Luke 20 - La Sainte Bible en Langue Yipunu

Musuga uJesus agunyi uiruyisini?

¹ Bivunda bibavagulitsi bapagu na milonsi mimigaga na bivunda bisusu bamawenda ombu Jesus yilumbu yimosi ava amalonsila batu na ava amasamunina Musamu Uboti o Ndagu Nsambi.

² Bamamuwivula rie: Agunyi guidilili musuga uvaga mambu memama? Anyi amaguvega musuga egugu? Tutsinguli.

³ Jesus amabagabusila rie: Menu wami nyuduwivula yivu.

⁴ Nsingulianu anyi amasindiga Jean ubatisa? Nsambi vo batu?

⁵ Tumba bamavosa joʼ beni na joʼ beni rie: Pa tuwagula rie: Nsambi amamusindiga otuwivula rie: Dibandu yi dusamamuvayila yitu?

⁶ Pa tuwagula rie: Batu bamamusindiga, botsu botutinda mamanyi mu mbari bejabi yiri Jean amaba mubiyitsi.

⁷ Kabogu bamawagula rie: Tugejabi omamusindiga.

⁸ Jesus amabatsingula rie: Kabogu menu wami ngodutsingula agunyi nyidilili musuga uvaga mambu memama.

Nongu jifumu nungi na basalitsi bandi

⁹ Mbana Jesus amabuayila batu nongu ejiji rie: Dibaala amavara nungi, amajisila ombu basalitsi mbana amawenda o ulinga; amayetsinga.

¹⁰ Mu temu dutsonsugu amasindiga musalitsi ombu basalitsi beni uyebonga dikabu diandi. Bamadimba musalitsi na bamamugabusa miogu na miogu.

¹¹ Amamuesindiga musalitsi ususu; bamamudimba nomusienga na bamamugabusa miogu, na miogu.

¹² Kabogu amasindiga agumurieru na bamamunemisa mapura na bamamubinga.

¹³ Fumu nungi amawivula rie: Yi nyuvaga? Nyusindiga muana ami udurondu, tanguji bomuyitsa.

¹⁴ Tumba ava bamamulabilila bamavosa joʼ beni na joʼ beni rie: Labanu mubongitsi udisiala; tumubokianu yiri disiala diuba adietu.

¹⁵ Bamamubinga na bamamuboka. Mbana Jesus amawivula rie: Fumu nungi yi obavayila?

¹⁶ Jandi oruga na oboka basalitsi beni na ovega nungi ombu basusu. Batu banogulu dionyi bamawaka rie: Tsatsabi, digorungula uba nana?

¹⁷ Tumba Jesus amabagengila yisuisu novosa rie: Ka pindiyilianu Bisonu abimasonugu rie: Dimanyi adimabuagu na barungitsi divu tindi adiviolila ubueji.

¹⁸ Uotsu oberuga va dimanyi dieni otsunguga na jandi o dimanyi dieni diubonduyila ogesumuga.

Bivu mu diambu dilepu

¹⁹ Bivunda bibavagulitsi bapagu na milonsi mimigaga mbe baronda umusikiga tumba bamaduma batu; bamajaba yiri Jesus amabatsokila na nongu eni.

²⁰ Bamakela diweru diwelimina mbana bamatinda batu abamavaga nderi bavu batu baboti. Bamalega Jesus na posulu tsiandi yiri bogulu mambu mawelimina umufunda ombu yivunda yibulongu.

²¹ Batu beni bamavosa nandi rie: Mulonsi, tuijabi yiri ama guivosi na ama guilonsi mavu mangensa. Tuijabi yiri gugegengili buneni bumutu nana mutu mutu etasili tumba guilonsi duganu aduvu na Nsambi ombu mutu uotsu.

²² Letutsingulati, divu diwelimina yiri jetu tufuta dumandu ombu kaga?

²³ Jesus anojaba yiri diela besoyi amawaka rie:

²⁴ ndasianu dubongu. Yigolini yinyi na bisonu binyi bivu muna? Bamawaka rie: Kaga!

²⁵ Mbana amabatsingula rie: Kabogu veganu abi kaga ombu kaga na abi Nsambi ombu Nsambi.

²⁶ Bamakambulu na kabusulu tsiandi; basamarungula umuvega mbela na posulu tsiandi kabogu bamavola sui.

Bivu mu diambu didurambugu duabafu

²⁷ BaJuif bamosi abamaba baSadducee bamawenda ombu Jesus. (La jogu abevosi yiri abamafu bagorambuga.)

²⁸ Bamavosa nandi rie: Mulonsi, Moise amatusila diruma diedidi rie: Pa mutu amafu nosila mugatsi agusakabura na kala, muana nguji andi amuweli yiri baburili mutu agumafu baana.

²⁹ Vamaba yisambuali yibaana banguji. Agutega amawela na amafu tsiri ubura baana.

³⁰ Agumubeji amabialila mukuili, aguna anofu

³¹ agumurieru amamubialila. Dimaba munongu mosi te na yisambuali yiotsu bamafu tsiri ubura baana.

³² Mbana mugetu wandi amafu.

³³ Kabogu ava durambugu duabafu mugatsi nyi oba? Asamaba mugatsi uyisambuali yiotsu?

³⁴ Jesus amabagabusila rie: Batu batemu ejiji bewelisini

³⁵ tumba abavu bawelimina urambuga o dufu bagomuewelasana.

³⁶ Bavu nderi biansa, bagorungula ufu, baji baana baNsambi mu mbari bamarambuyila o dufu.

³⁷ Mbana mu diambu didurambugu duabafu ne Moise amadijabisa ava amasonina diambu diyivala. Vana mbura eni enengili Fumu rie: Nsambi Abraham na Nsambi Isaac na Nsambi Jacob.

³⁸ Ngensa Nsambi agaa Nsambi jiabafu tumba avu Nsambi jiabavu monyu mu mbari ombu gandi botsu bavu monyu.

³⁹ Milonsi mimigaga mimosi bamavosa nandi rie: Mulonsi, gutsiwagula buranga.

⁴⁰ Basamamueba na bukidi umuwivula bivu bisusu.

Jesus na David

⁴¹ Jesus amabawivula rie: Dibandu yi bevosili yiri Christ aji mutegula uDavid.

⁴² David jaʼ beni evosi mu dibuku dinyimbu rie: Fumu amavosa na Fumu ami rie: Ndeʼ tsana va mabaala mami

⁴³ te na nyusunsa batu abeguvini o tsi durumu duagu.

⁴⁴ Kabogu David amamunengila Fumu. Tsie Christ orungulila uba mutegula andi?

Malubu mu diambu dimilonsi mimigaga

⁴⁵ Batu botsu bamaba vana ava Jesus amavosila na badukitsi bandi rie:

⁴⁶ Lubuganu mu diambu dimilonsi mimigaga abelingi na bilinga bisakama uyenavegu mambolu mu migungi. Berondi bitsiga bibatu baneni o Mandagu maBibenguna nesi o milambu.

⁴⁷ Ne bediongi bakuili, adina digebakambisi usambila tsambu tsiogu tsisakama. Ka muna mukilu gu bokilusu!