Job 36 - La Sainte Bible en Langue Yipunu

Elihou ulasa elasi nana Nsambi elonsili batu

¹ Elihou amabuela rie:

² Job lekela mua pesu mbana nyugulonsa, nyikivu na mambu uvosa mu diambu diNsambi.

³ Dujabu duami duiruyili vala, nyuvega ndunga ombu musunditsi ami.

⁴ Dingensa posulu tsiami tsigaa na mamfurulu, ngetsikidini uvosa amami.

⁵ Nsambi ana mangolu na agebusi ne mutu mosi; Avu adugu na diela diandi.

⁶ Ebokisi abagekipi yitu nesi migaga, ewamusi abamakambulu.

⁷ Egengili batu basungama. Tulevosa mambu mabakaga. Nsambi ebatsanisi urumanga, tumba bekematisa.

⁸ Pa bamatungu na bapanga na bamalasu tindi maguga,

⁹ Nsambi ebalasi adi bamavaga nesi mogu masusu nesi dunangu duogu.

¹⁰ Mbana edibuli matuji mogu ubalubusa; ebalonsi uliyila mabi mogu nsima.

¹¹ Pa begulu nokesunsa va gusu Nsambi bomanisila bilumbu biogu nobueji.

¹² Pa bagegulu, boboku na dijenga bofu bipingu.

¹³ Batu babi bavu, benyoyili Nsambi kabu, bagetatili Nsambi ava bekapulu bapanga.

¹⁴ Befuangingi vana bungebi buogu, bemanisili nsanunu tsiogu na yisonyi.

¹⁵ Tumba Nsambi ewaki abamakambulu kalala na purulu tsiogu, esalisi purulu tsienu ubalubusa.

¹⁶ Kala Nsambi amagugusulila munyongu amagubuesanga maboti na maboti. Tavula agu jimabasanga de na biguji biboti.

¹⁷ Tumba pa gumana munu agu nderi mutu mubi gugotamba notabululu bunsonsi abu guitabulili basusu.

¹⁸ Kabu jiyagurombisa dilensa! Guyakedunsa na ditasa dinyobu. Nsambi esumbu?

¹⁹ Nesi biboti biagu nesi lora agu bigowelimisa nesi mangolu magu maneni.

²⁰ Guyaviva nesi mukolu agu bapuela botsiemuga.

²¹ Kebana yiri gugovaga mabi. Dibandu yi guilabili maguga memama?

Bukaga buNsambi

²² Nyiina, Nsambi avu kaga, avu na mangolu motsu, avu tindi mulonsi, vagaa ususu nana jandi.

²³ Anyi omulonsa nsila aji ovioyila? Anyi omutsingula rie: Gumavaga adisawelimina? 36, 37

²⁴ Rangimina ukakisa bisalu biandi abi botsu besangili na nyimbu tsiogu.

²⁵ Abi botsu begengili nesi belabilili.

²⁶ Nyiina, Nsambi avu muneni, buneni buandi buituviolili; bilima bigorungula utalu!

²⁷ Eduti maberi mamamba, emakotisi mu mamungi,

²⁸ mamungi menoyisi mfula, mfula aji batu bapuela bapuela benogulu.

²⁹ Anyi orungula ujaba nana mamungi mevioyili? Anyi orungula ujaba nana bidumi bidumini?

³⁰ Guidijabi, la Nsambi oyilasi tsiemu tsiandi oyidibiyi ndonga tsimubu.

³¹ Mfula atsi enoyisingi tsiveyingi batu monyu, tsibaveyingi biguji bipuela bipuela.

³² Egaangi nesi tsiemu na makaka mandi, utsitinda o mbura atsi esungi.

³³ Mu bidumi elasi yiri avu, ne migamba mijabi yiri uruga eruyi.