Josue 24 - La Sainte Bible en Langue Yipunu

BaIsrael usola besoli usalila Fumu

¹ Josue amabengusana bifumba biotsu biIsrael o Sichem; diwendi rie: amanengila bivunda biIsrael na basefu bogu na bansonsi bogu na bivunda biogu bibagora. Bamakelasa va gusu Nsambi.

² Josue amatsingula batu botsu rie: Fumu Nsambi Israel jandi rie: Taji enu Tera, taji Abraham na Nahor, kala kala amaletsananga o disimu dina diEuphrate agu amayitsilanga bansambi bangana.

³ O disimu dina dimujamba nyimabongila taji enu Abraham na nyimamulinsa o malongu motsu maCanaan, nyimafunisa bategula bandi na nyimamuvega Isaac.

⁴ Ombu Isaac nyimavega Jacob na Esau; ombu Esau nyimavega mukongu uSeir tumba Jacob na baana bandi bababaala bamawenda o Egypte.

⁵ Mbana nyimasindiga Moise na Aaron o Egypte na nyimatsoyisa bisi Egypte na bimaga abi nyimavaga va gari ogu; mbana nyimadupalisa.

⁶ Nyimapalisa bataji benu o Egypte na dumatola o mubu. Bisi Egypte bamaduka baiaji benu te no Mubu uBenga na makalu mogu na babeyitsi bamakalu.

⁷ Bataji benu bamatatila Fumu. Fumu amasunsa pisama va gari jenu na bisi Egypte na amabadiamisa tindi udiamisa o tsi mubu. Na misu menu dumalaba adi nyimavayila bisi Egypte. Mbana dumatsananga yitsingu yineni o kumu.

⁸ Nyimaduwendisa o bulongu buAmor abamatsaninanga o disimu dina diJourdain na bamadutoyisa. Nyimabawakisa ombu genu; jenu dumabapatula bulongu buogu na nyimababokisa va misu menu.

⁹ Balac muana dibaala uSippor agumaba kaga Moab amakelasa utoyi-sa baIsrael. Amaruma batu unengila Balaam muana dibaala uBeoruduloga.

¹⁰ Tumba nyimabusa ugulu Balaam kabogu amatsotsu udugabila miulana nyimaduwaka kalala ombu Balac.

¹¹ Dumasabuga Jourdain na dumatola o Jericho. Bisi Jericho bamadutoyisa, dedi mosi na baAmor na baPerizie na bisi Canaan na baHitt na baGuirgachie na baHivie na baJebusie. Botsu bana nyimaduwakisa,

¹² nyimaretsa banyosi va gusu enu abamabingisa bakaga babeji baAmor vala nenu. Tsiri majenga menu nesi pita tsienu abimaduwaka kalala.

¹³ Nyimaduvega bulongu abu jenu beni dusamasala butamba na misiengi ami jenu beni dusamarunga na dumaji mirayisan nesi mioliva ami jenu beni dusamavara.

¹⁴ Tsie dumianu Fumu na musalilianu na usunda na usigama. Tsiemusanu bansambi aba bataji benu bamayitsanga o disimu dina dimujamba no Egypte, salilanu Fumu.

¹⁵ Pa duilabi yiri digaa diwelimina usalila Fumu kabogu kotanu muyitsa agu duirondi; nesi bansambi aba bataji benu bamasalila o disimu dina dimujamba nesi bansambi babaAmor o bulongu abu dumaletsaninanga.

¹⁶ Batu bamawaka rie; Jetu tugaa na ditasa ubusa Fumu nosalila bansambi bangana!

¹⁷ Fumu avu Nsambi etu, jandi agumatupalisa o buviga o Egypte, jetu botsu na bataji betu; jandi agumavaga bimaga bineni va misu metu na amatukelisanga mu mulingu etu uotsu nʼombu batu botsu aba tumavioyila o malongu mogu.

¹⁸ Amatubingila batu botsu nesi baAmor abamatsaninanga o bulongu bueni. Jetu wetu tusalilanga Fumu mu mbari avu Nsambi etu.

¹⁹ Josue amatsingula batu rie: Dugorungula usalilanga Fumu. Avu Nsambi mosi buandi na Nsambi aguvu na diwavi; agogaru bumbini buenu nesi nsimbulu tsienu.

²⁰ Ava duliyila Fumu nsima noyitsa bansambi bangana, jaʼ wandi oduliyila nsima oduvayila dibi, diuleba amaleduvayila maboti; va julu vana odusielasana.

²¹ Batu bamatsingula Josue rie: Tsiri nana! Jetu tusalilanga Fumu.

²² Josue amatsingula batu rie: Jenu beni duvu bambeji yiri dumasola usalila Fumu. Jogu bamawaka rie: Jetu beni tuvu bambeji.

²³ Josue amabuela rie: Kabogu, gusulanu bansambi bangana abavu nenu na keveganu ombu Fumu Nsambi baIsrael.

²⁴ BaIsrael bamatsingula Josue rie: Jetu tusalilanga Fumu Nsambi etu na tudedilanga diufi diandi.

²⁵ Muna yilumbu yieni Josue amawarisa pangini na batu na amabavega migaga na maruma o Sichem.

²⁶ Josue amasona mambu memama mu dibuku dimigaga miNsambi. Amabonga dimanyi dineni adi amareliga va tsi musena o Mbura Yingitsi.

²⁷ Josue amatsingula batu botsu rie: Duilabi dimanyi diedidi, divu mbeji enu mu mbari dimagulu mambu motsu ama Fumu amatutsingula; diuba mbeji enu yiri dugoba mimbini va gusu Nsambi enu.

²⁸ Mbana Josue amaganina batu, mutu mutu amayenawenda o yiari yidisiala diandi!

Dufu duJosue

²⁹ Mambu memama manovioga Josue muana dibaala uNoun, agumaba musalitsi uFumu amafu; amaba na kama na yigumi yibilima.

³⁰ Bamamutsiga o yiari ayi amadila ava bulongu bumagabulu, diwendi rie: O Timnat-Sera o julu mukongu uEfraim o banda mukongu uGaach.

³¹ BaIsrael bamasalilanga Fumu yitsingu yiotsu yiJosue nesi te na yitsingu yiotsu yibivunda abimamudukanga na abimajabanga maboti motsu ama Fumu amavayilanga baIsrael.

³² Bivisi biJoseph abi baIsrael bamabeyila o Egypte bimatsigulu va Sichem o musiru agu Jacob amasumba ombu bategula baHamor, taji Sichem, dufunu du-uonyi dumaba kama mboangu tsilora jivema agumaba disiala dibaJoseph.

³³ Elazar muana dibaala uAaron amafu na bamamutsiga o Guibea agumavegu ombu muana andi udibaala Pinhas o julu mukongu uEfraim.