Josue 17 - La Sainte Bible en Langue Yipunu

¹ Dikabu adimadilulu na mbanda na yifumba yiManasse, agumaba tsomi Joseph, Makir agumaba tsomi Manasse agumaba taji Galaad; amadila Galaad na Bachan mu mbari amaba ngogaga.

² Na mbanda bamaveyila dikabu ombu bategula baManasse muna bifumba biogu: yiAbiezer nesi yiHelec nesi yiAsriel nesi yiChekem nesi yiHefer nesi yiChemida nesi yiManasse muana dibaala uJoseph muna mikuta miogu.

³ Selofad muana dibaala uHefer, muana dibaala uGalaad, muana dibaala uMakir, muana dibaala uManasse asamabura baana bababaala tumba amabura baana babagetu. Miina mabaana babagetu amama: Mala na Noa na Hogla na Milka na Tirsa.

⁴ Jogu bamawenda ombu Elazar muvagulitsi upagu nʼombu Josue muana dibaala uNoun nʼombu baana bakaga na bamavosa rie: Fumu amaruma Moise utuvega disiala va mosi na baana bataji betu bababaala. Bamabavega na musuga uFumu, dikabu didisiala dedi mosi na babaala bayifumba yiogu.

⁵ Kabogu yifumba yiManasse yimadila va julu vana bulongu buGalaad na Bachan abuvu o disimu dina diJourdain.

⁶ Baana babagetu baManasse bamadila disiala va mosi na baana bandi bababaala. (Bulongu buGalaad bumavegu ombu bategula basusu baManasse.)

⁷ Mandilu maManasse mamabandila va Asser o Mikmetat aguvu bebeli na Sichem mamavioga te nombu bisi En-Tappoua.

⁸ Bulongu buTappoua bumaba bubaManasse tumba dimbu diTappoua dimaba dibaEfraim.

⁹ Mandilu mamavindama o mujamba uCana o tandu mujamba. Misiengi mieni mimaba miEfraim amimaba va gari misiengi miManasse. Mandilu maManasse o banda mujamba mamalepalila o mubu.

¹⁰ Bulongu butandu bumaba buEfraim, bulongu bubanda bumaba buManasse na mubu umaba mandilu mogu; mamatola te no Asser o yiari yibanda nesi te no Issakar o yiari ayi wisi epalili.

¹¹ O Issakar no Asser Manasse bamadilila Bet-Chean na mimbu amamabambana na bisi Dor na mimbu amamabambana na bisi En-Dor na mimbu amamabambana na bisi Taanak na mimbu amamabambana ria bisi Meguiddo na mimbu amamabambana: diwendi rie: malongu marieru.

¹² BaManasse basamarungula ubinga bisi Canaan la dibandu basamadila misiengi mieni.

¹³ Diuleba baIsrael bamaba na tindi mangolu bamakotisa bu-ukotisa bisi Canaan o buviga, basamarungula ubabinga.

¹⁴ Bategula baJoseph bamawivula Josue rie: Dibandu yi gumatuveyila disiala dikabu dimosi buandi? Gugelabi Fumu amatugabila miula te na tuvu bapuela bapuela?

¹⁵ Josue amabatsingula rie: Pa duvu bapuela bapuela na mikongu miEfraim migaa miwelimina, dukawangisa mbura o majombi na baPerizie na baRefaim.

¹⁶ Baiegula baJoseph bamavosa rie: Mikongu miEfraim migotudugu. Bisi Canaan botsu bavu na makalu mamadilu: nesi abetsani o yibususu yiJizreel nesi abetsani o Bet-Chean na mimbu amamabambana.

¹⁷ Josue amatsingula bategula baJoseph: yifumba yiEfraim na yiManasse rie: Jenu duvu bapuela bapuela na duvu na mangolu maneni la dibandu dugodilila dikabu dimosi buandi.

¹⁸ Tumba dudila yiari yiotsu yimikongu ayivu majombi; dukamawangisa noyetsana. Diuleba bisi Canaan bana makalu mamadilu na bana mangolu maneni dukababinga.