Joel 2 - La Sainte Bible en Langue Yipunu

Yilumbu yiFumu yika bebeli

¹ Siganu mimbanda o Sion! Misiyilianu o mukongu uNsambi! Bisi bulongu botsu bareyimi! Yilumbu yikabu jiFumu uruga yiruyi, yika bebeli.

² Yilumbu yipisama, yilumbu yimamungi na mamungi, uruga yiruyi nderi mavuvungi ukibiga mikongu. Labanu dibadi dimakokoku adivu na mangolu adisakalabana na kala na o gusu digomueba dimunongu eni.

³ Va gusu dionyi vavu muji aguisielisini, va nsima dionyi vavu milutsu aminyensi. Va kala bulongu bumaleba nderi nungi jiEden; dinovioga bumakaluga butamba budukanga; vasamaba ne yima yimosi ayi disamabivisa.

⁴ Udigengila, dimalabana nderi bakabala na diwendi mambangu nderi babeyitsi babakabala.

⁵ Udigulu, nderi nduku jimakalu; o julu tsimikongu diyenadumuyila, nderi jimilutsu mimuji ava uinyensili kobu, nderi dibadi dineni adikunsimi utoga divita.

⁶ Batu botsu uregama bereyimi va gusu dionyi; binsi bibatu ukuduga bikuduyi.

⁷ Diwendi mambangu nderi bagora abewendi o utoga, dimati bivaga nderi batoyitsi badivita; dikokoku dikokoku mu nsila andi ne dimosi digepembuyi.

⁸ Digegubini, dikokoku dikokoku dikelisi mulonga andi; divioyi ne va mbura ajivu bitogulu na mutu agodisikiga.

⁹ Dibasi musiengi, diwendi mambangu o julu tsi bivaga nesi umata o julu tsimandagu nesi ukota mu bafenetera nderi badayitsi.

¹⁰ Butamba buireyimi va gusu dionyi julu jimakungusu, wisi na tsungi bimap indusu bambuelili bagemuelula.

¹¹ Fumu amagulusu diufi diandi va gusu dibadi diandi; mulaku andi uvu tindi uneni; adidugusu mambu mandi divu na tindi mangolu. Yilumbu yiFumu yivu yineni na yivu yiranga. Anyi orongula uyiwarila?

Jivu temu ugabuga ombu Fumu

¹² Mbana Fumu amamuevosa rie: Gabuganu ombu garni na mirima mienu miotsu: busanu uji, lilanganu na ndembilinganu.

¹³ Munyongu uilabini mu mirima tsiri upasa biduaru. Gabuganu ombu Fumu Nsambi enu! Jandi avu muboti na mungo yingeba, agaa na yifutsu na abasa na durondu, egabusi murima nsima mu diambu dimikilu ami ekilisi.

¹⁴ Anyi ejabi, tanguji ogabusa murima andi nsima nodugabila miula. Mbana durungula umuvega milendu nesi pagu tsisusu.

Ubusa uji nolembiyila Fumu

¹⁵ Siganu mumbanda o Sion! Tubulanu temu ubusa uji, vaganu yibengyna yineni!

¹⁶ Gukiganu batu! Vaganu yibenguna yiNsambi! Gukiganu bivunda, gukiganu bafudu na banumba nesi baana! Dibaala adibanowela apali o ndagu andi, mugatsi apali o yibuku yiandi yindagu!

¹⁷ Bavagulitsi bapagu abesalili Fumu balili va gari dikotulu na yinyensulu yipagu na bavosi rie: Fumu waka batu bagu kalala! Guyasinga yiri disiala diagu diulasu yisonyi nesi udesu na bisi malongu! Dibandu yi batu boyenavosilanga rie: Nsambi ogu aka?

Fumu uwagula ewaguli batu bandi

¹⁸ Fumu erondi bulongu buandi, amalasa batu bandi yingeba.

¹⁹ Fumu amawagula tsambu tsibatu bandi rie: Nyudutindila ble na malamu madisoga na matsi! Dugogambu na yima! Tsatsabi ngosinga yiri dudesu na bisi malongu masusu.

²⁰ Nyudukakasana bavinitsi bayiari yibanda, nyubabinga o yiari ayigaa na mamba na yivudukanga. Nyubinga bagora abereli va gusu, o yiari yimubu aguvu o wisi epaEli na abeduki o nsima o yiari yimubu aguvu o wisi ewendisini. Mbunga tsibamfumbi tsiunyava yiari na yiari. Anana abamaduvaganga mabi botsiemuyila.

²¹ Butamba, guyalaba keri, labanga nsangu nobueji mu mbari Fumu usala esali bisalu bineni!

²² Bibulu bimusiru duyalaba keri mu mbari kumu atsivu dukanga tsiumuebendisa bisinga na miri miumuebura milunda nesi mufiga na mfuga jirayisan.

²³ Jenu bisi Sion labanganu nsangu nobueji mu Fumu Nsambi enu mu mbari odunoyisila mfula va temu jiwelimina; nyiina, mfula jitega nesi ajiusita nana va kala.

²⁴ Bisagulu biubasa na ble na bansienga bobasa levi-levi na malamu madisoga na matsi.

²⁵ Fumu amavosa rie: Nyuduvinsila bilima abi makokoku mamabunga: mamaba dibadi diami dineni adi nyimatinda utoga nenu.

²⁶ Dujanganga na dugukurungu, duyitsanga diina diFumu Nsambi enu, agumaduvayila bimaga. Batu bami bagomuelaba yisonyi, via!

²⁷ Mbana dujaba yiri menu nyivu va gari baIsrael. Dujaba yiri menu nyivu Fumu Nsambi enu na vagaa Nsambi jisusu. Batu bami bagomuelaba yisonyi, via!