Job 30 - La Sainte Bible en Langue Yipunu

Munu uJob (ususu): Temu ejiji

¹ Labatianu va temu ejiji nyivu kwaku, nesi bangebi bagekitsi diuleba bataji bogu bagaa dedi na bamondi abekelisi migamba miami!

² Dibandu yi nyusalisa mangolu mami? Borungula ukwamusa?

³ Bamanyita na maguga na nsala, bamaromba mbura uyejibunga nyiina, mbura ajigaa na yijalala, ajivu yika dubungu na dubungu.

⁴ Bedokulingi magaji, bejangingi ngansi tsimugeneta.

⁵ Bamabingu bamayenagumuganga va nsima ogu nderi badayitsi bavu,

⁶ bamaromba mbura o bibususu, nesi o malima nesi o bansiga.

⁷ Bamagukama o tsi mawansi, migamu miogu mimagulunu o tsi yifundi:

⁸ batumbalagu na abagorungula utalu, abamasansu na banguangu.

⁹ Nyidesungu mu nyimbu tsibaana bogn nyivu kwaku jibilombi biogu.

¹⁰ Bendabi nsoruru na bamandiyila nsima, bagelabi uvura nesi umfutila mateji.

¹¹ Yiotsu ayi Nsambi amandetsa nonsundusa, basaa na yida-mamba mu diambu diami!

¹² Yinombu yimarelama umfuengilila, bamatambila murambu umbeta. Bamatumuna umboka.

¹³ Bamatabula nsila ami, bamasala unsiemusa, ne mutu mosi agokwamusa.

¹⁴ Bamatuba diviogulu ombu abamakaaganga; ukueka bekueki uyena batsiarilanga.

¹⁵ Dusiensi dumakambisa, duyitsu duami dumatsiemuga tindi utsiemuga, bundumba buami bumatsiemuga nderi dimungi.

¹⁶ Yika maguga na maguga mensiengili, ngaa na disusu yika utatanga.

¹⁷ Mukolu nyugulungu buali ta na bivisi, biukandisi nesi yilu.

¹⁸ Nsambi amakaanga yikutu, embaiiyi te na nyigulu buali.

¹⁹ Amakolasana va diobu: nyivu nderi difufundu na dibufu.

²⁰ Nsambi ami nyigutatili, ndeʼ gugekwaguli; diuleba nyiji va gusu agu guipayili nderi gugendabi.

²¹ Guindasingi dikasi, guinsoyisi na mangolu magu.

²² Guindanguli nondendusa na punga, mungudi uipiunsi yiari na yiari.

²³ Nyijabi guitombisi uweʼ o mbura jiabafu, nyiina, mbura aji batu botsu bewendingi.

²⁴ Ava dubungu mutu agowala miogu? Jandi oyilabi maguga agaa na nsala duwamusu?

²⁵ Ngelili va mosi na jandi agumalaba maguga? Nyisamalabanga munyongu va mosi na abamakambulu?

²⁶ Nyimavivanga maboti tumba maguga mamatasuna; nyimaronda yijalala tumba yika pisama na pisama.

²⁷ Murima ami guibukingi temu tsiotsu, bilumbu bimaguga bimansutusu.

²⁸ Nyimaduara yifuila; ombu gami nsangu jigatsi! Yika ugamuga nyigamuyingi.

²⁹ Migamu miami mimaguiunu dedi na mimakoju nesi yibidu.

³⁰ Mukata ami umapinda nyuru tsiami yika na muji.

³¹ Sambi ami jisiyi yika nyimbu tsibukuili, ngomfi ami jigulunu yika diufi dimunyongu.