Luke 10 - La Sainte Bible en Langue Yipunu

Jesus usindiga esindiyi magumidusambuali na badukitsi babeji uyenalonsanga

¹ Mbana Fumu amasola magumidusambuali mababaala na babaala babeji basusu. Amabasindiga babeʼ babeji o gusu andi o misiengi miotsu no mbura tsiotsu atsi mbe jaʼ beni olingula.

² Amabatsingula rie: Digumba divu dineni tumba basalitsi bagatsi udigumbiyila. Kabogu wivulanu basalitsi basusu ombu Fumu agudila digumba dieni.

³ Wendanu! Nyidusindiyi nderi duvu bindombu va gari baminsi.

⁴ Duyalinga na mbongu vo komi vo bapondu na duyaba na bitsiku mu nsila.

⁵ Mu ndagu tsiotsu atsi duikoti bagabilianu miula.

⁶ Pa mutu oyitsani vana esingi mula enu ka tsananu tumba pa atsibusa, mubusianu wandi.

⁷ Tsananu o ndagu eni; jianu na nuanu abi boduvega mu mbari musalitsi awelimina na futa andi. Duyaleba.

⁸ Mu misiengi miotsu ami bodudila jianu abi boduvega

⁹ na belusanu bibedu biogu na batsingulianu rie: Durumu duNsambi duka bebeli.

¹⁰ Tumba mu misiengi ami bagodudila, palanu va dulombili nowansa muansu rie:

¹¹ Tugomueruga va dimbu dienu tumba jabanu yiri Durumu duNsambi duka bebeli.

¹² Nyidutsinguli rie: Mu yilumbu yimufundu bisi musiengi eni bokilusu uviolila bisi Sodome.

Misiengi amimabusa ugulu

¹³ Ka muna maguga ma jenu bisi Chorazin dulaba! Ka muna maguga ma jenu bisi Bethsaida dulaba! Mbe bimaga abimavagu ombu genu bimavagu ombu bisi Tyr na bisi Sidon jogu mbe bamakalula diela nesi udiiara siela nogolana dibufu.

¹⁴ La dibandu mu yilumbu yimufundu jenu dukilusu uviolila bisi Tyr na bisi Sidon.

¹⁵ Jenu bisi Capernaum, dukematisa te no julu? Dusundusu, diwendi rie: dubuagu te na o mbura jiabafu.

¹⁶ Amavosa na badukitsi bandi rie: Jandi oyidugulu ekulu na jandi oyidubusi embusi; oyimbusi ebusi jandi omansindiga.

Magumidusambuali na babeji ugabuga begabuyi

¹⁷ Magumidusambuali na babaala beni babeji bamagabuga na nsangu jineni. Jogu rie: Fumu ne binyunyi bibi bitsitudedila ava tutsibirumina mu diina diagu.

¹⁸ Jesus amabatsingula rie: Nyimalaba Satan ava ebonduyili nana dusiemu.

¹⁹ Guluanu, nyimaduvega mangolu utsiarila banyoga na bakuru nesi ubetsa muvinitsi; vagaa diambu adiurungula udulasa maguga.

²⁰ Tumba duyalaba nsangu mu mbari binyunyi bibi bitsidudedila, labanu nsangu mu mbari miina menu mamasonugu o julu.

Jesus usangila esangili

²¹ Diweru dieni Jesus amagaangu na nsangu jineni ajimaruyila ombu Yinyunyi yiNsambi. Amavosa rie: Nyiguyitsi Tata, Fumu julu na butamba! Nyigabusili diboti mu mbari gumalasa mambu memama ombu bifufu na gumamasuega bango diela.

²² Nyiina, Tata ami amapega musuga uotsu. Ne mutu mosi agejabi nana Muana avu yika Tata na mutu agejabi nana Tata avu yika Muana na jogu aba jaʼ beni omujabisa.

²³ Jesutf amageluga ombu badukitsi bandi na amavosa fundu nogu rie: Ka muna ubueji gu jenu aduilabi mambu memama duilabi!

²⁴ Nyidutsinguli yiri babiyitsi bapuela na bakaga bamaronda ulaba ama jenu duilabi tumba basamamalaba; bamaronda ugulu ama jenu duigulu tumba basamamagulu.

Nongu jimuisi Samarie

²⁵ Mulonsi umosi umigaga amaronda uweliga Jesus kabogu amavosa rie: Mulonsi, yi nyuvaga udila monyu umutubu?

²⁶ Jesus amamuwivula rie: Diambu yi dimasonugu mu migaga? Yi guigulu ava guirangili?

²⁷ Amagabusila rie: Ronda Fumu Nsambi agu na murima agu uotsu na matasa magu motsu na mangolu magu motsu na ronda mutu nagu nana guikerondila.

²⁸ Jesus amamutsingula rie: Gutsiwagula buranga, vaga nana na gudila monyu.

²⁹ Tumba jandi amaronda ukevega ndunga kabogu amawivula Jesus rie: Mutu nami la nyi?

³⁰ Jesus amawagula rie: Mutu amarambuyila o Jerusalem uwenda o Jericho. Amagaangu na bikongu abamamuvula tsanda: bamamunemisa mapura; bamayenawenda na bamamusila afu.

³¹ Muvagulitsi upagu amavioga mu nsila eni, anomulaba amavioga kuasa.

³² Muisi Levi amatola va mbura eni anomugengila, jaʼ wandi amavioga kuasa.

³³ Muisi Samarie amalinga mu nsila eni wandi, anomurasuna vana amagaangu na yingeba.

³⁴ Amasusa mapura mandi na matsi na malamu na amamatunga. Mbana amamunangiga va julu yibulu yiandi; amamubega o ndagu benyi na amayemukelisa buranga.

³⁵ Ava kedi amavega fumu ndagu benyi mbongu na amavosa rie: Mukelisi buranga na atsi gufuta va julu nyugufutila ava nyuruyila.

³⁶ Jesus amamuwivula rie: Va gari jogu botsu barieru anyi amamulasa yiri aji mutu nandi?

³⁷ Mulonsi umigaga amawagula rie: Jandi omamuwamusa. Jesus amamutsingula rie: Wendanga, vaga munongu mosi.

Jesus ombu Marthe na Marie

³⁸ Jesus na badukitsi bandi bamamuelinga. Ava bamapalila va dimbu dimosi, mugetu, diina diandi Marthe amabadila o ndagu andi.

³⁹ Muana nguji andi Marie amatsananga yika utsana va gusu Fumu ugulungu mambu mandi.

⁴⁰ Marthe amalaba uvura mu mbari amaba na bisalu bipuela. Amawenda ombu Jesus novosa rie: Fumu, divu diwelimina yiri muana nguji ami ansili na bisalu biotsu? Mutsinguli akwamusi.

⁴¹ Fumu amamugabusila rie: Marthe, Marthe, guitsirisi murima na guiketsoyisa puela

⁴² tumba diambu dimosi buandi divu diwelimina. Marie amasola dikabu diwelimina adigomupatulu.