Job 8 - La Sainte Bible en Langue Yipunu

Munu uBildad: yisaku yimasumu

¹ Bildad muisi Chouha amavosa na Job rie:

² Te na temu yi guvosanga? Posulu tsiagu tsivu nderi mungudi aguigumbi!

³ Je Nsambi agaa asungama? Mungo Mangolu Motsu orungula ukalusa dusungugu dibi?

⁴ Baana bagu bababaala bamamuvayila mabi, amabagabusila pila jimabi mogu.

⁵ Tumba pa ndeʼ guirombi Nsambi, pa guisambili Mungo Mangolu Motsu,

⁶ pa guvu uwelimina na usungama agotamba noguwaka kalala. Oguvega abivu biwelimina.

⁷ Abimaleba nagu biuba nderi mua bima bigeyi; abimagusuegulu biuba tindi bipuela.

⁸ Rangimina mambu amamavioga tasa ama bataji benu bamalaba.

⁹ Tuvu bangebi bamasiga na tugejabi diambu. Tuji bilayilayi yika uvioga tuivioyi.

¹⁰ Jogu bogulonsa na guwiji ombu gogu, bogulonsa ama bamalewiji.

¹¹ Yilelenga yiurungula unega pa yigaa va mamba? Dundubi durungula unega pa dugaa na fuyi?

¹² Ava dukivu musomfi na dusakatabulu duisundili ugumuga pa mamba masatsi mbe ka bisinga biotsu bisusu bisakagumuga.

¹³ Anana diubila ombu jogu abelibini Nsambi; abasasungama bobutsiemusa yitu yiogu.

¹⁴ Yitu yiogu yiudeda tindi udeda; nyiina, yivu nderi nsanda.

¹⁵ Ava besingimini ndagu ogu jigaa jiwara, bojisika, ne nana jiurakuga.

¹⁶ Bavu nderi mbari ajiburi biatsi va nyangu; metu majionyi meveyi yivosi o nungi.

¹⁷ Jilavisi ngansi o gari tsimamanyi, tsikoti tindi o tsi dimanyi.

¹⁸ Tumba pa bejiwangi anyi ovosa rie: Jika?

¹⁹ Anana diubila na batu bebana, basusu bovinga va mbura ogu.

²⁰ Nsambi agebuayi musinganyi agewamusi batu babi.

²¹ Ogabusa nsangu agu guyenarekanga, guyenawimbilanga nyimbu tsiduyitsu.

²² Batu abeguvini bobasu na yisonyi; abagaa na yitu bobungu.