Josue 4 - La Sainte Bible en Langue Yipunu

Yigumi na mamanyi mabeji mayirangumunu

¹ Ava batu botsu bamamanina usabuga Jourdain, Fumu amaruma Josue rie:

² Sola yigumi na babaala babeji: dibaala dimosi mu kadi yifumba yiIsrael.

³ Barumi diruma diedidi rie: Bolanu yigumi na mamanyi mabeji vana mbura aji bavagulitsi bapagu bamaretsimina va gari Jourdain, dukamabega o disimu dina nomasunsa va mbura aji dusilimina mukolu egugu.

⁴ Josue amanengila yigumi na babaala babeji baIsrael aba amasola, dibaala dibaala mu kadi yifumba.

⁵ Amabaruma rie: Vioganu va gusu yigara yipangini yiFumu Nsambi enu va gari Jourdain na mutu mutu akanangula dimanyi va disambaka, dedi mosi na dutalu dubifumba biIsrael.

⁶ Mamanyi memama moba yilimba va gari enu. Yilumbu yimosi baana benu bowivula rie: Mamanyi memama dibandu yi?

⁷ Dukawagula rie: Mamba maJourdain mamakamuga va gusu yigara yipangini yiFumu ava yimasabuyila Jourdain, avana mamba maJourdain mamakamuyila, mamanyi memama mavu yirangumunu yiyimaga ombu baIsrael te na mutubu.

⁸ BaIsrael bamavaga adi Josue amabaruma. Bamabola yigumi na mamanyi mabeji va gari Jourdain nana Fumu amarumina Josue, dedi mosi na dutalu dubifumba bibaIsrael, bamamabega nogu na bamamasunsa va mbura aji bamasilimina mukolu eni.

⁹ Josue amareliga yigumi na mamanyi mabeji wandi va gari Jourdain va mbura aji bavagulitsi bapagu bamasikimina, abamabeganga yigara yipangini; monyi mesiali vana te na namunyi.

¹⁰ Bavagulitsi bapagu abamabeganga yigara yipangini bamasikama va gari Jourdain te na mambu ama Fumu amaruma Moise utsingula Josue mamadugusu. Batu bamalensa usabuga Jourdain.

¹¹ Batu botsu banomana usabuga, bavagulitsi bapagu bamavioga na yigara yipangini yiFumu.

¹² BaRuben na baGad na yiasi yiyifumba yiManasse bamaduara bitogulu na bamarela baIsrael nana Moise amabarumina.

¹³ Bebeli na magumana matosini tsibabaala bamaduara bitogulu na bamaba bakunsama utoga divita, bamavioga va gusu Fumu o kumu tsiJericho.

¹⁴ Muna yilumbu yieni Fumu amaroyisa diduma diJosue va misu mabaIsrael botsu; bamamuduma dedi mosi nana bamaduminanga Moise va temu andi jiotsu.

¹⁵ Fumu amaruma Josue rie:

¹⁶ Ruma bavagulitsi bapagu abebeyi yigara yipangini usabuga muna Jourdain.

¹⁷ Josue amaruma bavagulitsi bapagu diruma diedidi rie: Sabuganu muna Jourdain.

¹⁸ Ava bavagulitsi bapagu abamabeganga yigara yipangini yiFumu bamasabuyila Jourdain, yiotsu ayi bamatolila o disimu, mamba maJourdain mamamuesobana na mamabasa tindi ubasa nana na kala.

¹⁹ Batu bamasabuga Jourdain mu yilumbu yimugumi yitsungi jitega na bamavaga milaku o Guilgal o yiari ayi wisi epalili o mandilu maJericho.

²⁰ Josue amareliga yigumi na mamanyi mabeji ama bamabongila o Jourdain o Guilgal.

²¹ Amatsingula baIsrael rie: Ava baana benu bowivulila batu bogu yilumbu yimosi rie: Mamanyi memama, dibandu yi?

²² Dukalonsa baana benu nobatsingula rie: baIsrael bamasabuga Jourdain tsiri ubola.

²³ Fumu Nsambi enu amadukamusila mamba maJourdain te na jenu dumasabuga dedi mosi nana Fumu Nsambi enu amakamusila Mubu uBenga te na jetu tumasabuga,

²⁴ yiri bisi butamba botsu bajabi yiri Fumu avu na mangolu na yiri jenu dudumanga Fumu Nsambi enu temu tsiotsu.