Job 4 - La Sainte Bible en Langue Yipunu

Munu uEIifaz: Ka muna ubueji gu uvu na mutu agu Nsambi ekilisi

¹ Elifaz muisi Teman amavosa na Job rie:

² Pa tuweliga uvosa gurungula udiwarila? Anyi orungula uba sui?

³ Gumalonsanga basusu temu tsipuela, gumawarisanga abadeda,

⁴ malongi mavu mawelimina uwarisa batu abamabanda udeda, abagaa na mangolu, mereliyi abamakonda mifuna.

⁵ Ava ndeʼ beni guilabi maguga gumanyonga! Ava maguga megubembili gumabuliga murima!

⁶ Gumaba usigama va gusu Nsambi, nsanunu agu jisamaba na bitoli, ndeʼ agugaa na penda gugorungula usunsa murima?

⁷ Letasati: mbe gumalaba batu abagaa na mbela nesi misinginyi abamatopulu maguga?

⁸ Menu nyimalaba rie: abefunisingi mabi na purulu bodila yisaku yimabi na purulu.

⁹ Abepupisi kabu Nsambi, kabu eni jiubasielasana.

¹⁰ Ne pa bavu na mangolu mamimfumfu mibimbungu, bagoba na tsongu; bonyigu na bobungu.

¹¹ Boba dedi na bimbungu abigaa biguji; abibokisi baana bogu na nsala.

¹² Diuleba diufi dimaba digeyi, nyimadigulu, nyimagulu nesi mangunguri,

¹³ matasa mami mamapupusu mukolu na yiriariamu, mukolu ava batu basusu bamabila bilu.

¹⁴ Nyimagaangu na goma na keri meʼ uotsu yika uregama.

¹⁵ Yinyunyi yimavioga bebeli nami nyimagulu ndunsi yika ujilumuga.

¹⁶ Nyimayilaba nderi mutu, nyimamulaba nderi yidumbitsi, vamaba duvotsu mbana mangunguri rie:

¹⁷ Mutu oba asungama va gusu Nsambi andi? Oba alioma va gusu jandi agumamusimda?

¹⁸ Pa Nsambi agevayili basalitsi bandi yitu

¹⁹ na pa elabi buduka bubisi julu, tambusa na jogu abetsani mu ndagu tsibutamba abamabongulu mu dufufundu bagorungula ugesumuga nderi muyinyi?

²⁰ Ubanda kedi te na tsisiga begesumunu bebungini mutubu, ne mutu mosi agebakipi.

²¹ Nana kamba tsiogu tsitabuyili jogu wogu befuangingi tsiri ujaba diambu!