Job 40 - La Sainte Bible en Langue Yipunu

Job uwagula ewaguli

¹ Fumu amanengila Job na amamuwivula rie:

² Ndeʼ aguitsundi na Fumu gulunga. Ndeʼ aguitumuni pagu nami gurungula uwagula motsu mana?

³ Job amawaka Fumu rie:

⁴ Menu ngaa na tsongu. Diambu yi nyuguwagula? Nyusika dikaka diami va dibanga.

⁵ Nyimavosa kala, ngomuewakanga. Nyimawarisa kingu ami, ngobuesa disusu.

Munu uFumu

⁶ Fumu amamuewaka Job va gari mungudi rie:

⁷ Warisa tsanda agu nderi gora jimangolu; nyuguwivula bivu na ndeʼ gukawagula.

⁸ Gutumuna paga na bunsonsi buami? Gupega mbela yiri gudila ndunga?

⁹ Guna mangolu dedi nami? Nde guivayi bidumi nana nyivayingi?

¹⁰ Kabogu duara bikutu biagu bibunsonsi abilasi buneni na bundumba buagu.

¹¹ Lasa misasi mikabu agu na yisuisu yiagu yimosi gukasundusa bango dunangu.

¹² Nyiina, na yisuisu yiagu yimosi basundusi! Gesumuna abagekipi yitu nesi migaga.

¹³ Bafundiyibotsu va mosi mu difufundu nodibiga binsi biogu o tsi pisama!

¹⁴ Mbana nyugukakisa gumalunga tindi ulunga!

Mfubu

¹⁵ Labati yibulu ayi benengili mfubu, nyimajisunda dedi mosi nana nyimagusundila. Jiji biriri dedi mosi na ngombi.

¹⁶ Labati mangundu mandi, ka muna mangolu ma! Labatianu, ka muna mangolu ma!

¹⁷ Esimbuli muyila andi sululu; miansi mimakulu mandi mivu fikafika.

¹⁸ Bivisi biandi bivu nderi milunga mikunga, mbansi tsiandi tsivu nderi bibuku bimadilu.

¹⁹ Avu yisalu yitega yibisalu biami! Menu agumajisunda, nyikakisi mangolu mandi.

²⁰ Jidili biguji biandi o mukongu agu bibulu biotsu bitsanini.

²¹ Jisilimi o tsi mawansi jisuemi va gari tsi bilelenga nesi o manga.

²² Mewansi mejikubiyi na bidumbitsi biogu bikori bimujamba bijisueyi.

²³ Ne pa mujamba ubasa nyidu, jigerini; ne pa mubasa na tundila jiotsu, jivu sui.

²⁴ Yiotsu ayi jidibuli misu, mutu orungula ujigaanga nojitoba mbasu ukotisa budilu?

Mukuimbi nyoga

²⁵ Gurungula uloba mukuimbi nyoga? Gurungula utunga dulimi duandi na mukudu?

²⁶ Gukotisa mukudu mu miunu miandi mimbasu? Gurungula ugugaanga na dukonduku?

²⁷ Gugulembiyila ndembu tsipuela? Guvosa mambu mawelimina nagu?

²⁸ Guvangana pangini nagu yiri guba muviga agu mutubu?

²⁹ Gusana na uonyi nderi guisani na tsoli? Gumutunga ukibisa baana bagu babagetu?

³⁰ Bavubitsi besumbisi nyama tsiandi? Betsigabili batiyitsi bamuteti?

³¹ Gurungula utoba dunyuru duandi na mutobu nesi muru andi na banyobu?

³² Ka leyisakiga dikaka! Gumuedivaga?