Luke 8 - La Sainte Bible en Langue Yipunu

Bagetu abamalinga na Jesus

¹ Mbana Jesus amalinganga o misiengi no mimbu uyenasamunanga Musamu Uboti uDurumu duNsambi. Digumi na badukitsi bandi babeji bamalinganga nandi;

² na bagetu basusu abamapalusu binyunyi bibi na abamabelusu wandi: Marie ajimanengulungu Magdala omapalusu yisambuali yibinyunyi bibi amaba umosi va gari ogu.

³ Jeanne mugatsi uChuza musalitsi uHerode amaba ususu. Mbana Suzanne na basusu bapuela abamagabila Jesus na badukitsi bandi bamaba nogu wandi.

Nongu jimukukitsi

⁴ Batu bapuela abamaruganga yiari na yiari bamayevikana ombu Jesus na amababuayila nongu ejiji rie:

⁵ Mukukitsi amawenda ukuka tsangu tsiandi. Ava akukilanga tsangu tsimosi tsimabonduga va nsila na tsimatsiarulu nesi batsoli bamayetsidoda.

⁶ Tsimosi tsimabonduga va yilala yimamanyi; tsinobendisa, bivaru bibionyi bimagumuga mu mbari butamba busamaba na mamba yika mamanyi na mamanyi.

⁷ Tsimosi tsimabonduga va gari ngansi tsimatsiendi; matsiendi mamabenda va mosi na bivaru na mamabitutsa.

⁸ Tsimosi tsimabonduga va butamba buboti; tsimabendisa bivaru; yivaru yivaru yimabura kama kama. Mbana Jesus amabuela rie: Jenu adugaa madiba guluanu!

Dibandu dibanongu baJesus

⁹ Badukitsi bandi bamamuwivula ubavindiyila nongu aji abanobabuayila.

¹⁰ Jesus amawagula rie: Dujabu dumambu maDurumu duNsambi dumaduvegu tumba ombu basusu dumavosu yika na banongu. Diwendi rie: Begengili yika ugengila tumba bagelabi, na begulu yika ugulu tumba bagetsiyisi.

Divindugulu dinongu jimukukitsi

¹¹ Guluanu divindugulu dinongu ejiji: Tsangu la Mambu maNsambi.

¹² Atsimabonduga va nsila la jogu abegulu mambu tumba diabu eruyi umatsiemusa mu mirima miogu yiri bakemavayila yitu nogobulu.

¹³ Atsimabonduga va yilala yimamanyi la jogu abegulu malongi na nsangu tumba mambu magesikimi mu mirima miogu; belemavayila yitu mbana ava bemangulungu bagewari.

¹⁴ Atsimabonduga va gari ngansi tsimatsiendi la jogu abegulu wandi tumba misosi na busina na maboti bibagabusi nsima na bagemuesala yisalu yiwelimina.

¹⁵ Atsimabonduga va butamba buboti la jogu abegulu malongi na murima usunda na nsala umadedila; jogu bana besalingi yika bisalu biboti na biboti.

Nongu jipaga

¹⁶ Tsia mutu agebangisi paga ujisunsa o tsi ponsi vo o tsi tangi, mbeyianu? Tsatsabi! Ejivakiyi va dingasa yiri abekoti bolaba yijalala.

¹⁷ Vagaa diambu adimasuegu adigojabunu na vagaa fundu ajigowansulu muansu.

¹⁸ Kabogu guluanu na buranga: jandi ona yima obuesu yisusu tumba ogaa na yima opatulu ne ayi etasi ayivu nandi.

Nguji na baana banguji baJesus

¹⁹ Nguji na baana banguji baJesus bamaruga umulaba tumba basamarungula ukota ombu gandi mu mbari batu bamaba bapuela.

²⁰ Mutu amatsingula Jesus rie: Nguji agu na baana banguji bagu baji va gusu kana, berondi ugulaba.

²¹ Jesus amavosa ombu botsu rie: Nguji ami na baana banguji bami bavu jogu abegulu nodedila mambu maNsambi.

Jesus uvotsa evotsi mungudi

²² Yilumbu yimosi Jesus amanangama o bota na badukitsi bandi. Amabatsingula rie: Tusabuyianu o disimu dina diyiliba. Kabogu bamasogama.

²³ Mbe basakawenda vala, Jesus amawenda yilu. Mungudi uneni umasundila ugumba te na bota jimabubasa mamba; botsu bamagaangu na goma.

²⁴ Badukitsi bamawenda ombu Jesus na bamamurambusa rie: Fumu! Fumu! Yika ufu tukafuanu! Jesus anosimbuga amasiemba punga na mingiba na bimavola sui; duvotsu dumaba duneni.

²⁵ Jesus amawivula badukitsi rie: Yitu yienu yika? Tumba bamakambulu na bamagaangu na goma, bamavosa joʼ beni najoʼ beni rie: Munongu mutu yi avu? Labatianu orungula uruma nesi punga nesi mingiba na bimudedili!

Jesus upalisa epalisi binyunyi bibi ombu dibaala

²⁶ Bamayetsiekama o bulongu buGerasenie abuvu o disimu dina diyiliba abusungasana na Galilee.

²⁷ Jesus anosunduga, muisi musiengi eni amayemubengusana. Dibaala dieni amaba na binyunyi bibi; amalinganga penyi na amatsananga yika o mambina.

²⁸ Anobenguna na Jesus amagamuga na amagudama va gusu andi novosa na mangolu rie: Jesus Muana Nsambi aguvu uneni, diambu yi divu va gaii jetu nagu? Kokolu tsiagu, guyandasa maguga!

²⁹ Amavosa nana mu mbari Jesus amaruma yinyunyi yibi upala. Diwendi rie: yinyunyi yibi yimamugaanganga; diuleba bamamutunganga na bapanga na bivangu bimadilu amabitabulanga; yinyunyi yibi yieni yimamubega o mbura tsibupinsa.

³⁰ Jesus amamuwivula rie: Diina diagu yi? Jandi amawagula rie: Dibuli. Mu mbari binyunyi bipuela bimaba nandi.

³¹ Binyunyi bieni bimalenda Jesus na yindandi rie: Kokolu tsiagu, guyatusindiga o mbengi.

³² Vamaba mugamba uneni ubangulu abamalinganga vana mukongu eni. Kabogu binyunyi bibi bimavosa na Jesus rie: Tusingisi utsana ombu bangulu. Jesus amabasingisa dionyi.

³³ Binyunyi bibi bimamupalila na bimakota ombu bangulu. Bangulu botsu bamasundila uvindama mukongu, bamakebuaga o yiliba na bamafu.

³⁴ Bakelisi babangulu banodilaba bamawenda mambangu na bamanyavisa musamu o musiengi nesi o masaku.

³⁵ Batu bamawenda uyelaba nana dimabila. Banotola ombu Jesus bamalaba dibaala adimapalusu binyunyi bibi atsana va gusu andi, aduara na asigama. Bamagaangu na goma

³⁶ Abamadilaba bamatsingula basusu nana dimabila na dibaala adimapalusu binyunyi bibi.

³⁷ Bisi yiari yieni botsu bamawivula Jesus ugusuga mu mbari bamagaangu na goma jineni. Jesus amanangama o bota na amayenagabusila.

³⁸ Dibaala adimapalusu binyunyi bibi amavosa na Jesus rie: Nyirondi uwenda nagu. Tumba Jesus amamugandisa rie:

³⁹ Nesi, gabuga o ndagu agu notsingula batu motsu ama Nsambi amaguvayila. Kabogu amagabuga o musiengi uyenanyavisa motsu ama Jesus amamuvayila.

Muana umugetu uJairus na mugetu agumabemba yikutu yiJesus

⁴⁰ Ava Jesus amagabusila o disimu dina diyiliba batu bapuela bamamuviva na nsangu.

⁴¹ Va gari ogu vamaba dibaala diina diandi Jairus omaba yivunda yiNdagu Yibenguna. Amagudama va gusu Jesus na amamulenda rie: Kokolu tsiagu, tʼwendi o ndagu ami;

⁴² nyina bumuana umugetu aguvu digumi na bilima bibeji, yika ufu efu. Banosogama batu bamabandasana Jesus.

⁴³ Va gari ogu vamaba mugetu agumaba na muvuva umalungu digumi na bibma bibeji; amanyambasana mbongu tsiandi ufuta banganga tumba ne umosi asamamubelusa.

⁴⁴ Mugetu eni amavioga o nsima Jesus na amabemba difubu diyikutu yiandi. Vana vana malungu mamakamuga.

⁴⁵ Jesus amawivula rie: Anyi amambemba? Botsu bamagala; Pierre na botsu abamaba nandi bamavosa rie: Fumu, batu bapuela bapuela begutsiengili na begubandisini ne nana guiwivuli anyi amambemba?

⁴⁶ Tumba Jesus amawaka rie: Mutu amambemba mu mbari nyimagulu ava mangolu mamapalila.

⁴⁷ Mugetu anojaba yiri dimajabunu amagudama noregama va gusu Jesus. Va misu mabatu botsu amatubula dibandu adi amamubembila na nana amasundila ubeluga.

⁴⁸ Jesus amamutsingula rie: Muana ami, yitu yiagu yimagubelusa; wenda na buranga.

⁴⁹ Yiotsu ayi evosi na mugetu yilumbi yimaruga ombu yivunda yiNdagu Yibenguna na yimavosa rie: Muana amafu; guyamuetsoyisa Mulonsi.

⁵⁰ Tumba Jesus anogulu dionyi amatsingula Jairus rie: Sunsa murima, payili yika yitu na obeluga.

⁵¹ Ava Jesus amatolila o ndagu asamasingisa basusu ukota yika Pierre na Jean na Jacques na taji na nguji muana.

⁵² Botsu bamalila na bamayenakebuaganga mu diambu dimuana. Mbana Jesus amavosa rie: Dundanu ulila, muana asakafu tumba amalengula mua yilu.

⁵³ Botsu bamamureka mu mbari bamajaba yiri afu kala.

⁵⁴ Jesus amagaanga gogu muana na amagamuga rie: Rambugati!

⁵⁵ Muvumu andi umagabuga na vana vana amarambuga. Jesus amaruma rie: Muveyianu biguji.

⁵⁶ Nguji andi na taji bamakambulu puela tumba Jesus amabalubusa yiri bayaditsingula mutu.