Luke 16 - La Sainte Bible en Langue Yipunu

Nongu jimusalitsi agumasoga diela

¹ Jesus amatsingula badukitsi bandi rie: Vamaba yisina na batu bamamutsingula rie: Musalitsi agu amanyambasana busina buagu.

² Yisina amamunengila na amamuwivula rie: Diambu yi nyigulu divu nagu? Ndasi nana guisalili yisalu yiagu mu mbari gugaa uwelimina ukelisa biami.

³ Musalitsi amatasa rie: Fumu ami ekusuli yisalu, yi ngavaga? Usala mutsaku? Ngorungula! Uvonda? Yika yisonyi!

⁴ Nyijabi adi nyuvaga yiri ava nyugusululu yisalu nyudilu na batu o mandagu mogu.

⁵ Amanengila mutu mutu agumaba na muganu na fumu andi. Amawivula agutega rie: Kwe guisombi ombu fumu ami?

⁶ Amawaka rie: Kama mirega mimatsi. Amamulonsa rie: Laba muganda agu, ka tsana, sona magumaranu.

⁷ Amamuewivula ususu rie: Ndeʼ kwe guisombi? Amawaka rie: Kama yiranu tsisaku tsiuresi. Amamulonsa rie: Laba muganda agu; sona kama jina.

⁸ Fumu anolaba nana amasoyila diela amamudodisa. Bisi tsi bana malubu uviolila abamagobulu.

⁹ Jesus amabuesa rie: Kabogu nyidutsinguli rie: Salisanu busina buenu udila bambatsi yiri ava busukila dudilu na nsangu o julu.

¹⁰ Jandi ojivu asigama na mambu mageyi osigama na mambu maneni wandi; jandi oyidiongi mua pesu odionga puela wandi.

¹¹ Kabogu pa dusamaba basigama na mambu mambongu anyi oduvega tindi busina?

¹² Pa dusamaba basigama na bima bingana anyi oduvega abienu?

¹³ Vagaa musalitsi ne umosi agurungula usalila fumu beji, diwendi rie: ovina fumu mosi noronda jisusu; oyitsa fumu mosi nolensa jisusu. Dugorungula usalila Nsambi na mbongu.

Malongi masusu maJesus

¹⁴ Ava baJuif abamaba baPharisie bamagululu mambu meni motsu bamakema Jesus mu mbari bamaronda mbongu.

¹⁵ Jesus amavosa nogu rie: Duikelasa va misu mabatu yiri duji batu baboti tumba Nsambi ejabi mirima mienu. Adidodusu na batu digaa na tsongu va gusu Nsambi.

¹⁶ Va dibandu dumadila migaga miMoise na miganda mibabiyitsi mbana Jean amalabana. Ubongila va temu eni Musamu Uboti uDurumu duNsambi umasamunu na mutu mutu egalini udujaba.

¹⁷ Tumba ne pa julu na butamba biutsiemuga migaga miotsu miuba nana mivu.

¹⁸ Uotsu aguigusuli mugatsi andi nowela ususu evayi bumbembu na uotsu aguiweli mugetu agumagusulu na mulumi andi evayi bumbembu.

Yisina na Lazare

¹⁹ Vamaba yisina ayimaduaranga tsanda tsibenga na tsidumbulu na amalabanga nsangu bilumbu biandi biotsu.

²⁰ Vamaba yijaga wandi diina diandi Lazare. Bamamusunsanga va gusu kana yisina yiri tanguji obolanga bikukuku abibonduyi va tavula andi.

²¹ Ne bamondi bamamuvendanga mapura.

²² Yijaga anofu amabegu o julu na biansa uyetsana va tulu Abraham. Yisina amafu wandi na bamamutsiga.

²³ Yisina amalabanga maguga o mbura aji abafu bavu; anobuaga misu amalabilila Abraham o vala na Lazare va tulu andi.

²⁴ Amagamuga rie: Tata Abraham, ndasi yingeba! Sindiga Lazare ombu gami! Musingisi yiri oputiga kodu mulembu andi mu mamba nopotsa dulimi. Ngorungula uwarila maguga mamuji egugu.

²⁵ Abraham amamugabusila rie: Muana ami, vengu gurangimina yiri ava gumabila o tsi gumalabanga yika ubueji nobueji na Lazare amalabanga yika maguga na maguga. Tumba namunyi ubueji umavinga ombu gandi na ndeʼ guilabi maguga.

²⁶ Va julu vana va gari jetu nenu va mbengi jineni na jogu aberondi uvioga bagorungula.

²⁷ Yisina amavosa rie: Kabogu tata Abraham sindiga Lazare o ndagu taji ami

²⁸ mu mbari nyikivu na baana banguji baranu. Awendi uyebalubusa yiri jogu wogu bakeruga o mbura ejiji jimaguga.

²⁹ Abraham amamugabusila rie: Jogu bana mambu maMoise na mababiyitsi amebalubusi; bamagulu.

³⁰ Yisina amavosa rie: Nesi, tata Abraham, tsiʼ nana! Mutu agumalefu awendi ombu gogu mbana bokalula diela.

³¹ Abraham amamutsingula rie: Pa jogu bagegulu mambu maMoise na mababiyitsi bagogaru ugulu ne mutu agumarambuga o tsi dufu.