olaba yisonyi mu diambu diami, Muana Mutu wandi omulasa yisonyi ava oruyila ulasa bundumba buandi na buTata na bubiansa biNsambi.

²⁷ Dingensa nyidutsinguli rie: Bamosi abavu vava bagolefu te na Durumu duNsambi dujabunu.

Dunyuru duJesus duikaluyi

²⁸ Jesus anovosa mambu meni bamaletsana tsona mosi mbana bamawenda jogu botsu na Pierre na Jacques na Jean uyesambila o julu mukongu.

²⁹ Ava amasambilila yinsi yiandi yimakaluga na yiduaru yiandi yimavedama vedi vedi.

³⁰ Sundila vamalabana babaala babeji umoga bemoyi na Jesus; diwendi rie: Moise na Elie bamamurasuna na bundumba bumabalulila.

³¹ Bamamoga na Jesus mu diambu didufu adu ofuila o Jerusalem.

³² Pierre na bambatsi bandi mbe baki bilu tumba banorambuga bamalaba bundumba buJesus na bubabaala beni abamaba nandi.

³³ Yika babaala beni bewendi, Pierre amavosa na Jesus rie: Fumu diboti yiri tubianu vava. Turungianu mirorombi mirieru: umosi aguagu, umosi agu Moise na ususu agu Elie. (Asamajaba adi amavosa.)

³⁴ Ava amavosila nana dimungi dimasunda na dimabagumba, badukitsi bamagaangu na goma.

³⁵ O gari dimungi umagulunu diufi adimavosa rie: Agugu la Muana ami agu nyimasola. Mugululuanu!

³⁶ Diufi dieni dinovola bamalaba yika Jesus buandi. Mu temu eni badukitsi basamatsingula batu adi bamayelaba.

Jesus ubelusa ebelusi muana udibaala aguvu na yinyunyi yibi

³⁷ Kedi banovindama mukongu batu bapuela bapuela bamabengusana Jesus.

³⁸ Va gari ogu vamaba dibaala adimagamuga rie: Mulonsi, kokolu tsiagu, lasa muana ami yingeba mu mbari ngaa ususu.

³⁹ Sundila yinyunyi yibi yimugaangingi, yigamuyingi mbana yimututusingi te na epalisingi difuitsa; yimunemisingi na yigegarungu umudunda.

⁴⁰ Nsiwivula badukitsi bagu uyipalisa tumba bagaarungula.

⁴¹ Jesus amawaka rie: Ka muna pagu ji! Duna mirima migala. Nyisakatsinga nenu? Nyurungula uwarila kulini tsienu? Bega muana.

⁴² Ava muana aki mu nsila utola ombu Jesus yinyunyi yibi yimamuberusa na yimamututusa na mangolu. Jesus anosiemba yinyunyi yibi amayipalisa mbana amagabusa muana ombu taji andi.

⁴³ Mbana botsu bamakakisa buneni buNsambi nesi mangolu mandi. Botsu bamakambulu ulaba motsu ama Jesus amavaganga, kabogu Jesus anodigulu amavosa na badukitsi bandi rie:

Jesus ubuesa ebuesi uvosa diambu didufu na durambugu duandi

⁴⁴ Guluanu adi nyudutsingula rie: Muana Mutu olasumaguga na batu.

⁴⁵ Tumba basamatsiyisa adi evosi; dimabasueyila yiri bagotsiyisa na bamalaba goma umuemuwivula bivu.

Anyi avu muneni?

⁴⁶ Badukitsi bamaba na musosi mu mbari bamagalana buneni.

⁴⁷ Jesus anodijaba amabalasa muana ugeyi novosa rie:

⁴⁸ Uotsu oyidili muana gugu ugeyi mu diina diami endili wandi; uotsu endili edili jandi omansindiga. Anyi avu muneni? Tsiri jandi aguvu ugeyi?

Agugaa na kueru nenu aji mutu enu

⁴⁹ Jean amavosa rie: Mulonsi, tutsilaba mutu aguipalisi binyunyi bibi na mangolu madiina diagu; tutsimugandisa mu mbari agaanetu.

⁵⁰ Tumba Jesus amamugabusila rie: Duyamuemugandisa mu mbari ogaa na kueru nenu aji mutu enu.

Bisi Samarie bebusi Jesus

⁵¹ Jesus anojaba diweru adi omata o julu yika utola dikatola amagana kaka ulewenda o Jerusalem.

⁵² Jesus amaretsa bilumbi uyemukunsila mbura o musiengi uSamarie.

⁵³ Tumba batu abamatsana vana bamabusa ubadila mu mbari bamajaba yiri o Jerusalem bewendi.

⁵⁴ Jacques na Jean banodigulu bamawivula rie: Fumu, guirondi yiri turuma muji ubonduga o julu nobasielasana?

⁵⁵ Jesus amageluga ombu gogu na amabasiemba.

⁵⁶ Kabogu bamawenda o musiengi ususu.

Batu mbe baronda uduka Jesus

⁵⁷ Ava bamabila mu nsila mutu amatsingula Jesus rie: Nyirondi uwenda nagu mbura tsiotsu atsi guwendanga.

⁵⁸ Jesus amamugabusila rie: Bandetsi bana bapuiti na batsoli bana muva tumba Muana Mutu agaa na mbura usilimina.

⁵⁹ Ombu ususu Jesus amavosa rie: Nduki. Tumba mutu eni amawagula rie: Kokolu Mulonsi, nyirondi ulebuaga mfumbi,

⁶⁰ Jesus amamuwagula rie: Dunda, abamafu jogu botsiga bamfumbi bogu; Tumba ndeʼ, wenda nosamuna mambu maDurumu duNsambi.

⁶¹ Ususu amavosa rie: Mulonsi, nyirondi uwenda nagu tumba nyileyeganina batu bami.

⁶² Jesus amamugabusila rie: Jandi oyibandi yisalu na magebu agaa uwelimina ujaba Durumu duNsambi.