Luke 8 - La Sainte Bible en Langue YipunuBagetu abamalinga na Jesus 1 Mbana Jesus amalinganga o misiengi no mimbu uyenasamunanga Musamu Uboti uDurumu duNsambi. Digumi na badukitsi bandi babeji bamalinganga nandi; 2 na bagetu basusu abamapalusu binyunyi bibi na abamabelusu wandi: Marie ajimanengulungu Magdala omapalusu yisambuali yibinyunyi bibi amaba umosi va gari ogu. 3 Jeanne mugatsi uChuza musalitsi uHerode amaba ususu. Mbana Suzanne na basusu bapuela abamagabila Jesus na badukitsi bandi bamaba nogu wandi. Nongu jimukukitsi ( Matt 13.1-9 ; Marc 4.1-9 ) 4 Batu bapuela abamaruganga yiari na yiari bamayevikana ombu Jesus na amababuayila nongu ejiji rie: 5 Mukukitsi amawenda ukuka tsangu tsiandi. Ava akukilanga tsangu tsimosi tsimabonduga va nsila na tsimatsiarulu nesi batsoli bamayetsidoda. 6 Tsimosi tsimabonduga va yilala yimamanyi; tsinobendisa, bivaru bibionyi bimagumuga mu mbari butamba busamaba na mamba yika mamanyi na mamanyi. 7 Tsimosi tsimabonduga va gari ngansi tsimatsiendi; matsiendi mamabenda va mosi na bivaru na mamabitutsa. 8 Tsimosi tsimabonduga va butamba buboti; tsimabendisa bivaru; yivaru yivaru yimabura kama kama. Mbana Jesus amabuela rie: Jenu adugaa madiba guluanu! Dibandu dibanongu baJesus ( Matt 13.10-17 ; Marc 4.10-12 ) 9 Badukitsi bandi bamamuwivula ubavindiyila nongu aji abanobabuayila. 10 Jesus amawagula rie: Dujabu dumambu maDurumu duNsambi dumaduvegu tumba ombu basusu dumavosu yika na banongu. Diwendi rie: Begengili yika ugengila tumba bagelabi, na begulu yika ugulu tumba bagetsiyisi. Divindugulu dinongu jimukukitsi ( Matt 13.18-23 ; Marc 4.13-20 ) 11 Guluanu divindugulu dinongu ejiji: Tsangu la Mambu maNsambi. 12 Atsimabonduga va nsila la jogu abegulu mambu tumba diabu eruyi umatsiemusa mu mirima miogu yiri bakemavayila yitu nogobulu. 13 Atsimabonduga va yilala yimamanyi la jogu abegulu malongi na nsangu tumba mambu magesikimi mu mirima miogu; belemavayila yitu mbana ava bemangulungu bagewari. 14 Atsimabonduga va gari ngansi tsimatsiendi la jogu abegulu wandi tumba misosi na busina na maboti bibagabusi nsima na bagemuesala yisalu yiwelimina. 15 Atsimabonduga va butamba buboti la jogu abegulu malongi na murima usunda na nsala umadedila; jogu bana besalingi yika bisalu biboti na biboti. Nongu jipaga ( Marc 4.21-25 ) 16 Tsia mutu agebangisi paga ujisunsa o tsi ponsi vo o tsi tangi, mbeyianu? Tsatsabi! Ejivakiyi va dingasa yiri abekoti bolaba yijalala. 17 Vagaa diambu adimasuegu adigojabunu na vagaa fundu ajigowansulu muansu. 18 Kabogu guluanu na buranga: jandi ona yima obuesu yisusu tumba ogaa na yima opatulu ne ayi etasi ayivu nandi. Nguji na baana banguji baJesus ( Matt 12.46-50 ; Marc 3.31-35 ) 19 Nguji na baana banguji baJesus bamaruga umulaba tumba basamarungula ukota ombu gandi mu mbari batu bamaba bapuela. 20 Mutu amatsingula Jesus rie: Nguji agu na baana banguji bagu baji va gusu kana, berondi ugulaba. 21 Jesus amavosa ombu botsu rie: Nguji ami na baana banguji bami bavu jogu abegulu nodedila mambu maNsambi. Jesus uvotsa evotsi mungudi ( Matt 8.23-27 ; Marc 4.35-41 ) 22 Yilumbu yimosi Jesus amanangama o bota na badukitsi bandi. Amabatsingula rie: Tusabuyianu o disimu dina diyiliba. Kabogu bamasogama. 23 Mbe basakawenda vala, Jesus amawenda yilu. Mungudi uneni umasundila ugumba te na bota jimabubasa mamba; botsu bamagaangu na goma. 24 Badukitsi bamawenda ombu Jesus na bamamurambusa rie: Fumu! Fumu! Yika ufu tukafuanu! Jesus anosimbuga amasiemba punga na mingiba na bimavola sui; duvotsu dumaba duneni. 25 Jesus amawivula badukitsi rie: Yitu yienu yika? Tumba bamakambulu na bamagaangu na goma, bamavosa joʼ beni najoʼ beni rie: Munongu mutu yi avu? Labatianu orungula uruma nesi punga nesi mingiba na bimudedili! Jesus upalisa epalisi binyunyi bibi ombu dibaala ( Matt 8.28-34 ; Marc 5.1-20 ) 26 Bamayetsiekama o bulongu buGerasenie abuvu o disimu dina diyiliba abusungasana na Galilee. 27 Jesus anosunduga, muisi musiengi eni amayemubengusana. Dibaala dieni amaba na binyunyi bibi; amalinganga penyi na amatsananga yika o mambina. 28 Anobenguna na Jesus amagamuga na amagudama va gusu andi novosa na mangolu rie: Jesus Muana Nsambi aguvu uneni, diambu yi divu va gaii jetu nagu? Kokolu tsiagu, guyandasa maguga! 29 Amavosa nana mu mbari Jesus amaruma yinyunyi yibi upala. Diwendi rie: yinyunyi yibi yimamugaanganga; diuleba bamamutunganga na bapanga na bivangu bimadilu amabitabulanga; yinyunyi yibi yieni yimamubega o mbura tsibupinsa. 30 Jesus amamuwivula rie: Diina diagu yi? Jandi amawagula rie: Dibuli. Mu mbari binyunyi bipuela bimaba nandi. 31 Binyunyi bieni bimalenda Jesus na yindandi rie: Kokolu tsiagu, guyatusindiga o mbengi. 32 Vamaba mugamba uneni ubangulu abamalinganga vana mukongu eni. Kabogu binyunyi bibi bimavosa na Jesus rie: Tusingisi utsana ombu bangulu. Jesus amabasingisa dionyi. 33 Binyunyi bibi bimamupalila na bimakota ombu bangulu. Bangulu botsu bamasundila uvindama mukongu, bamakebuaga o yiliba na bamafu. 34 Bakelisi babangulu banodilaba bamawenda mambangu na bamanyavisa musamu o musiengi nesi o masaku. 35 Batu bamawenda uyelaba nana dimabila. Banotola ombu Jesus bamalaba dibaala adimapalusu binyunyi bibi atsana va gusu andi, aduara na asigama. Bamagaangu na goma 36 Abamadilaba bamatsingula basusu nana dimabila na dibaala adimapalusu binyunyi bibi. 37 Bisi yiari yieni botsu bamawivula Jesus ugusuga mu mbari bamagaangu na goma jineni. Jesus amanangama o bota na amayenagabusila. 38 Dibaala adimapalusu binyunyi bibi amavosa na Jesus rie: Nyirondi uwenda nagu. Tumba Jesus amamugandisa rie: 39 Nesi, gabuga o ndagu agu notsingula batu motsu ama Nsambi amaguvayila. Kabogu amagabuga o musiengi uyenanyavisa motsu ama Jesus amamuvayila. Muana umugetu uJairus na mugetu agumabemba yikutu yiJesus ( Matt 9.18-26 ; Marc 5.21-43 ) 40 Ava Jesus amagabusila o disimu dina diyiliba batu bapuela bamamuviva na nsangu. 41 Va gari ogu vamaba dibaala diina diandi Jairus omaba yivunda yiNdagu Yibenguna. Amagudama va gusu Jesus na amamulenda rie: Kokolu tsiagu, tʼwendi o ndagu ami; 42 nyina bumuana umugetu aguvu digumi na bilima bibeji, yika ufu efu. Banosogama batu bamabandasana Jesus. 43 Va gari ogu vamaba mugetu agumaba na muvuva umalungu digumi na bibma bibeji; amanyambasana mbongu tsiandi ufuta banganga tumba ne umosi asamamubelusa. 44 Mugetu eni amavioga o nsima Jesus na amabemba difubu diyikutu yiandi. Vana vana malungu mamakamuga. 45 Jesus amawivula rie: Anyi amambemba? Botsu bamagala; Pierre na botsu abamaba nandi bamavosa rie: Fumu, batu bapuela bapuela begutsiengili na begubandisini ne nana guiwivuli anyi amambemba? 46 Tumba Jesus amawaka rie: Mutu amambemba mu mbari nyimagulu ava mangolu mamapalila. 47 Mugetu anojaba yiri dimajabunu amagudama noregama va gusu Jesus. Va misu mabatu botsu amatubula dibandu adi amamubembila na nana amasundila ubeluga. 48 Jesus amamutsingula rie: Muana ami, yitu yiagu yimagubelusa; wenda na buranga. 49 Yiotsu ayi evosi na mugetu yilumbi yimaruga ombu yivunda yiNdagu Yibenguna na yimavosa rie: Muana amafu; guyamuetsoyisa Mulonsi. 50 Tumba Jesus anogulu dionyi amatsingula Jairus rie: Sunsa murima, payili yika yitu na obeluga. 51 Ava Jesus amatolila o ndagu asamasingisa basusu ukota yika Pierre na Jean na Jacques na taji na nguji muana. 52 Botsu bamalila na bamayenakebuaganga mu diambu dimuana. Mbana Jesus amavosa rie: Dundanu ulila, muana asakafu tumba amalengula mua yilu. 53 Botsu bamamureka mu mbari bamajaba yiri afu kala. 54 Jesus amagaanga gogu muana na amagamuga rie: Rambugati! 55 Muvumu andi umagabuga na vana vana amarambuga. Jesus amaruma rie: Muveyianu biguji. 56 Nguji andi na taji bamakambulu puela tumba Jesus amabalubusa yiri bayaditsingula mutu. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon