Luke 2 - La Sainte Bible en Langue Yipunu

Duburu duJesus

¹ Mbana kaga Auguste amaruma yiri botsu abamatsana mu bufumu buandi basansumu.

² Sansama jitega jimaba mu temu Qurinius amabila yivunda yibulongu buSyrie.

³ Botsu bamawenda uyesonu, mutu mutu amasonu mu musiengi andi.

⁴ Joseph wandi amarambuyila o Nazareth musiengi uGalilee, uwenda o Judee o Bethleem musiengi uDavid mu mbari amaba mu yifumba na mu mukuta uDavid.

⁵ Amayesonugu na mugatsi andi Marie omaba na dimi.

⁶ Ava bamabila vana, diweru diMarie dimatola

⁷ na amabura tsomi andi dibaala. Amamupieta va tsanda na amamusiliga mu yidu ayi bibulu bejangingi; diwendi rie: basamadila mbura o ndagu benyi.

Babungulitsi babindombu na biansa

⁸ O yiari yieni umaba babungulitsi babindombu abamayelungu mu musiru ukelisa migamba miogu.

⁹ Sundila yiansa yiFumu yimalabana nogu na bundumba buFumu bumalabana nana yijalala ayimabalulila yiari na yiari. Bamaregama na goma.

¹⁰ Tumba yiansa yimabatsingula rie: Duyalaba goma! Nyina musamu uboti agulasa batu botsu ubueji.

¹¹ Mukolu egugu o musiengi uDavid, dumaburulu Mugobutsi aguvu Christ, jandi la Fumu.

¹² Guluanu yilimba ayi dumujabila; durasuna muana upietu va tsanda na usilugu mu yidu ayi bibulu bejangingi.

¹³ Sundila yinombu yineni yibiansa yimarasuna yiansa, yimayitsa Nsambi novosa rie:

¹⁴ Bundumba ombu Nsambi aguvu o julu na duvotsu ombu bisi tsi abemulasi ubueji.

Babungulitsi babindombu uwenda bewendi o Bethleem

¹⁵ Ava biansa bimabasilila ugabuga o julu babungulitsi babindombu bamavosa joʼ beni na joʼ beni rie: Tʼwendianu o Bethleem, tuyelabanu adimalabana guna adi Fumu amatujabisa.

¹⁶ Kabogu bamawenda mbangu mbangu na bamarasuna Marie na Joseph na muana kali usilugu mu yidu ayi bibulu bejangingi.

¹⁷ Banomulaba, bamavosa adi yiansa yimabatsingula mu diambu dimuana.

¹⁸ Botsu bamakambulu ava bamagululu misamu mibabungulitsi babindombu.

¹⁹ Marie amarangiminanga mambu meni motsu na amamatasanga.

²⁰ Babungulitsi babindombu bamayenagabuga. Bamayenadodisanga Nsambi mu mbari ama bamagulu nolaba mamaba nana bamatsingululu.

Bamaluga Jesus

²¹ Yilumbu yimunana ayi muana amarebulu bamamuluga Jesus, diina adi yiansa yimabatsingula ne Marie akasama.

Jesus amawakusu ombu Fumu

²² Bilumbu biduliomusu binovioga nana dimarumunu mu mugaga uMoise, Joseph na Marie bamabega muana o Jerusalem umuwakisa ombu Fumu.

²³ Agumasonu agugu rie: Tsomi tsiotsu tsibabaala tsiuwakusu ombu Fumu.

²⁴ Va julu vana bamaronda udugusu mugaga agumasonu rie: Vagula pagu tsimakunda mabeji vo baana babeji bamabembi.

²⁵ O Jerusalem umaba mutu diina diandi Simeon, amaba usungama na uwelimina va gusu Nsambi na amavivanga dugobutsu duIsrael. Yinyunyi yiNsambi yimaba nandi.

²⁶ Amamutsingula rie: Gugolefu te na gulaba Christ agu Fumu osindiga.

²⁷ Kabogu anosindugu na Yinyunyi yieni amawenda o Ndagu Nsambi vana diweru dieni adi taji na nguji bamaruga na Jesus uyemureba udugusu mugaga.

²⁸ Simeon amabonga Jesus va tulu na amayitsa Nsambi novosa rie:

²⁹ Fumu namunyi gurungula unsingisa uwenda na murima usunda.

³⁰ Adi gumavangana dimalabana. Namunyi nyimalaba aguba Mugobutsi,

³¹ agu gumakunsila batu botsu:

³² aguvu yijalala ayiumonitsa batu botsu nsila novega bundumba ombu batu bagu baIsrael.

Mbigulu jiSimeon

³³ Taji andi na nguji bamakambulu puela ugulu ama Simeon amavosa mu diambu dimuana.

³⁴ Simeon amabagabila miula na amalubusa Marie rie: Muana egugu amasolu na Nsambi yiri osundusa batu baIsrael bapuela nomatisa basusu.

³⁵ Va julu vana jandi oba mulubusitsi agu batu bapuela bogelanga nolasanga ubiva umirima miogu. Na ndeʼ beni mugetu gulaba tindi munyongu mu diambu diandi.

Mubiyitsi umugetu

³⁶ Vamaba mubiyitsi umugetu diina diandi Anne, muana uPhanuel jimukuta uAsser. Amaba yinunu; amatsana yisambuali yibilima na mulumi agumamuwela va bungebi buandi

³⁷ mbana amatsana magumidunana mabilima yika mukuili. Asamamuepala o Ndagu Nsambi; nyangu na mukolu amayitsanga Nsambi na va julu vana amabusanga uji temu na temu ukevega usambilanga.

³⁸ Anobarasuna vana amasundila ugabusila Nsambi diboti na amavosa mambu mandi ombu botsu abamavivanga dugobutsu duJerusalem.

Bamagabuga o Nazareth

³⁹ Joseph na Marie banodugusu migaga miotsu miFumu bamayenagabuga o musiengi ogu o Nazareth o Galilee.

⁴⁰ Muana amabanguga na amawara, amaba na diela na miula miNsambi mimabanganga nandi.

Jesus ava amabila digumi na bilima bibeji amasiala o Ndagu Nsambi

⁴¹ Yilima na yilima taji na nguji Jesus bamawendanga o Jerusalem ukelisa feta Paque.

⁴² Yilima ayi Jesus amaba digumi na bilima bibeji, bamawenda o Jerusalem munongu mosi nana va kala.

⁴³ Bilumbu bifeta binosuka, bamayenagabusila tumba Jesus amasiala o Jerusalem. Taji andi na nguji basamadijaba.

⁴⁴ Bamatasa yiri Jesus amaba nogu mu yinombu kabogu wisi unotsima bamabanda umuromba va gari biburu biogu ne va gari bambatsi bogu.

⁴⁵ Tumba basamamulaba kabogu bamagabusila o Jerusalem umuromba.

⁴⁶ Bilumbu birieru binovioga bamamurasuna o Ndagu Nsambi, amaba atsana va gari milonsi amimaba baJuif. Amaba liyiyi ugulu malongi mogu nobawivula bivu.

⁴⁷ Botsu abamamugulu bamakambulu na diela diandi na kabusulu tsiandi.

⁴⁸ Ava taji andi na nguji andi bamamulabila bamakambulu puela na nguji andi amamuwivula rie: Muana ami, dibandu yi gutsituvayila nana? Labati, jetu na taji agu tuigurombi na keri.

⁴⁹ Amabawaka rie: Dibandu yi duitombili? Dugejabi yiri vengu nyusala bisalu biTaji ami?

⁵⁰ Tumba basamatsiyisa divindugulu didiambu dieni.

⁵¹ Amagabuga nogu o Nazareth na amabadedilanga. Nguji andi amarangiminanga mambu meni motsu na amamatasanga.

⁵² Jesus amanega na diela diandi dimafunanga; amaba uwelimina va gusu Nsambi na va gusu batu.