Josue 5 - La Sainte Bible en Langue Yipunu

¹ Bakaga botsu baAmor o yiari ayi wisi ewendisini yiJourdain na bakaga botsu baCanaan abamatsananga o yiari yimubu, banogulu yiri Fumu amakamusa mamba maJourdain te na baIsrael bamasabuga, bamakambulu te na bamabakama mirima ava bamalabila baIsrael.

Durebu dubaIsrael o Guilgal

² Va temu eni Fumu amarumina Josue rie: Vaga mabaga mamamanyi noreba baIsrael bebaba.

³ Josue amavaga mabaga mamamanyi na amareba baIsrael; dimavagu o julu mukongu uAralot.

⁴ Guluanu dibandu adi Josue amabarebila. Batu botsu abamapalila o Egypte, diwendi rie: Bagora botsu bamafuila o kumu muna nsila ava bamapalila o Egypte.

⁵ Batu beni botsu abamapalila o Egypte bamaba barebu; tumba botsu abamaburulu o kumu muna nsila ava bamapalila o Egypte mbe basakarebu.

⁶ BaIsrael bamalinga o kumu magumana mabilima te na vana dubungu dubagora botsu abamapalila o Egypte mu mbari basamagulu diufi diFumu; Fumu amabalevisa pesi yiri agobalasa bulongu abu amavangana na bataji bogu utuvega, bulongu abuvu na tindi digumba.

⁷ Fumu amasinga baana bogu va yivinga yiogu; Josue amabareba mu mbari mbe basakarebu, basamareba batu mu nsila.

⁸ Banomana urebu, batu botsu bamatsana o milaku te na bamabeluga.

⁹ Fumu amatsingula Josue rie: Namunyi nyimadugusulila yisonyi yiEgypte. La dibandu mbura eni jimalugulu Guilgal te na namunyi.

Paque jitega o Canaan

¹⁰ BaIsrael bamavaga milaku o Guilgal; bamaji feta Paque uyitsila Fumu yilumbu yiyigumi na muina yitsungi eni o kumu jiJericho.

¹¹ Ava kedi ajibambini na feta Paque bamaji tsangu tsible tsibulongu; diwendi rie: mapa amagaa na dufunusu na ble tsigangu; bamaji biotsu bina mu yilumbu yieni.

¹² Ava kedi jiyilumbu ayi bamajanganga ble tsibulongu, manna tsimasuka; kabogu baIsrael basamamuedila manna tumba muna yilumbu yieni yiotsu bamajanganga biguji biCanaan.

Yivunda yidibadi diFumu

¹³ Ava Josue amabila bebeli na Jericho amabuaga misu o julu na amalaba dibaala diteli va nsungisini nandi adimaba na dijenga va dikaka adisamaba mu yisupu. Josue amabambana nandi nomuwivula rie: Ndeʼ aguʼetu vo guvu muvinitsi etu?

¹⁴ Amawagula rie: Nesi, tumba nyivu yivimda yidibadi diFumu, adina nyimaruyila. Josue amakebuaga va tsi va gusu andi na amawivula rie: Diambu yi Fumu ami erumi musalitsi andi?

¹⁵ Yivunda yidibadi diFumu amaruma Josue rie: Vula bapondu bagu mu mbari mbura aji guvu jivu yingitsi. Josue amadivaga.