Luke 7 - La Sainte Bible en Langue Yipunu

Jesus ubelusa ebelusi musalitsi uyivunda yikama bagora

¹ Ava Jesus amamanina utsingula batu mambu memama amawenda o Capernaum.

² Yivunda yikama bagora amaba na musalitsi agu amaronda puela; amabela diambu.

³ Anogulu beranguli Jesus, amasindiga bivunda bibaJuif ombu gandi uyemunengila uyibelusa musalitsi andi.

⁴ Banotola ombu Jesus bamamulembiyila rie: Kokolu tsiagu, dibaala diedidi divu diwelimina uwamusu.

⁵ Erondi batu betu na jaʼ beni amaturungila Ndagu Yibenguna.

⁶ Kabogu Jesus amawenda nogu. Yika uweʼ bewendi na yivunda yikama bagora amatinda bambatsi bandi umutsingula rie: Fumu, guyamueketsoyisa.

⁷ Nyisaawelimina yiri nyugudila o ndagu ami na ngekelaba yiri nyiji uwelimina uruga ombu gagu. Kabogu vosa yika uvosa na musalitsi ami obeluga.

⁸ Menu wami nyivu o tsi durumu dubivunda na nyina bagora aba nyirumi. Nyirumi umosi rie: Wenda na ewendi; nyirumi musalitsi ami rie: Vaga nana na edivayi.

⁹ Jesus amakambulu ava amagululu mambu memama; amageluga ombu batu abamamudukanga na amavosa nogu rie: Nyiruyilanga nyisakalaba yitu yimunongu egugu nesi o Israel!

¹⁰ Kabogu bilumbi bimagabuga ombu yivunda yikama bagora na bamarasuna musalitsi amabeluga.

Jesus urambusa erambusi muana umukuili

¹¹ Ava kedi Jesus amawenda o musiengi aguinengulu Nain; badukitsi bandi na batu bapuela bamawenda nandi.

¹² Banotola bebeli na dikotulu dimusiengi, bamabenguna na batu abamabeganga mfumbi. Agumafu amaba muana divingu umukuili. Bisi musiengi bapuela bamamukelisa.

¹³ Fumu anomulaba amagaangu na yingeba na amavosa na mugetu rie: Guyamuelila!

¹⁴ Mbana Jesus amakueka ombu gogu; amabemba yigara yimfumbi na babaala abamayibeganga bamasikama. Jesus amaruma rie: Mufudu, rambugati!

¹⁵ Amatsana na amabanda uvosa. Mbana Jesus amayemugabusa ombu nguji andi.

¹⁶ Botsu bamagaangu na goma na bamayitsa Nsambi novosa rie: Mubiyitsi aguneni amalabana va gari etu! Nsambi amalingula batu bandi!

¹⁷ Misamu miJesus mimanyavanga o Judee na mbanda tsi jiotsu.

Badukitsi baJean Baptiste

¹⁸ Jean anotsingulu mambu meni motsu na badukitsi bandi, amanengila babeji basusu

¹⁹ na amabasindiga ombu Jesus umuwivula rie: Ndeʼ la jandi agu Jean amavosa uruga eruyi vo tuviva ususu?

²⁰ Banotola ombu Jesus bamavosa rie: Jean Baptiste atsitusindiga ombu gagu uguwivula rie: Je ndeʼ la jandi agu Jean evosi yiri uniga eruyi vo tuviva ususu?

²¹ Va misu mogu Jesus amabelusa bibedu na bibomfi na amapalisa binyunyi bibi na amatiemusa bidunga.

²² Amabagabusila rie: Wendanu noyetsingula Jean adi dutsilaba nogulu, diwendi rie: bidunga bikalaba, bitsondu bigemuetsonduga, bibedu binyambi bikabelusu, madiba makagulu, bamfumbi bakarambuga na Musamu Uboti ukasamunu ombu bijaga.

²³ Ka muna ubueji gu jandi olaba agugetumuni mambu mami paga!

²⁴ Badukitsi baJean banowenda Jesus amabanda uwivula batu mu diambu diJean rie: Yi dutsiyelaba o kumu? Dugobu adutsipupusu na punga? Tsatsabi!

²⁵ Yika tsie dutsiyelabila? Mutu aduara biduaru biboti? Nesi! Abeduari biduaru biboti na abetsani na maboti bavu o mandagu mabukaga.

²⁶ Anyi dutsiyelaba? Mubiyitsi? Nyiina, nyidutsinguli dutsilaba aguviolila ne mubiyitsi.

²⁷ Jean amavosulu mu Bisonu rie: Nsambi evosi rie: Laba nyisindiyi yilumbi yiami va gusu agu ugutsonsiyila nsila.

²⁸ Mbana Jesus amabuela rie: Dingensa nyidutsinguli rie: Vasakaburu mutu aguiviolili Jean buneni. Ne nana aguviolila ugeyi mu Durumu duNsambi emuviolili buneni.

²⁹ Batu botsu na babongitsi balepu bamamugulu; diwendi rie: jogu bamalededila duganu duNsambi ava bamabatusulu na Jean.

³⁰ Yika baJuif abamaba baPharisie na milonsi mimigaga basamagaru yiri duganu duNsambi duvu duwelimina nogu na bamabusa ubatusu na Jean.

³¹ Jesus amavosa rie: Diambu yi nyubagusunu batu bebaba na nyi bebagunu?

³² Bebagunu na bangebi abesani o dikasa. Dibuli dimosi bevosi na dibuli disusu rie: Tutsidusiyila dimbika tumba dugaayina! Tutsiduwimbilila nyimbu tsimanyonyi tumba dugaalila.

³³ Ava Jean Baptiste amaruyila amawarila nsala na asamanuanganga malamu na dumavosa rie: Ana yinyunyi yibi!

³⁴ Ava Muana Mutu amaruyila amajanganga nonuanganga na dumavosa rie: Ka muna mubi gu! Aji mulitsi na munuitsi, aji mbatsi babongitsi balepu na bango bikumbu.

³⁵ Diela diotsu diNsambi divu dingensa na dimavegu ombu botsu abedisingi.

Jesus aji o ndagu Simon

³⁶ MuJuif mosi agumaba muPharisie amanengila Jesus uji nandi. Jesus amakota o ndagu na amayetsana va tavula.

³⁷ O musiengi eni umaba yimbembu yimugetu. Ava amagululu yiri Jesus aji va tavula o ndagu muPharisie amaweʼ guna na yirura yimuyombu.

³⁸ Anokota ndagu amasikama o nsima Jesus va makulu mandi. Amabanda ulila na amabotsa makulu maJesus na matsanga mandi mbana amamatsindula na nanga tsiandi; anomafifa amamagotsa muyombu.

³⁹ Ava Simon, agumanengila Jesus o ndagu andi, amadilabila amatasa rie: Mbe mutu egugu avu tindi mubiyitsi mbe atsijaba yimbembu avu.

⁴⁰ Jesus amavosa nandi rie: Simon, nyirondi ugutsingula mua diambu. Simon amawaka rie: Ka vosa, Mulonsi.

⁴¹ Jesus amavosa rie: Mutu amasombisa batu babeji: ombu umosi kama yiranu tsimbongu tsilora jivema nombu ususu magumaranu mambongu tsilora jivema.

⁴² Anolaba yiri bagorungula umufutila kabogu amabasingilila miganu miogu. Anyi va gari jogu botsu babeji amamurondila viri?

⁴³ Simon amawagula rie: Nyitasi jandi agu amasingilila tsipuela. Jesus amamutsingula rie: Gutsiwagula buranga.

⁴⁴ Mbana anogeluga ombu mugetu amawivula Simon rie: Guilabi mugetu egugu? Nsikota o ndagu agu na gugaapega ne mamba ususa makulu mami tumba jandi atsisusa makulu mami na matsanga mandi na atsimatsindula na nanga tsiandi.

⁴⁵ Gugaambumba tumba nyikotilanga jandi egugu asakadunda ufifa makulu mami.

⁴⁶ Va julu vana gugaawitila muru ami matsi tumba jandi atsigotsa makulu mami muyombu.

⁴⁷ Kabogu nyigutsinguli yiri durondu duandi duneni duilasi yiri masumu mandi mapuela mamatandu. Uotsu agumatandu masumu mageyi elasi yika mua durondu.

⁴⁸ Mbana Jesus amavosa na mugetu rie: Masumu magu mamatandu.

⁴⁹ Jogu abamatsana va tavula nandi bamatasa rie: Agugu la nyi oyitandi masumu?

⁵⁰ Tumba Jesus amavosa na mugetu rie: Yitu yiagu yimagugobula, wenda na buranga!