Luke 21 - La Sainte Bible en Langue Yipunu

Muensili umukuili

¹ Jesus anobuaga misu amalaba bisina abimapodula miensili miogu mu yisuegulu yimbongu.

² Amalaba yijaga yimukuili wandi ayimasunsa mikuti mibeji.

³ Kabogu amavosa rie: Ngensa nyidutsinguli rie: Yijaga yieyiyi yimukuili atsipodula uviolila botsu basusu.

⁴ Botsu bana batsivega atsitsisialulu banomana nsala tsiogu tumba jandi atsivega tsiotsu atsibetsi nandi.

Jesus ubiga ebiyi nana Ndagu Nsambi jiupansiyila

⁵ Batu bamosi bamasimina Ndagu Nsambi na mamanyi na bima abimavagulu ombu Nsambi. Mbana Jesus amavosa rie:

⁶ O gusu biotsu abi duilabi namunyi dugomuebilaba. Vagosiala ne dimanyi dimosi va julu dimanyi nandi; biotsu biupansiga.

Maguga na makuana

⁷ Bamamuwivula rie: Mulonsi, mambu meni temu yi mobila? Yilimba yi yiulasa yiri mambu meni mamalabana?

⁸ Jesus amagabusila rie: Kebananu, duyadunsu! Bapuela boruga mu diina diami novosa rie: Nyiji Christ! Temu jika bebeli. Duyabaduka.

⁹ Ava dugululu mavita mamafunanga na nguba tsivu va gari bisi dilongu na bisi dilongu disusu duyalaba keri mu mbari vengu mambu meni moleba. Tumba disukusulu digoba mu temu eni.

¹⁰ Mbana amabatsingula rie: Bisi dilongu dimosi botoga na bisi dilongu disusu; bakaga botoga na bakaga basusu;

¹¹ voba masisana maneni mabutamba mu biari biotsu na bivunga na dungosu dunsala; voba bimaga bineni na bilimba bineni abiruyili o julu.

¹² Tumba nesi mambu meni makaba bodusikiga o tsugu; bodubega va gusu bakaga na va gusu bivunda bimalongu mu diambu didiina diami.

¹³ Mu motsu mana dudila temu usamuna Musamu Uboti.

¹⁴ Sunsanu mirima, duyaletasa adi duwagula va temu eni.

¹⁵ Vana diweru dieni nyuduvega posulu na diela abiukambisa batu abeduvini.

¹⁶ Bataji na banguji nesi baana banguji nesi biburu bienil nesi bambatsi bodufunda; boduwakisa ombu bango dikasi na boboka bamosi va gari enu.

¹⁷ Botsu boduvina mu diambu didiina diami.

¹⁸ Tumba vagotsiemuga ne dunanga dumosi mu miuru mienu.

¹⁹ Waranu na dudila monyu.

Jesus ubiga ebiyi nana Jerusalem jiupansiyila

²⁰ Ava dulabila yiri mabadi mamakanda Jerusalem, jabanu yiri dubungu duuonyi duka bebeli.

²¹ Mbana aboba o Judee barini o mikongu na aboba va gari Jerusalem bapali na aboba mu misiru bayagabuga o musiengi.

²² Mu mbari mukilu ulabana mu temu eni, udugusu motsu amamasonugu mu Bisonu.

²³ Ka muna maguga ma bagetu aboba na mimi bolaba! Ka muna maguga ma abonuisanga mabenyi bolaba mu temu eni! Bulongu buebubu buba yika maguga na maguga na kabu Nsambi jiulasu ombu batu bebaba.

²⁴ Jogu boboku na dijenga na banokotusu o tsugu bobegu o malongu motsu na abagaa baJuif bosumuna Jerusalem te na temu ogu jiusuka.

Durugu duMuana Mutu

²⁵ O julu, wisi na tsungi na bambuelili biulasa bilimba. Va butamba mubu na mualu ubukanyi biulasa malongu masusu goma.

²⁶ Babaala bobakama mirima ava bovivila adiuruga va butamba mu mbari mangolu majulu molabana.

²⁷ Mbana bolaba Muana Mutu eruyi na mangolu na bundumba va gari mamungi.

²⁸ Ava mambu meni molabinina, sungamanu na sangilanu mu mbari dugobutsu duenu duka bebeli.

Nongu jimumanga

²⁹ Mbana Jesus amababuayila nongu ejiji rie: Gengilanu mumanga na miri misusu.

³⁰ Yika miwansi duijabi yiri mfula yika utuba.

³¹ Munongu mosi ava duilabili mambu meni, jabanu yiri Durumu duNsambi duka bebeli.

³² Ngensa nyidutsinguli rie: Dukula duedudu dugolefu te na motsu mana molabana.

³³ Julu na butamba biutsiemuga tumba mambu mami magotsiemuga via!

Moganganu

³⁴ Lubuganu! Duyatsoga na milambu na malangi na mambu mabulongu buebubu vo yilumbu yieni yiudukambisa.

³⁵ Batu bosutusu va yilumbu yieni munongu mosi nana banyama bamamba bosutusulu na mbusa.

³⁶ Kabogu moganganu nosambilanga temu tsiotsu yiri duba na mangolu urina motsu amoba na duba na mangolu ulabana na MuanaMutu.

³⁷ Bilumbu bieni biotsu Jesus amaviosa nyangu uyenalonsa o Ndagu Nsambi tumba ava mukolu amayesiliminanga o mukongu umiOlive.

³⁸ Muna kedi batu bamamurasuna o Ndagu Nsambi.