Luke 4 - La Sainte Bible en Langue Yipunu

Dumangu duJesus

¹ Jesus amaruga o Jourdain abasu na Yinyunyi yiNsambi na Yinyunyi yieni amamubega o kumu,

² aguna amamangu na diabu magumana mabilumbu. Bilumbu bieni biotsuasamajanganga kabogu amagulu nsala.

³ Diabu amamutsingula rie: Pa guji muana Nsambi, ruma yiri dimanyi diedidi diukituga biguji.

⁴ Jesus amamugabusila rie: Bisonu bisonugu rie: Tsiri yika biguji buandi abiuvega mutu monyu.

⁵ Mbana diabu amamulasa bufumu buotsu.

⁶ Amavosa rie: Nyuguvega mangolu memama motsu na busina buotsu. Biotsu bimapegu musuga na nyina musuga ubivega ombu agu nyusola.

⁷ Kabogu biotsu biuba abiagu pa gukutama va gusu ami.

⁸ Jesus amamugabusila rie: Bisonu bisonugu rie: Guyitsa nosalila yika Fumu Nsambi agu!

⁹ Mbana diabu amamubega o Jerusalem, amamumatisa o julu muansa Ndagu Nsambi na amamutsingula rie: Pa guji Muana Nsambi, kebuaga o tsi

¹⁰ mu mbari Bisonu bisonugu rie: Nsambi oruma biansa biandi ugukelisa.

¹¹ Bisusu rie: Jogu bogukelisa yiri gugoduku ne dibaku.

¹² Jesus amamugabusila rie: Bisonu bisonugu rie: Guyamanga Fumu Nsambi agu.

¹³ Anomana umumanga na mbangitsi tsieni tsiotsu, diabu amakakana nandi te na diweru disusu.

Jesus ubanda ebandi yisalu yiandi o Galilee

¹⁴ Jesus amagabuga o Galilee abasu na mangolu maYinyunyi yiNsambi. Diduma diandi dimanyavanga mu mbanda tsi jiotsu.

¹⁵ Amalonsanga o Mandagu maBibenguna na batu botsu bamamudodisanga.

Jesus ebusu na bisi Nazareth

¹⁶ Jesus amawenda o Nazareth agu amayebunguyila; yilumbu yitsona amakota o Ndagu Yibenguna nana dimabila yifu yiandi. Amarelama uranga Bisonu;

¹⁷ bamamuvega dibuku diEsaie jimubiyitsi. Amadibula na amaranga rie:

¹⁸ Yinyunyi yiFumu avu nami, amambiatsa usamuna Musamu Uboti ombu abamakambulu. Amansindiga utubula dujegusu ombu bakoli na dulabu ombu bidunga.

¹⁹ Amansindiga wandi ujeyisa abavu mu maguga notubula yilima ayi Fumu ogobula abandi.

²⁰ Jesus anodibiga dibuku amadigabusa ombu musalitsi mbana amatsana. Botsu abamaba o Ndagu Yibenguna bamamugengila yisuisu.

²¹ Mbana amavosa nogu rie: Namunyi Bisonu biebibi abi dubanogulu bimadugusu.

²² Botsu bamalaba ubueji na mambu mandi na bamakambulu ugulu amamavosu nandi. Jogu rie: Ayina la yi, jaʼ agaa muana Joseph?

²³ Jesus amabagabusila rie: Nyitasi dumbuayila nongu ejiji rie: Nganga, kebuga. Va julu vana duvosa rie: Ama tumagulu yiri gumavaga o Capernaum mavayi vava wandi.

²⁴ Mbana amavosa rie: Divu dingensa yiri mubiyitsi agogobusu va musiengi andi.

²⁵ Kululuanu! Divu dingensa yiri vamaba bakuili bapuela o Israel mu temu Elie. Ava mfula jisamamuenoyila mipuma mirieru na yibuku, vamaba dungosu duneni dunsala mu mbura tsiotsu.

²⁶ Ne nana Elie asamasindugu ombu bakuili basusu yika ombu mukuili uSarepta o yiari yiSidon.

²⁷ Vamaba bibedu bipuela binyambi o Israel mu temu mubiyitsi Elisee wandi tumba basusu basamabelusu yika Naaman muisi Syrie buandi.

²⁸ Botsu abamaba o Ndagu Yibenguna bamanyoga kabu jineni ava bamamugululu.

²⁹ Bamarelama mfungulugu na bamamugaanga. Musiengi ogu umarungu va mukongu la dibandu bamamudutila te no julu mukongu eni.

³⁰ Mbe baronda umubuaga o mbengi tumba Jesus amasundila uvioga kuasa, amayenawenda.

Dibaala na yinyunyi yibi

³¹ Mbana Jesus amawenda o Capernaum musiengi uGalilee amayelonsa batu guna mu yilumbu yitsona.

³² Bamakambulu puela mu mbari malongi mandi mamalonsu na mangolu.

³³ O Ndagu Yibenguna umaba mutu agumaba na yinyunyi yibi agumagamuga na diufi dineni rie:

³⁴ Aa Jesus muisi Nazareth diambu yi divu va gari jetu nagu! Guirondi utubunga? Nyigujabi, guji yilumbi yiNsambi.

³⁵ Jesus amaruma yinyunyi yibi rie: Vola sui! Dunda dibaala diedidi! Yinyunyi yibi yimamuberusa va misu mogu, yinomudunda yisamamuemulasa maguga.

³⁶ Botsu bamakambulu puela na bamavosasana rie: Ka muna diambu di! Dibaala diedidi erumi binyunyi bibi na mangolu na bipali wandi.

³⁷ Diduma diJesus dimanyavanga mu mbanda tsi jiotsu.

Jesus ubelusa ebelusi bapuela

³⁸ Jesus anogusuga o Ndagu Yibenguna amawenda o ndagu Simon. Boji buSimon amabela dibagu dineni na bamawivula Jesus umubelusa.

³⁹ Jesus amakueka bebeli nandi na amaruma dibagu na bukanyi rie: Saguga; mugetu amabeluga. Vana vana amarambuga ubalambila.

⁴⁰ Wisi unotsima botsu abamaba na bibedu biminongu na minongu bamabibega ombu Jesus. Amabasakiga miogu na biotsu bimabeluga.

⁴¹ Binyunyi bibi bipuela bimapalusu ombu puela batu; bimagamuga rie: Ndeju la Muana Nsambi. Jesus asamagaru na amabigandisa uvosa mu mbari bimajaba yiri jandi la Christ.

Jesus ulonsa elonsi o Judee

⁴² Yika wisi uitebuyi Jesus amapalila o musiengi na amawenda o kumu. Batu bamamuduka na banomurasuna bamaronda umusikiga.

⁴³ Tumba Jesus amavosa nogu rie: Nesi, nyimasindugu na Nsambi uyilonsa Musamu Uboti uDurumu duNsambi mu misiengi misusu wandi.

⁴⁴ Kabogu amayenalonsanga o Mandagu maBibenguna o Judee.