Josue 3 - La Sainte Bible en Langue Yipunu

Usabuga besabuyi mujamba uJourdain

¹ Josue amarelama kedi jineni, amarambuyila va Sittim na baIsrael botsu. Bamatola o mujamba uJourdain, bamasilimina vana nesi bakasabuga.

² Bilumbu birieru binovioga bivunda bibagora bamayenananga milaku

³ na bamaruma batu diruma diedidi rie: Ava dulabila bisi Levi abavu bavagulitsi bapagu uvioga bevioyi na yigara yipangini yiFumu Nsambi enu dugusuga va milaku noyenabadukanga.

⁴ Tumba voba dilala dikilumetera mosi va gari enu na yionyi: duyaviolila ubambana. Dukayenayidukanga mu mbari dusakavioyila nsila eni na kala.

⁵ Josue amaruma batu rie: Keliomisanu mu mbari mugesa Fumu odulasa bimaga.

⁶ Mbana Josue amaruma bavagulitsi bapagu rie: Beganu yigara yipangini na vioganu va gusu batu. Bamabega yigara yipangini na bamawendanga va gusu batu.

⁷ Fumu amatsingula Josue rie: Namunyi nyubanda uroyisa diduma diagu va misu mabaIsrael botsu; bojaba yiri nyubanganga nagu nana nyimabilanga na Moise.

⁸ Gukaruma bavagulitsi bapagu abonangula yigara yipangini diruma diedidi rie: Ava dutotila va disimu diJourdain, dukasikama vana gari Jourdain.

⁹ Josue amaruma baIsrael rie: Bambananu na guluanu mambu maFumu Nsambi enu.

¹⁰ Josue amavosa rie: Adidi diudujabisa yiri Nsambi aguvu monyu avu nenu, odubingila bisi Canaan na baHitt na baHivie na baPerizie na baGuirgachie na baAmor na baJebusie.

¹¹ Yigara yipangini yiFumu malongu motsu yiudurela usabuga Jourdain.

¹² Solanu yigumi na babaala babeji, dibaala dimosi mu kadi yifumba yiIsrael.

¹³ Yika bavagulitsi bapagu abebeyingi yigara yipangini yiFumu malongu motsu, besunduyi mu mamba maJourdain, mamba magomueba muwigu, mogukama te na moba diguki.

¹⁴ Batu bamapalila o milaku miogu uyenasabuga Jourdain. Bavagulitsi bapagu abamabeganga yigara yipangini bamawendanga va gusu batu.

¹⁵ Ava bavagulitsi bapagu abamabeganga yigara yipangini bamatolila o Jourdain, (va temu dutsonsugu Jourdain umabasanga nyidu) banosunduga o mamba

¹⁶ o yiari ayi musiengi uAdam agumaba bebeli na Sartan, mamba mamuwigu matandu mamagukama diguki dimosi. Mamba mabanda mamavindamanga o yiari yikumu te no Mubu uKali mbana mamakamuga. Batu bamasabuga va nsungisini na Jericho.

¹⁷ Bavagulitsi bapagu abamabeganga yigara yipangini yiFumu bamasikama va mbura jikamuga va gari Jourdain ava baIsrael bamavioyilanga va mbura jikamuga te na botsu bamasabuga Jourdain.