Joel 4 - La Sainte Bible en Langue Yipunu

Benyi na bunsonsi buNsambi

¹ Fumu amavosa rie: Va temu aji nyugabusila bakoli baJudaha baJerusalem,

² nyugukiga bisi malongu motsu na nyubabega o yibususu yiJosaphat; avana nyubatabulila bunsonsi mu diambu dimabi mabalsrael abavu disiala diami aba jogu bamapansa o malongu motsu na mu diambu dibulongu buami abu jogu bamagabana.

³ Bamambuayila batu bami mbanda; bamasumbisa bafudu ufuta bimbembu bibagetu, bamasumbisa numba udila malamu.

⁴ Jenu bisi Tyr na Sidon na baPhilistin, yi duitasi? Duirondi ukabusila pila? Pa duirondi ukabusila pila, meʼ wami nyusundila udugabusila pila.

⁵ Jenu dumabonga lora tsiami tsivema na lora tsiami na abimaba nami bidufunu duneni na biboti, dumabibega o mandagu menu mansambi.

⁶ Jenu dumasumbisa bisi Juda na bisi Jerusalem ombu baGrec ubakakasana vala na yiari yiogu.

⁷ Tumba menu nyubagabusa va mbura aji dumabasumbisila mbana nyudugabusila pila.

⁸ Nyusumbisa baana benu bababaala na babagetu ombu baJuda; bobasumbisa ombu baSeba o dilongu adivu vala; Menu Fumu oyidivosi.

Divita adiusita na bunsonsi

⁹ Tubulanu mambu meni o malongu! Kunsanu divita! Rambusanu bangogaga! Bagora botsu bawendi!

¹⁰ Tulanu mikuati mienu majenga, nesi konduku tsienu makongu! Jandi agugaa na mangolu avosi rie: Nyina mangolu!

¹¹ Lensanu noruga, jenu botsu na bisi malongu abavu yiari yiari gukamanu! Aa Fumu, sundusa bangogaga vana!

¹² Fumu amavosa rie: Bisi malongu barambuyi na bawendi o yibususu yiJosaphat! Avana nyutsanina utabulila bisi malongu abavu yiari na yiari bunsonsi.

¹³ Gaanganu mikuati, temu dutsonsugu jimatola! Ruganu, tsiarilanu mirayisan, yigamunu yimabasa; bansienga bamabasa levi-levi! Mbivulu tsivu tsipuela tsipuela.

¹⁴ Bavu bapuela bapuela o yibususu yibunsonsi; yilumbu yiFumu yika bebeli o yibususu yibunsonsi, yilumbu ayi Fumu olasila kabu andi.

¹⁵ Wisi na tsungi biupindusu na bambuelili bagomuelula.

¹⁶ Fumu ugumba egumbi o Sion, egulusu diufi diandi o Jerusalem. Julu na butamba bimakungusu. Tumba Fumu avu yisuemunu yibatu bandi nesi yivosi yibalsrael.

¹⁷ Mbana dujaba yiri menu nyivu Fumu Nsambi enu aguitsani o Sion o mukongu ami. Jerusalem umueba musiengi uNsambi. Benyi bagomuegutumunu.

Digumba digona dibatu baNsambi

¹⁸ Va temu eni mikongu na bikundubuga biufunisanga digumba. Mijamba miotsu miJuda miubanganga na mamba; mamba mopalila o Ndagu Nsambi na motsatsanga yibususu yiAcacias.

¹⁹ Bulongu buEgypte bubungu, bulongu buEdom buba yika kumu na kumu mu mbari bamalasa baJuda dikasi na bamaboka batu abasamaba na mbela!

²⁰ Tumba bulongu buJuda butsanunungu na Jerusalem utsanunungu te na kula tsiotsu.

²¹ Nyugabusa pila jimalungu mogu aji nyisakagabusa.