Luke 6 - La Sainte Bible en Langue Yipunu

Bivu mu diambu diyilumbu yitsona

¹ Yilumbu yitsona Jesus na badukitsi bandi bamavioga mu nungi tsiputu. Badukitsi bandi bamadokula putu, bamatsigubula na bamatsiji.

² BaJuif abamaba baPharisie bamabawivula rie: Dibandu yi duisumunini migaga novaga adigaa diwelimina uvaga yilumbu yitsona?

³ Jesus amabawivula rie: Mbe dusakaranga adi David amavaga ava amagululu nsala, jogu na bambatsi bandi?

⁴ Amakota o Ndagu Nsambi na amabonga mapa amamavagulu ombu Nsambi, amamaji na amamavega ombu bambatsi bandi. Tsie jetu tugaa na mugaga aguivosi yika bavagulitsi bapagu bana musuga umaji?

⁵ Jesus amabatsingula rie: Muana Mutu ana musuga uvaga adivu diwelimina yilumbu yitsona.

Dibaala na gogu ugasa

⁶ Tsona jisusu Jesus amawenda o Ndagu Yibenguna na amalonsa. Aguna umaba dibaala na gogu umabaala ugasa.

⁷ Milonsi mimigaga na baPharisie bamaromba diela ufuengilila Jesus kabogu bamamuketanga ulaba yeri obelusa mutu mu yilumbu yitsona.

⁸ Jesus amajaba matasa mogu na amavosa na dibaala na gogu ugasa rie: Relama, lerugati. Dibaala dieni amarelama nokueka ombu Jesus.

⁹ Mbana Jesus amavosa nogu rie: Nyirondi uduwivula yivu. Diambu yi divu diwelimina mu migaga mietu? Uvaga maboti mu yilumbu yitsona vo uvaga mabi? Ugobula mutu vo umuboka?

¹⁰ Mbana amabagengila yisuisu na amavosa na dibaala rie: Simbula gogu agu. Amadivaga na gogu andi umabeluga.

¹¹ Banodilaba bamanyoga kabu jineni na bamabanda uwivusana rie: Tsie tuvayila Jesus?

Jesus usola esoli digumi na bilumbi bibeji

¹² Mbana Jesus amawenda o julu mukongu uyesambila; amaviosa mukolu uotsu umoga na Nsambi.

¹³ Wisi unotebuga amanengila badukitsi bandi na amasola digumi na babeji uba bilumbi biandi.

¹⁴ Abamasolu ababa: Simon (agu amaluga Pierre) na muana nguji andi Andre mbana Jacques na Jean na Philippe na Barthelemy;

¹⁵ na Matthieu na Thomas na Jacques muana uAlphee na Simon muisi Canaan;

¹⁶ na Judas muana Jacques na Judas Iscariote agumakaluga mufundisitsi.

Jesus ulonsa elonsi na batu bamabelusu

¹⁷ Banosunduga vana bamalesikama va yidesi agu bamarasuna badukitsi basusu na batu bapuela abamaruyila o yiari yiJudee na Jerusalem nesi o Tyr na Sidon.

¹⁸ Bamaruga umugulu nobelusu. Abamanyonyusungu na binyunyi bibi bamaruga wandi na binyunyi bibi bimapalusu.

¹⁹ Batu botsu bamaweliga umubemba mu mbari mangolu maNsambi mamaba nandi ubelusa batu.

Ubueji na munyongu

²⁰ Mbana Jesus amagengila badukitsi bandi yisuisu na amavosa rie: Ka muna ubueji gu jenu aduikelaba dugeyi dulaba! Duji o tsi Durumu duNsambi!

²¹ Ka muna ubueji gu jenu aduigulu nsala namunyi dulaba! O gusu dugukurusu!

²² Ka muna ubueji gu! Batu boduvina, bodubusa bodufuengilila na bodulensa mu diambu diMuana Mutu.

²³ Labanu ubueji na nsangu temu aji duilabili mambu memama mu mbari bisaku bienu bikelusu o julu. Jabanu yiri bataji babatu beni bamavayilanga babiyitsi mambu memama wandi.

²⁴ Ka muna munyongu gu jenu bandumba dulaba! Dumakedilila bundumba buenu.

²⁵ Ka muna munyongu gu jenu adumagukuru dulaba! O gusu dugulu nsala. Ka muna munyongu gu jenu aduireki namunyi duiaba! O gusu dulila kondu.

²⁶ Ka muna munyongu gu dulaba o gusu ne pa batu beduvosili maboti! Duyalibana bataji babatu beni bamavosilanga babiyitsi bamfurulu munongu mosi.

Rondanu batu abeduvini

²⁷ Tumba jenu aduikululu, guluanu rie: Rondanu batu abeduvini, vaganu maboti ombu jogu abedulensi.

²⁸ Vaganu maboti ombu jogu abeduloyi, sambilanu mu jogu abedulasi maguga.

²⁹ Pa mutu ogudimba va dibanga mugelusili disusu wandi. Pa mutu ebongi yikutu yiagu muveyi yijungi yiagu wandi.

³⁰ Vega mutu uotsu ayi eguvondi; pa mutu obonga yima yiagu guyamusuyiga yionyi.

³¹ Vayilanu basusu munongu mosi nana duirondili yiri boduvayila.

³² Pa duirondi yika abedurondi, ubueji uka? Ne bavayitsi bamasumu berondi abebarondi!

³³ Pa duivayi maboti yika ombu abeduvayi maboti ubueji uka! Ne bavayitsi bamasumu bedivayi.

³⁴ Pa duisombisi yika aba duitasi yiri bofuta, ubueji uka? Bavayitsi bamasumu na bavayitsi bamasumu besombisini yiri bosugasana.

³⁵ Rondanu batu abeduvini na bavayianu maboti; sombisanu, duyasuyiga. Yisaku yienu yiuba yineni; duba baana baNsambi aguvu uneni mu mbari jandi wandi evayili bango migalu na bango nyinga maboti.

³⁶ Balasianu yingeba nana Taji enu edulasili yingeba.

Duyatabulila basusu bunsonsi.

³⁷ Duyatabulila basusu bunsonsi na Nsambi agodutabulila bunsonsi; duyavega basusu mbela na Nsambi agoduvega mbela; tandanu basusu na Nsambi odutanda.

³⁸ Gabanu na Nsambi odugabila: dudila yietsu yiwelimina mu yievi yienu, yiubatugu nogomusunu te na yiupumuga. Yietsu ayi dumagabila basusu ayina Nsambi odugabila.

³⁹ Jesus amamuebabuayila nongu ejiji rie: Yidunga agorungula uwendisa yidunga nandi, mbeyianu?

⁴⁰ Jogu botsu babeji mbe bobonduga o yiduna. Muwijitsi ageviolili mulonsi tumba muwijitsi uotsu agumamana uwiji ebi nderi mulonsi andi.

⁴¹ Mu mbari yi guilabili yiriri ayi vu o disu dimuana taji agu na gugelabi dupaju aduvu o disu diagu?

⁴² Tsie guvosila na muana taji agu rie: Kokolu tugusuli yiriri ayivu o disu diagu? Gugelabi dupaju aduvu nagu? Ka muna penda ji! Legusula dupaju aduvu o disu diagu mbana gulaba nana gugusulila yiriri ayivu o disu dimuana taji agu.

Muiri na milunda

⁴³ Muiri umubusi ugeburi milunda mibi na muiri uyinguma ugeburi.

⁴⁴ Muiri uotsu uijabunu na milunda. Bagedokuli mumanga mu yifundi vo dilanga difubu mu mingengatogu, mbeyianu?

⁴⁵ Mutu uboti evayi maboti mu mbari maboti mavu o murima andi na mutu ubi evayi mabi mu mbari mabi mavu o murima andi. Amamavosu meruyili o murima.

Tungitsi beji

⁴⁶ Mu tnbari yi duindengili Fumu Fumu? Dugevayi ama nyivosi!

⁴⁷ Nyudulasa na nyi mutu oyiguhi mambu mami ebagunu.

⁴⁸ Aji nana dibaala adimarunga ndagu; amaletima puela mbana amarunga va julu dugunga. Nyidu jimabasa na mipupila mimasingama ndagu eni; misamarungula ujirakula mu mbari jimarungu buranga.

⁴⁹ Tumba oyigulu mambu mami na agemadedili aji nana dibaala adimarunga ndagu andi va yisieyi tsiri utimane pesu. Mipupila mimajisingama na vana vana jimarakuga; mudunsu undagu eni umaba uneni.