Josue 22 - La Sainte Bible en Langue Yipunu

Bifumba biIsrael abimatsananga va disimu diJourdain

¹ Mbana Josue amanengila yifumba yiRuben na yiGad na yiasi yiyifumba yiManasse.

² Amabatsingula rie: Dumakelisa motsu ama Moise musalitsi uFumu amaduruma na dumadedila diufi diami mu motsu ama nyimaduruma.

³ Ubongila kala te na namunyi dusamalibananga baana bataji benu; dumakelisanga migaga miFumu Nsambi enu.

⁴ Namunyi Fumu Nsambi enu amavega baana bataji benu musuga utsana o biari biogu nana amavanginina nogu, dukagabuga o mandagu menu mamatsanda. Dukayetsana o bulongu buenu abu Moise musalitsi uFumu amaduvega o yiari ayi wisi epalili yiJourdain.

⁵ Tumba kelisanganu migaga miotsu ami Moise musalitsi uFumu amaduvega: rondanganu Fumu Nsambi enu na dedilanganu duganu duandi, kipanganu migaga miandi: keveganu ombu gandi na musalilinganu na mirima mienu miotsu na matasa menu motsu.

⁶ Josue amabagabila miula mbana amabaganina na bamayenawenda o mandagu mogu mamatsanda.

⁷ Moise amavega yiasi yiyifumba yiManasse disiala o Bachan na Moise amavega yiasi yisusu yiyifumba yiManasse disiala bebeli na baana bataji bogu o disimu dina diJourdain o yiari ayi wisi ewendisini. Ava Josue amabasindiyila o mandagu mogu mamatsanda, amalebagabila miula.

⁸ Amabatsingula rie: Duigabuyi o mandagu menu mamatsanda na busina buneni: migamba mineni na puela lora jivema na lora na kunga na madilu na biduaru. Gabananu na baana bataji benu abi dumakinda bavinitsi benu.

Yinyensulu yipagu ayimarungu va disimu dina diJourdain

⁹ Bategula baRuben na baGad na yiasi yiyifumba yiManasse bamayenagabuga, bamasila baIsrael o Silo o bulongu buCanaan uwenda o bulongu buGalaad abumaba abuogu, aguna bamatsaninanga nana Fumu amarumina Moise.

¹⁰ Yiotsu ayi bamatolila o yiari yiJourdain ayivu o bulongu buCanaan, baRuben na baGad na yiasi yiyifumba yiManasse bamarunga yinyensulu yipagu, guna va disiumu dina diJourdain ayimaba yineni.

¹¹ BaIsrael bamagulu batu bevosi rie: Labatianu yifumba yiRuben na yiGad na yiasi yiyifumba yiManasse bamarunga yinyensulu yipagu o bulongu buCanaan o disimu dina diJourdain, diwendi rie: o yiari yibaana bataji bogu.

¹² Ava baIsrael bamagululu dionyi, dibuli diotsu dibaIsrael bamabenguna o Silo uyetoga divita nogu.

¹³ BaIsrael bamasindiga Pinhas muana dibaala umuvagulitsi upagu Elazar ombu yifumba yiRuben na yiGad nʼombu yiasi yiyifumba yiManasse,

¹⁴ yigumi yibivunda bamawenda nandi, diwendi rie: muana kaga umosi mu kadi yifumba; botsu bamaba baana babakaga babifumba biIsrael.

¹⁵ Jogu bamawenda ombu yifumba yiRuben na yiGad nʼombu yiasi yiyifumba yiManasse o bulongu buGalaad na bamabatsingula rie:

¹⁶ Dibuli diotsu diFumu bewivuli rie: Diambu yi dumavayila Nsambi Israel? Dibandu yi duiliyili Fumu nsima? Dibandu yi dumarungila yinyensulu yipagu? Fumu agelabi yiri duji mimbini?

¹⁷ Tuyalibana dibi dietu diPeor! Tsia te na namunyi tusakaliomusu mu dionyi? Tsia dionyi dimarombisa dibuli diFumu yivunga?

¹⁸ Ne nana duimueliyila Fumu nsima? Pa jenu duiliyili Fumu nsima namunyi, mugesa onyoyila dibuli diotsu diIsrael.

¹⁹ Pa duilabi yiri bulongu buenu buvu muinsi, gabuganu o bulongu buFumu o mbura aji jaʼ beni amasola ukelasa noyitsana netu. Duyaba mimbini miFumu! Disawelimina urunga yinyensulu yipagu ayigaa yiFumu Nsambi etu.

²⁰ Ava Akan muana dibaala uZera amavayila dibi mu diambu dibima abimavegu na mugeli Nsambi asamanyoyila dibuli diotsu diIsrael? Akan asamafu wandi pinsa na dibi diandi.

²¹ Yifumba yiRuben na yiGad na yiasi yiyifumba yiManasse bamawaka rie:

²² Aa Nsambi! Aa Nsambi! Fumu Nsambi, Aa Nsambi, Fumu edijabi. Jenu bivunda bibatosini baIsrael dijabianu wandi! Pa tuvu mimbini vo tumabiva va gusu agu, Fumu guyatuwaka kalala namunyi.

²³ Pa tumarunga yinyensulu yipagu na ditasa uliyila Fumu nsima vo na ditasa uvagula pagu tsiunyensa na miensili vo pa yivu uvagulila pagu tsikabusulu tsimaboti: jaʼ beni Fumu edijabi!

²⁴ Tumadivaga mu mbari tumakambulu ava tumatasila yiri yilumbu yimosi bategula benu bowivula bategula betu rie: Diambu yi didubambisini na Fumu Nsambi Israel?

²⁵ Fumu amavaga Jourdain va gari jetu nenu, amana la mandilu. Jenu baRuben na baGad dugaa na dikabu ombu Fumu etu mbana bategula benu borombisa bategula betu ubusa udedila Fumu.

²⁶ La dibandu tumavosila rie: Turungianu yinyensulu yipagu tsiunyensa tsiminongu na minongu,

²⁷ tumba yiuba mbeji va gari jetu nenu na va gari bategula betu na bategula benu yiri tuirondi usalila Fumu, nesi na pagu tsiunyensa tsiminongu na minongu, nesi tsiutsindula dibumi, nesi tsikabusulu tsimaboti, mu mbari yilumbu yimosi bategula benu bakevosa na bategula betu rie: Dugaa na dikabu ombu Fumu.

²⁸ Tumavosa rie: Pa o gusu bovosanga posulu tsimunongu eni netu na bategula betu tuwaka rie: Gengilatianu yinyensulu yipagu yiFumu ayi bataji betu bamarunga tsiri uvagulila pagu tisunyensa tsiminongu na minongu tumba yivu mbeji va gari jetu nenu.

²⁹ Jetu tusamaba na ditasa uba mimbini miFumu nomuliyila nsima ava tumarungila yinyensulu yipagu tsiminongu na minongu na pagu tsitsangu. Va julu vana tuijabi yiri yinyensulu yipagu ayivu va gusu mbura aji jaʼ beni amasola ukelasa yivu yinyensulu yipagu yiFumu Nsambi etu.

³⁰ Ava Pinhas, muvagulitsi upagu na baana babakaga badibuli na bivunda bibatosini baIsrael abamabanandi bamagululu mambu mabaRuben na mabaGad na mabaManasse bamasunsa mirima.

³¹ Pinhas muana dibaala uElazar muvagulitsi upagu amatsingula baRuben na baGad na baManasse rie: Mbana tumajaba yiri Fumu avu va gari etu mu mbari dusamavayila Fumu dibi dieni. Adina dilasi yiri dusamarombisa baIsrael uba na mbela va gusu Fumu.

³² Pinhas muana dibaala uElazar muvagulitsi upagu na baana bakaga bamaganina baRuben na baGad na bamagabuga o bulongu buGalaad o Canaan ombu baIsrael aba bamayetsingula misamu miotsu.

³³ BaIsrael bamasunsa mirima; bamagabusila Nsambi diboti, bamatsiemusa ditasa uyetoga divita nobunga bulongu abu baRuben na baGad bamatsaninanga.

³⁴ BaRuben na baGad bamaluga yinyensulu yipagu Ed mu mbari bamavosa rie: Yivu mbeji va gari jetu nenu yiri Fumu avu Nsambi mosi.