Josue 11 - La Sainte Bible en Langue Yipunu

Divita diMerom

¹ Yabin, kaga jiHassor amagulu ndungulu tsiJosue, amatinda bilumbi ombu Yobab kaga jiMadon nʼombu kaga jiChimron nʼombu kaga jiAkechaf,

² nʼombu bakaga abamaba o banda o mukongu nokumu no tandu o yiari yiGenesareth no yibususu te no julu tsimikongu miDor o yiari ayi wisi ewendisini,

³ nʼombu bisi Canaan o yiari ayi wisi epalili na ayi wisi ewendisini nʼombu baAmor nʼombu baHitt nʼombu baPerizie nʼombu baJebusie o mukongu nʼombu baHivie o banda mukongu uHermon o bulongu buMispa.

⁴ Bamapala na bagora bogu botsu, bamaba tindi dibuli dineni dutalu duogu dumaba nderi yisieyi yimubu, na bamaba na bakabala na makalu bipuela bipuela.

⁵ Bakaga beni botsu bamasola mbura ubengunina na bamayevaga milaku va mosi va mugula uyileka yiMerom uyetoyisa baIsrael.

⁶ Fumu amatsingula Josue rie: Guyabaduma, mugesa va diweru diedidi nyubabokisa botsu; jenu baIsrael dulaba yika bamfumbi na bamfumbi. Gutabula miansi mimakulu mibakabala bogu na gukanyensa makalu mogu.

⁷ Josue na bagora bandi bamabasutusu va mugula uyileka yiMerom na bamabafuangama.

⁸ Fumu amabawakisa ombu baIsrael; bamababelisa na bamababingisa te no Sidon aguneni te no Misrefot-Maim te no yibususu yiMispa o yiari ayi wisi epalili; bamababoka na basamarinisa ne umosi.

⁹ Josue amabavayila nana Fumu amamurumina na amatabula miansi mimakulu mibakabala bogu na amanyensa makalu mogu.

Mbongulu jiHassor

¹⁰ Ava Josue amagabuyila, vana temu e ni amapansila Hassor agumaleba tindi musiengi ubufumu bueni buotsu na amaboka kaga.

¹¹ Amababoka na amapansa botsu abamaba muna udugusu mugeli; asamarinisa ne umosi. Va julu vana bamanyensa Hassor.

¹² Josue amapansa misiengi miotsu mibakaga beni na amaboka bakaga wandi udugusu mugeli, amabapansa botsu dedi mosi nana Moise musalitsi uFumu amarumina.

¹³ Tumba baIsrael basamanyensa ne musiengi umosi amimaba o julu tsimikongu, yika Hassor buandi agu Josue amanyensa.

¹⁴ BaIsrael bamakekelisila abimakindu; biotsu bimisiengi mieni na biruitsi; tumba bamaboka botsu, basamarinisa ne umosi.

¹⁵ Josue amadugusu maruma ama Fumu amaruma musalitsi andi Moise, ama Moise amaruma Josue; asamagungisa ne dimosi va gari motsu ama Fumu amaruma Moise.

Josue udila edili bulongu

¹⁶ Anana Josue amadilila bulongu bueni buotsu ubandila o yiari yimukongu te no tandu na bulongu buotsu buGochen na yibususu yiotsu yikumu na mukongu uIsrael na bibususu bi-uonyi,

¹⁷ ubandila o mukongu uPele aguibandili o yiari yiSeir te no Baal-Gad, o yibususu yiLiban ayivu o banda mukongu uHermon. Amagaanga bakaga botsu mbana amababokisa.

¹⁸ Josue amatoga mavita yitsingu yineni na bakaga beni botsu.

¹⁹ Ne musiengi umosi usamanonga na baIsrael, yika Gabaon buandi agu baHivie bamatsaninanga. Yika na mavita baIsrael bamadilila miotsu mina.

²⁰ Fumu amarombisa bisi bulongu uba mimbini notoga tindi divita na baIsrael. Mbana duganu duFumu dumadugusu ava baIsrael bamababokisila. Udugusu mugeli baIsrael basamarinisa ne umosi nana Fumu amarumina Moise.

²¹ Avana temu eni Josue amatoyila na baAnac na amababoka botsu o mukongu nesi o Hebron na Debir na Anab te no mikongu miotsu miJuda nesi o mukongu uIsrael; udugusu mugeli Josue amabapansa na misiengi miogu miotsu.

²² Asamamuesila ne muana umosi uAnac o bulongu buIsrael; bamasiala mua pesu yika o Gaza no Gat no Asdod.

²³ Nana Fumu amarumina Moise, Josue amadila bulongu buotsu na amabuvega disiala ombu baIsrael ava amabugabila muna bifumba. Mbana bulongu bumaba lingi, busamamueba na mavita.