Job 7 - La Sainte Bible en Langue Yipunu

Munu uJob (ususu): utata etati mu diambu diNsambi

¹ Nsanunu jimutu va butamba jivu tindi jiranga, avu nderi gora bilumbu biandi biotsu.

² Avu nderi muviga va nyangu aguitatili mua yivosi, avu nderi musalitsi aguivivi futa andi.

³ Anana nyimadugusulu tsungi tsipuela mikolu mipuela yika maguga na maguga.

⁴ Ava nyisilimini nyikewivula rie: Temu yi nyusimbuyila? Je nyutebusa wisi? Nyibukingi te na wisi uitebuyi.

⁵ Dunyuru duami duotsu yika tsombi na tsombi, mukata ami uirubiyi te na pura jiumuenyanguga.

⁶ Bilumbu biami bivioyi mbangu, ne uviolila munongu umubuangitsi, biusuka nderi diivusu!

⁷ Aa Nsambi rangimina yiri monyu ami uvu punga! Misu mami magomuelaba maboti.

⁸ Ndeʼ aguikengili, gugomuekengila; ava guitombili, ngomueba.

⁹ Nana mamungi mesiamuyi na metsiemuyi dedi mosi mutu ekoti o ngila mutubu.

¹⁰ Agomuegabuga o ndagu andi, mbura andi jiusiala mududu.

¹¹ La dibandu ngobila sui; nyunyonganga na uvosa nyuvosanga. Utata nyutatanga na munyongu aguvu nami.

¹² Dibandu yi guikengilili? Je meʼ nyivu mubu? Je meʼ nyivu yiteli?

¹³ Ava nyisilimini na ditasa udila dubembugu nesi mua duvotsu,

¹⁴ vana vana guiteyimisi na mandosi, uindasi goma na biriariamu.

¹⁵ Mbe guntboka uviolila ubueji! Mbe ka menu dufu duwelimina, tsiri ugasa nana.

¹⁶ Vana dedi, nyimatoga. Ngoba monyu mutubu, ndundi!

¹⁷ Mutu la nyi yiri gumukipa? Dibandu yi guimukelisi na murima agu uotsu?

¹⁸ Dibandu yi guimudokimini kedi tsiotsu? Dibandu yi guimusundusili temu tsiotsu?

¹⁹ Temu yi gudundila ukengila? Temu yi gunsingisila mua yivumu?

²⁰ Pa nyimaguvaga dibi, nyurungula ugusuega dionyi? Nsinguli tsia ndeʼ guvu mukelisi ubatu botsu? Dibandu yi gumansolila nsunda? Dibandu yi nyubila mufuna agu?

²¹ Dibandu yi guibusili utanda masumu mami? Dibandu yi gugetsiemusili dibi diami? Yika ufu nyifu, makulu maka o yiduna; ava gutombila gugondaba.