Josue 18 - La Sainte Bible en Langue Yipunu

Ubuaga bebuayi mbanda udilila bifumba bisusu masiala

¹ Yiotsu ayi bulongu buotsu bumaba o tsi durumu dubaIsrael dibuli diotsu dimabenguna o Silo na bamarangiga ndagu yibenguna guna.

² Vamasiala yisambuali yibifumba biIsrael abi mbe bisakadila disiala diogu.

³ Josue amawivula baIsrael rie: Temu yi dudundila ugungisa udila bulongu abu Fumu Nsambi bataji benu amaduvega?

⁴ Solanu babaala barieru mu kadi yifumba na nyubasoyiga uyenatsiengila bulongu na bogabuga ombu gami na matasa mogu nana bobugabinina.

⁵ Bobugaba yisambuali yimakabu; baJuda bosiala o yiari yiogu o banda.

⁶ Kabogu dukambeyila matasa menu nana dubugabila yisambuali yimakabu mbana nyudubuayila mbanda va gusu Fumu etu.

⁷ Tumba bisi Levi bagodila dikabu va gari enu mu mbari bunganga buFumu buvu disiala diogu: yifumba yiGad na yifumba yiRuben na yiasi yiyifumba yiManasse bamakedilila disiala diogu adi Moise musalitsi uFumu amabavega o disimu dina diJourdain o yiari ayi wisi epalili.

⁸ Mbe babaala beni basakasogama uyelaba nana bulongu buvu, Josue amabaruma rie: Yetsiengilanu bulongu nonsingula nana buvu, mbana nyudubuayila mbanda va gusu Fumu o Silo.

⁹ Babaala beni bamawenda, bamatsiengila bulongu mbana bamasona muganda agumalasa yisambuali yimakabu na miina mamisiengi; mbana bamagabuga ombu Josue o milaku miSilo.

¹⁰ Josue amababuayila mbanda va gusu Fumu o Silo amagabila baIsrael bulongu na amavega yifumba yifumba yiari yiandi.

Dikabu diyifumba yiBenjamin

¹¹ Dikabu ditega dimavegu na mbanda ombu yifumba yiBenjamin muna mikuta miogu na disiala adimabavegu na mbanda dimaba va gari mandilu maJuda na maJoseph.

¹² O yiari yibanda mandilu mogu mamaba o mujamba uJourdain na mamawenda o banda Jericho na mamamata te no mukongu o yiari ayi wisi ewendisini na mamapalila o kumu jiBet-Aven.

¹³ Mamavioyila vana o Louz, diwendi rie: o tandu Louz aguvu Bethel na mamavindama o Atrot-Addar va julu mukongu aguvu o tandu Bet-Horon o maragu mamukongu.

¹⁴ O yiari ayi wisi ewendisini mandilu mamavindama na mamayinguga o tandu, ubandila va mukongu aguvu va nsungisini na Bet-Horon na mamavioga te no tandu na mamapalila o Quiriat-Baal aguvu Quiriat-Yearim aguvu musiengi uyifumba yiJuda, amana mavu mandilu mayiari ayi wisi ewendisini.

¹⁵ O yiari yitandu mamabandila o makodu maQuiriat-Yearim. Mandilu mamavindama o yiari ayi wisi ewendisini te no bileka biNeftoa,

¹⁶ mamavindama te no banda mukongu aguvu va nsungisini na yibususu yiHinnom o yibususu yiRefaim o banda. Mamavindama va yibususu yiHinnom o yiari yitandu yiJebusie te no En-Roguel.

¹⁷ Mamavindama o yiari yibanda o En-Chemech te no Guelilot aguvu va nsungisini na mukongu uAdoumim na mamavindama o dimanyi adimalugu diina diBohan, muana dibaala uRuben.

¹⁸ Mamavioyila o yiari yibanda va nsungisini na Araba, mamavindama o Araba,

¹⁹ na mamavindama o yiari yibanda yiBet-Hogla uyepalila o ditungu dibanda diMubu uKali o yiari yimalu maJourdain o tandu. Amana mamaba mandilu mabanda.

²⁰ O yiari ayi wisi epalili, mujamba uJourdain umaba mandilu. Adina dimaba dikabu diyifumba yiBenjamin muna mikuta miogu na mandilu mabiari biogu.

²¹ Misiengi miyifumba yiBenjamin muna mikuta miogu amimi: Jericho na Bet-Hogla na Emec-Quessis

²² na Bet-Araba na Semaraim na Bethel

²³ na Avim na Para na Ofra

²⁴ na Kefar-Ammona na Ofni na Gueba: yigumi na misiengi mibeji na mimbu amambambana.

²⁵ Gabaon na Rama na Beerot

²⁶ na Mispe na Kefira na Mossa

²⁷ na Requem na Irpeel na Tarala

²⁸ na Sela na Elef na Jebus aguvu Jerusalem na Guibea na Quiriat; yigumi na misiengi mina na mimbu amamabambana. Adina dimaba dikabu diyifumba yiBenjamin muna mikuta miogu.