Luke 13 - La Sainte Bible en Langue Yipunu

Kalulanu diela

¹ Mbana bamosi bamatsingula. Jesus rie: Pilate amabokisa bisi Galilee ava bamavagulila pagu ombu Nsambi.

² Jesus amabawaka rie: Duitasi yiri bisi Galilee beni abamaboku nana bamaba bavayitsi bamasumu uviolila bisi Galiiee botsu basusu?

³ Padukasi nana dumadunsu. Nyidutsinguli rie: Pa dugokalula diela jenu botsu dufu nana jogu bamafuila.

⁴ Yika tsie na digumi na yinana yieni abamafu ava bamavikulu na yibaga yiSiloe? Duitasi yiri jogu bamaba bavayitsi bamasumu uviolila bisi Jerusalem botsu?

⁵ Pa duitasi nana dumadunsu. Nyidutsinguli rie: Pa dugokalula diela jenu botsu dufu nana jogu bamafuila.

Mumanga agugaabura

⁶ Mbana Jesus amababuayila nongu ejiji rie: Mutu amaba na mumanga o dikusa diandi. Amawenda uyedokula mimanga tumba asamadila ne umosi.

⁷ Mbana amavosa na musalitsi rie: Labati bilima birieru bikavu abi nyiruyingi udokula mimanga mu mumanga egugu tumba ngedili ne umosi. Mu mbari yi uiveyili fuyi? Wanga!

⁸ Musalitsi amamugabusila rie: Fumu, legusilati ne yilima yieyiyi; nyufutsa biari biotsu na nyusobana butamba budibumbu muna.

⁹ Tanguji ubura yilima ayiuruga; pa ugobura tukawanga.

Jesus ubelusa ebelusi mugetu yilumbu yitsona

¹⁰ Tsona mosi Jesus amalonsa o Ndagu Yibenguna.

¹¹ Vamaba mugetu vana agumabelanga; amabana yinyunyi yibi ayimamurungiganga digumi na yinana yibilima.

¹² Jesus anomulaba amamunengila na amamutsingula rie: Bubomfi buagu bumagusulu.

¹³ Jesus amamusakiga miogu na vana vana amanotuga na amadodisa Nsambi.

¹⁴ Tumba yivunda yiNdagu Yibenguna amanyoga mu mbari Jesus amamubelusa yilumbu yitsona. Amavosa na batu rie: Vavu bilumbu bisiamunu abivu biwelimina usala. Kabogu ruganganu uyibelusungu bilumbu bieni tsiri yilumbu yitsona.

¹⁵ Jesus amamuwaka rie: Ka muna yijaku yi! Jenu botsu dugepalisi bangombi benu vo baburu uyebanuisa yilumbu yitsona?

¹⁶ Na labatianu mutegula agugu uAbraham, Satan amamukelisa muviga digumi na yinana yibilima; mbe ayapalusu yilumbu yitsona?

¹⁷ Jesus anowagula nana abamamutsoyisa bamalaba yisonyi tumba basusu bamalaba yika ubueji na ubueji na bisalu biandi biboti.

Nongu jitsangu jimutarada

¹⁸ Jesus amawivula rie: Durumu duNsambi tsie dubila? Na yima yi nyudubagusunu?

¹⁹ Duibagunu na tsangu jimutarada aji mutu amavara o nungi andi; yivaru yibendi na yineyi te na yibi yika muiri uneni na batsoli berungi muva muna.

Nongu jidufunusu

²⁰ Jesus amamuewivula rie: Yima yi nyubagusunu na Durumu duNsambi?

²¹ Duibagunu na dufunusu adu mugetu amasobana na bietsu birieru bifufu umatisa dituka diotsu.

Munu ndagu ubandana

²² Ava Jesus amabila mu nsila uwenda o Jerusalem amasisikamanga o misiengi nesi o mimbu uyenalonsanga.

²³ Mutu amamuwivula rie: Fumu batu abogobulu yika mua pesu buandi? Jesus amagabusila rie:

²⁴ Galananu ukota mu mbari munu ndagu ubandana; bapuela boronda ukota tumba bagorungula.

²⁵ Fumu ndagu orelama nobindiga ndagu. Jenu aduvu va gusu kana dudukisa novosa rie: Fumu, tudibulili. Oduwagula rie: Ngejabi agu duiruyisini!

²⁶ Mbana dumutsingula rie: Jetu tumaji na tumanu nagu na gumalonsa o musiengi etu.

²⁷ Omueduwagula rie: Ngejabi agu duiruyisini. Gusuganu vana jenu bavayitsi bamasumu botsu.

²⁸ Dulila na dunyonga ava dulabila yiri Durumu duNsambi dumavegu ombu Abraham na Isaac na Jacob na babiyitsi botsu tumba jenu duduwimunu.

²⁹ Abotsana va tavula va mosi na Fumu boruyila o yiari ayi wisi epalili no yiari ayi wisi ewendisini no banda no tandu.

³⁰ Bapuela abavu baneni namunyi boba bageyi na bapuela abavu bageyi namunyi boba baneni o gusu.

Jesus na Jerusalem

³¹ BaJuif bamosi abamaba baPharisie bamaruga ulubusa Jesus rie: Gusuga vava mu mbari Herode erondi uguboka.

³² Amabagabusila rie: Wendanu notsingula ndetsi eni rie: Laba nyipalisi binyunyi bibi na nyibelusi bibedu namunyi na mugesa mbana mu yilumbu ayimurieru nyumana yisalu.

³³ Tumba uwenda nyiwendi namunyi na mugesa na muna mosi; mu mbari digaa diwelimina yiri mubiyitsi ofuila o yiari yisusu yika o Jerusalem.

³⁴ Jerusalem, Jerusalem! Duiboki babiyitsi na duitindili bilumbi biNsambi mamanyi! Ngorungula udutsingula kumbu kwe mbe nyironda udugukiga nana koku egukiyili baana bandi o tsi mapapi tumba dusamagaru!

³⁵ Kabogu ndagu enu jiusiala mududu. Jabanu rie: Dugondaba te na temu aji duvosa rie: Nsambi agabili jandi oyiruyi na diina diFumu miula!