Josue 2 - La Sainte Bible en Langue Yipunu

Josue utinda etindi baleyitsi babeji o Jericho

¹ Josue muana dibaala uNoun, amarambusa baleyitsi babeji o musuega va Chittim, amabaruma rie: Wendanu uyesieenga bulongu, sinsa viri Jericho. Bamasogama na bamatola o ndagu yimbembu, diina diandi Rahab na bamasilimina guna.

² Kaga jiJericho amagulu yiri babaala baIsrael bamatola vava na mukolu egugu uyisieenga bulongu.

³ Kaga jiJericho amasindiga mutu uyetsingula Rahab rie: Palisa babaala abatsikota o ndagu agu mu mbari jogu batsiruga uyisieenga bulongu buotsu.

⁴ Rahab amabonga babaala beni babeji amabasuega; mbana amavosa rie: Dingensa babaala beni batsitola ombu gami tumba ngaajaba agu batsirugasana;

⁵ vana tsisiga bebeli na diweru adi bedibiyili dikotulu dimusiengi batsipalanga; ngaajaba agunyi batsiwendasana. Lensanu nobaduka, dubarasuna.

⁶ Amabamatisa o julu muansa na amabasuega o tsi punga atsimawanyugu o julu muansa.

⁷ Batu bakaga bamabaduka muna nsila te na disabu diJourdain, yiotsu ayi bamapalila bamabindiga diguyi dimusiengi.

⁸ Nesi baleyitsi bakasilama, Rahab amamata ombu gogu o julu muansa,

⁹ na amabatsingula rie: Nyijabi Fumu amaduvega bulongu buebubu, adina ditsiturombisa goma; bisi bulongu buotsu uregama bereyimi.

¹⁰ Tumagulu nana Fumu amadukamusila Mubu uBenga ava dumapalila o Egypte na nana dumakambisila bakaga baAmor o disimu dina diJourdain: Sihon na Og aba dumaboka.

¹¹ Tumadigulu na tumaregama na mirima mietu mimabakama; mu mbari Fumu Nsambi enu avu Nsambi aguvu o julu na va butamba wandi.

¹² Kokolu tsienu, ndevilianu pesi mu diina diFumu enu yiri duvayila bisi ndagu taji ami diboti dedi mosi nana nyiduvayili.

¹³ Nsundusianu murima yiri dugobokisa taji ami na nguji ami na baana bataji bami bababaala na babagetu na abogu botsu. Kokolu tsienu dukatuwaka kalala.

¹⁴ Babaala beni bamamuwaka rie: Jetu tuvu tukunsama udupalisa na polu pa dugotubula adivu netu. Ava Fumu otuveyila bulongu buebubu tudulasa durondu na tugovinsa kingu.

¹⁵ Amabasundusa va fenetera na mukudu mu mbari ndagu aji amatsaninanga jimaba muna yibaga yimusiengi.

¹⁶ Amabaruma rie: Wendasananu o yiari yimukongu mu mbari dukebenguna na jogu abedubingisi, lesuemanu bilumbu birieru, te na jogu bogabuga mbana dukawenda.

¹⁷ Babaala beni bamamutsingula rie: Pesi aji gutsituruma uleva tujidugusu.

¹⁸ Gulu adi guvaga ne tukatola o bulongu buebubu; gukatunga mukudu egugu ubenga va fenetera aji guitusundusili, gukakotisa taji agu na nguji agu nesi baana bataji bagu nesi mukuta uotsu utaji agu o ndagu agu.

¹⁹ Pa mutu opala o ndagu agu malungu mandi moba va julu muru andi na jetu tugoba na mbela; tumba pa tunemisa ne unemisa mutu va gari jogu aboba o ndagu agu malungu mandi moba va julu miuru mietu.

²⁰ Tumba pa ndeʼ gutubula adivu netu tugomuegaangu na pesi aji gutsituruma uleva.

²¹ Rahab amawaka rie: Dibi nana duivosili. Anana amabaganinina na bamayenawenda. Mbana amatunga mukudu ubenga va fenetera.

²² Baleyitsi bamayenawenda na bamatola o mukongu agu bamatsanina bilumbu birieru te na jogu abamabadukanga bamagabuga. Abamabadukanga bamayenabarombanga mu nsila jiotsu tumba basamabalaba.

²³ Babaala beni babeji bamagusuga va yisuemunu, bamasunduga mukongu na bamasabuga Jourdain. Bamagabuga ombu Josue muana dibaala uNoun na bamamutsingula motsu ama bamalaba.

²⁴ Bamatsingula Josue rie: Dingensa Fumu amatuvega bulongu buotsu, nesi bisi bulongu botsu bamabakama mirima.