Josue 9 - La Sainte Bible en Langue Yipunu

Pangini na baGabaon

¹ Ava bakaga botsu abamaba o disimu dina diJourdain nesi o mikongu nesi o yibususu no disimu dina dimubu te no yiari yiLiban bamagululu mambu meni, diwendi rie: baHitt na baAmor na bisi Canaan na baPerizie na baHivie na baJebusie,

² bamakunsama utoga divita na Josue na baIsrael.

³ BaGabaon o yiogu yiari ava bamagululu nana Josue amavayila bisi Jericho na bisi Ai

⁴ bamasoga diela na bamasogama na biguji bimuendu. Bamabonga saku tsigulu tsibaburu bogu na mambuta magulu mamikata mamalamu amamapasiga na mamalondu;

⁵ bamaduara bitsatsu bibapondu abimalondu na bitsatsu bibiduaru; na mapa mogu amamagala kala na amamaba bibuku na bibuku.

⁶ Bamawenda ombu Josue o milaku miGuilgal na bamatsingula Josue na baIsrael rie: Tumarambuyila vala uyiwivula uvangana pangini netu.

⁷ BaIsrael bamavosa na baHivie beni rie: Pa duitsani va gari etu kabogu tugorungula uvangana nenu.

⁸ Bamatsingula Josue rie: Jetu tuvu basalitsi bagu. Josue amabawivula rie: Jenu banyi? Agunyi duiruyisini?

⁹ Bamamuwagula rie: Jetu atuvu basalitsi bagu, tumarambuyila vala mu mbari tumagulu diduma diFumu Nsambi agu. Tuijabi wandi bimaga abi amavaga o Egypte,

¹⁰ na nana amavayila bakaga babeji baAmor o disimu dina diJourdain, diwendi rie: Sihori, kaga jiHechebon na Og kaga jiBachan abamatsana o Achetarot.

¹¹ Bivunda bietu na bisi bulongu buotsu bamaturuma rie: Bonganu biguji bimuendu yebabengusananu na dukabatsingula rie: Jetu tuvu basalitsi benu, tsie vanginianu pangini netu.

¹² Labatianu mapa metu: mbe maki muji ava tumarambuyila o mandagu metu yilumbu ayi tumasoyimina uruga ombu genu: labatianu mamagala kala na maka bibuku na bibuku.

¹³ Mambuta memama mamalamu mamaba magona ava tumamabasila na labatianu mamapapasiga; biduaru bietu na bapondu betu bimatufuila muna nsila.

¹⁴ Babaala baIsrael bamasinga uji biguji biogu na basamalewivula Fumu.

¹⁵ Josue amasinga dinonga nogu na amavangana pangini: pangini ajimabavega monyu. Bivunda bidibuli bamajiwarisa na pesi.

¹⁶ Bilumbu birieru binovioga baIsrael banomana uvangana pangini eni, bamagulu yiri batu beni bamaba ababambana nogu.

¹⁷ Mbana baIsrael bamasogama na bamatola yilumbu ayimurieru o misiengi miogu: Gabaon na Kefira na Beerot na Quiriat-Yearim.

¹⁸ BaIsrael basamababokisa mu mbari bivunda bidibuli bamabalevila pesi mu diina diFumu Nsambi Israel yiri bagobaboka. Tumba dibuli diotsu dimanyangila bivunda.

¹⁹ Bivunda biotsu bamawagula rie: Tugorungula umuebavayila diambu mu mbari tumabalevila pesi na diina diFumu Nsambi Israel.

²⁰ Guluanu nana tubakelisila: tugobabokisa mu mbari kabu Nsambi jiketugaanga mu diambu dipesi aji tumabalevila.

²¹ Bivunda bamabuesa rie: Bayabokusu. Tumba basalusu uriaba mikansu noteganga mamba. Anana bivunda bamarumina.

²² Josue amanengila baGabaon na amabawivula rie: Dibandu yi dumatusoyila diela novosa rie: Jetu tuvu tindi vala nenu? Tsia jenu duitsani va gari etu?

²³ Dulaba dumalogu na dugopalusu o buviga: duriabanga mikansu noteganga mamba maNdagu Nsambi ami.

²⁴ Bamawagula Josue rie: Jetu basalitsi bagu tumagulu yiri Fumu Nsambi agu amaruma musalitsi andi Moise uduvega bulongu buotsu noboka bisi bulongu botsu va misu menu kabogu tumabasa na goma mu diambu dienu: la dibandu tumavayila nana.

²⁵ Namunyi tuji va miogu miagu, gukatuvayila nana guilabili diwelimina.

²⁶ Josue amavaga adi amavosa: amagandisa baIsrael ubaboka,

²⁷ bamabavaga bariabitsi bamikansu na bateyitsi bamamba badibuli na bayinyensulu yipagu va mbura aji Fumu osola: bategula bogu bebasalilingi te na namunyi.