Josue 7 - La Sainte Bible en Langue Yipunu

Dibi na mukilu biAkan

¹ BaIsrael bamavaga dibi mu diambu dibima abimavegu na mugeli. Akan muana dibaala uKarmi, muana dibaala uZabdi mutegula uZera mu yifumba yiJuda amabonga bima abimavegu na mugeli. Mbana Nsambi amanyoyila baIsrael tindi kabu.

² Ava Josue amabila o Jericho amasindiga babaala o Ai, aguvu bebeli na Bet-Aven o yiari ayi wisi epalili yiBethel. Amabaruma rie: Wendanu, yesieenganu bulongu. Babaala beni bamawenda na bamayesieenga Ai.

³ Bamagabuga ombu Josue na bamamutsingula rie: Digaa diambu uwenda na bagora botsu; tosini beji vo yirieru tsibagora tsiuba tsiwelimina utoyisa Ai; guyatsoyisa batu botsu mu mbari bisi Ai bavu mua dutalu dugeyi.

⁴ Tosini yirieru tsibagora tsimawenda o utoga tumba bisi Ai bamababingisa.

⁵ Bisi Ai bamaboka bebeli na magumarieru na gora yisiamunu, bamabaduka ubandila va dikotulu dimusiengi te no Chebarim na bamababokisa ava bamavindimina mukongu. Bagora bamabakama mirima na bamakambulu.

⁶ Josue amapasa biduaru biandi, amagudama va gusu yigara yipangini yiFumu kedi kedi te na tsisiga, jogu na bivunda biIsrael bamagolana difufundu.

⁷ Josue amawivula rie: Aa Fumu Nsambi, dibandu yi gumasabusila batu bebaba Jourdain? Yika uyituwakisa ombu baAmor noyitubokisa? Aa! Mbe tumajaba mbe tumasiala o disimu dina diJourdain!

⁸ Aa Fumu, baIsrael bamarina bavinitsi bogu, yi nyuvosa?

⁹ Bisi Canaan na bisi bulongu botsu bodigulu, botutsiengila na botsiemusa diina dietu vava tsi. Gugekipi diina diagu dineni?

¹⁰ Fumu amaruma Josue rie: Simbuga! Dibandu yi guvu magudama?

¹¹ BaIsrael bamavaga dibi, bamabunsa pangini ami, aji nyimavangana nogu, bamabonga bima abimavegu na mugeli, bamabidaga na bamafura na bamabisuega va gari mifuna miogu.

¹² La dibandu baIsrael bagaa na mangolu va gusu bavinitsi bogu; bamarina bavinitsi bogu mu mbari bamadaga bima abimavegu na mugeli. Ngomueba nenu pa dugotubula abimadagu, abivu nenu.

¹³ Simbuga liomisa batu. Gukabaruma rie: Keliomisanu mugesa; mu mbari Fumu Nsambi Israel, jandi rie: Jenu baIsrael, vavu bima abi dumadaga; dugorungula uba na mangolu va gusu bavinitsi benu te na dumagusula abimadagu abivu nenu.

¹⁴ Kedi dukaruga yifumba yifumba; yifumba ayi Fumu osola yiuruga muna mikuta mikuta, na mukuta agu Fumu osola uruga muna mandagu mandagu, na ndagu aji Fumu osola jiuruga muna dibaala dibaala.

¹⁵ Jandi agugaangu yiri amadaga abimavegu na mugeli onyensu, jaʼ beni na biandi biotsu mu mbari amabunsa pangini jiFumu na amavaga nsoruru o Israel.

¹⁶ Josue amarelama kedi jineni na amanengila baIsrael muna bifumba biogu na yifumba yiJuda yimagaangu.

¹⁷ Amaruma batu unengila mikuta miotsu na mukuta uZera umagaangu. Amaruma batu unengila mukuta uZera muna mandagu mandagu na Zabdi amagaangu.

¹⁸ Amaruma batu unengila bisi ndagu jiZabdi muna dibaala dibaala na Akan, muana dibaala uKarmi mutegula uZera mu yifumba yiJuda amagaangu.

¹⁹ Josue amatsingula Akan rie: Muana ami, levati na diina diNsambi Israel, guyamulensa. Nsinguli adi gumavaga, guyansueyila diambu.

²⁰ Akan amawagula Josue rie: Dingensa nyimavayila Fumu Nsambi Israel dibi, adi nyimavaga adidi:

²¹ Va gari abimakindu, nyimalaba yijungi yiboti yiMesopotamie na kama beji tsimbongu na dimanyi dilora, utsira udionyi dimaba mua yibuku yikilu; nyimalebinyungila mbana nyimabibonga; gubilaba o tsi butamba o gari ndagu ami jitsanda na mbongu tsiivu o tsi.

²² Josue amasindiga batu abamawenda mambangu o ndagu andi jitsanda na dingensa bamabilaba.

²³ Bamabibongila o ndagu andi jitsanda, bamabibeyila Josue na baIsrael botsu mbana bamabisunsa va gusu Fumu.

²⁴ Josue na baIsrael botsu bamabonga Akan muana dibaala uZera na mbongu na yijungi na dimanyi dilora na baana bababaala na babagetu baAkan nesi bangombi bandi nesi baburu bandi nesi bindombu biandi nesi binsabi biandi nesi ndagu andi jitsanda nesi biotsu abimaba nandi; bamabega biotsu o yibususu yiAkor.

²⁵ Josue amamuwivula rie: Dibandu yi gumatutsoyisila? Namunyi Fumu ogutsoyisa. BaIsrael botsu bamabatindila mamanyi; banomana ubatindila mamanyi bamabanyensa.

²⁶ Mbana bamadibiga Akan na diguki dineni dimamanyi adikivu te na namunyi. Mbana kabu Fumu jimasaguga. Te na namunyi benengili mbura eni yibususu yiAkor.