Luke 11 - La Sainte Bible en Langue Yipunu

Malongi maJesus mu diambu dudusambu

¹ Yilumbu yimosi Jesus anomana usambila mudukitsi andi umosi amavosa nandi rie: Fumu, ralonsi usambila nana Jean amalonsila badukitsi bandi.

² Jesus amabalonsa rie: Ava duisambilili vosanu rie: Tata, diina diagu dibi yingitsi; durumu duagu duruyi.

³ Tuveyi namunyi biguji biyilumbu yieyiyi.

⁴ Tutandi masumu metu mu mbari jetu wetu tuitandi uotsu aguituvayili mabi; tuveyi mangolu urina mbangulu

⁵ Jesus amamuevosa na badukitsi bandi rie: Yika tsie pa umosi va gari enu owenda o ndagu mbatsi andi va gari mukolu novosa nandi rie: Kokolu, nsombisi mapa marieru.

⁶ Nyimadila muenyi na ngaa na biguji umuvega.

⁷ Yika tsie pa mbatsi owagula rie: Wendanga nyimakebindiyila ndagu. Jetu na baana tumasilama, ngomuerungula uguvega biguji.

⁸ Dimosi nyijabi, agosimbuga ugugabila mu diambu didinonga tumba osimbuga noguvega motsu mawelimina mu mbari guimuvondingi na yisuebiri.

⁹ Menu nyidutsinguli rie: Vondanganu na duvegungu; rombanganu na dulabanga; dukisanganu na dudibululungu.

¹⁰ Mu mbari uotsu oyivondingi edilingi, oyirombingi elabingi na bedibulilingi oyidukisingi.

¹¹ Jenu bataji, duvega muana ngongula pa evondi nyama mamba?

¹² Pa evondi dikeji gumuvega kuru?

¹³ Lesa jenu babi duijabi uvayila baana benu maboti tambusa na Taji aguvu o julu! Agovega Yinyunyi yiandi ombu botsu abemuwivuli?

Jesus amawagula abemufuengilili

¹⁴ Jesus amapalisa yinyunyi yibi ayimarombisa dibaala bubaba. Yinyunyi yibi yinopalusu dibaala amavosa; batu bapuela bamakambulu.

¹⁵ Bamosi bamavosa rie: Beelzebul, yivunda yibinyunyi bibi emuveyi mangolu ubipalisa.

¹⁶ Basusu bamaronda umuweliga kabogu bamamuwivula ubalasa yimaga yiNsambi.

¹⁷ Jesus anojaba matasa mogu amavosa nogu rie: Dilongu diotsu adi batu betoyi joʼ beni na joʼ beni diutsiemuga, mukuta uotsu aguvu na burandu utsiemuga.

¹⁸ Kabogu pa durumu duSatan eni duvu na dupasu dugotsiemuga? Jenu duivosi yiri nyipalisi binyunyi bibi mu mbari Beelzebul epeyi mangolu.

¹⁹ Kabogu kwagulianu, pa menu nyibipalisi nana, badukitsi benu yika tsie bebipalisili? Labanu badukitsi benu bedulasi yiri duna mbela.

²⁰ Nyipalisingi binyunyi bibi na mangolu maNsambi, adina dilasi yiri Durumu duNsambi dumakejabununu.

²¹ Pa dibaala ana bitogulu ekelisi ndagu andi na bima biandi bigaa na diambu.

²² Tumba yiotsu ayi dibaala disusu adivu na mangolu emuviolili, emupatuli bitogulu abi amalevayila yitu na biandi biotsu biukindu.

²³ Jandi ogaa nami ana kueru nami na jandi ogesali va mosi nami ebivisi yisalu.

Dugabugu duyinyunyi yibi

²⁴ Ava yinyunyi yibi yipalili mutu, yilingingi o yiari ayigaa na mamba uyenarombanga mbura utsanina. Pa jandi agejidili evosi rie: Nyulegabuga o ndagu aji nyimapalila.

²⁵ Kabogu egabuyi o ndagu jigombulu na jiminsu.

²⁶ Mbana egungi yisambuali yibinyunyi bisusu abibiva uviolila jandi uyetsana va mosi nandi. Nsanunu jiusita jimutu eni jimaviolila ajitega ubiva.

Ubueji aguvu ungensa

²⁷ Jesus anomana uvosa mambu meni mugetu amagamuga rie: Ka muna ubueji gu uvu na mugetu agumagubura na agumaguvega mabenyi!

²⁸ Tumba Jesus amawagula rie: Nesi, tsiri nana! Ubueji uvu na jogu abegulu mambu maNsambi na bemadedili!

Yilimba yimawivulu

²⁹ Batu banogungasana bapuela, Jesus amabuela rie: Ka muna dibi di divu na batu batemu ejiji! Bekeli yilimba tumba bagolaba yilimba yisusu yika ayi Jonas mubiyitsi.

³⁰ Nana Jonas amabila yilimba ombu bisi Ninive, munongu mosi Muana Mutu oba yilimba ombu batu batemu ejiji.

³¹ Mu yilumbu yimufundu kaga jimugetu ajimaruyila o tandu oba na musuga ufuengilila batu batemu ejiji. Jandi amaketsoyisa na mulingu uneni tsiri mu disusu yika ugulu malongi madiela diSalomon; na avava va gari enu vavu oyiviolili ne Salomon.

³² Mu yilumbu yimufimdu bisi Ninive bodufuengilila mu mbari ava bamagululu malongi maJonas bamakalula diela; na avava va gari enu vavu oyiviolili ne Jonas.

Yijalala yidunyuru

³³ Mutu agebangisi paga ujisuega vo ujisunsa o tsi ponsi tumba ejisunsi va mbura jiwelimina yiri ava batu bokotila bolaba yijalala.

³⁴ Misu la yijalala yidunyuru. Pa misu magu magaa na dimungi guilabi yijalala tumba yiotsu ayi misu mavu na birieri yika pisama na pisama.

³⁵ Kabogu kebana yiri yijalala yigotsima te na guba o tsi pisama.

³⁶ Munongu mosi nana paga jimonitsiii mbura tsiotsu utsiemusa pisama, yijalala ayivu nagu yiurungula utiemusa pisama tsiotsu.

Jesus ufuengilila efuengilili baJuif abamaba baPharisie na milonsi mimigaga

³⁷ Jesus anomana uvosa, muJuif agumaba muPharisie amamunengila o uji; anokota amasundila utsana va tavula.

³⁸ MuPharisie anolaba yiri asamagolila mamba amakambulu.

³⁹ Kabogu Fumu amamutsingula rie: Gulu nana jenu baPharisie duvu; duji nderi duisusi kopa na yipela yika o yijujulu tumba o gari tsienu dubasa na nsala udaga na mbivulu tsiotsu.

⁴⁰ Jenu bijaku duvu! Nsambi omasala yijujulu asamasala o gari wandi?

⁴¹ Kabogu abivu mu kopa tsienu na bipela bienu biveyianu ombu bijaga mbana duba dulioma.

⁴² Ka muna maguga ma jenu baPharisie dulaba! Duiveyi yimosi mu digumi mu miguba na milingidi na mu magaji mamunongu na munongu tumba duigungisi usungama na durondu duNsambi: amana ama mbe duivayi, tsiri ugungisa masusu.

⁴³ Ka muna maguga ma jenu baPharisie dulaba! Duirombi bitsiga bibatu baneni o Mandagu maBibenguna na duirondi uyitsu va misu mabatu.

⁴⁴ Ka muna maguga ma dulaba! Duji nana ngila atsivu o tsi biriri na batu betsitsiarili tsiri ujaba.

⁴⁵ Mulonsi umigaga umosi amamutsingula rie: Muionsi, ava guivosili nana guitulensi!

⁴⁶ Jesus amagabusila rie: Ka muna maguga ma jenu milonsi mimigaga dulaba! Duinangusi batu mifuna mitsira tumba duibusi ubamuna kata.

⁴⁷ Ka muna maguga ma dulaba! Duibumbi ngila tsibabiyitsi aba bataji benu bamaboka.

⁴⁸ Duji kingu mosi na bataji benu, bamaboka babiyitsi na duibumbi ngila tsiogu.

⁴⁹ La dibandu Nsambi amavosila rie: Nyubatindila babiyitsi na bilumbi; boboka bamosi na bokuana basusu.

⁵⁰ Batu batemu ejiji bokilusu mu diambu dibabiyitsi abamaboku ubanda va dibandu dibulongu,

⁵¹ ubongila na Abel te na Zacharie agumaboku va gari yinyensulu yipagu na Ndagu Nsambi. Nyiina, nyidutsinguli rie: Batu batemu ejiji bokilusu mu diambu dijogu botsu.

⁵² Ka muna maguga ma jenu milonsi mimigaga dulaba! Dumasuega tsafi diela ajivu jiwelimina udibula diguyi dindagu, diwendi rie: diela diotsu duisueyi. Jenu beni dugedirondi na duigandisi jogu abavu na nsala dionyi.

⁵³ Jesus anopala vana, milonsi mimigaga na baPharisie bamamunyonyila kabu jineni na bamamuwivula bivu bimunongu na munongu.

⁵⁴ Bamaronda umuweliga yiri bomufuengilila mamfurulu ava evosili.