Job 3 - La Sainte Bible en Langue Yipunu

MAMBU AMAMAVOSU NA JOB NA BAMBATSI BANDI BARIERU Munyongu uJob: monyu uvu na tsongu?

¹ Mbana Job amatabula diambu uvosa rie:

² Aa mbe nyisamaburungu. Amabuela rie:

³ Ka muna mulogu gu uvu na yilumbu ayi nyimaburulu na mukolu agu nguji ami amadila dimi!

⁴ Yilumbu yieni yigengulungu yika pisama! Aa Nsambi ndeʼ aguvu o julu guyayikipa! Yilumbu yieni yibi yika pisama na pisama!

⁵ Pisama ajivu fio jiyidibiyi, yibi yilumbu ayigaa na nyangu!

⁶ Mukolu eni ubi na pisama fio, uyamuetalu mu yilima, uyamuetalu mu batsungi!

⁷ Nyiina, mukolu eni uyaba na tsongu, mukolu eni uyaba na nsangu!

⁸ Utubulu mukolu eni purulu na abejabi uloga bilumbu na abejabi urambusa Leviathan.

⁹ Uyasingusu ulaba mbuelili jikedi! Uviva uivivi nyangu, yika kulini; uviva uivivi mavuvungi, yika kulini!

¹⁰ Usamakubitsa purulu tsinamunyi!

¹¹ Dibandu yi nyisamafuila o moji nguji ami? Dibandu yi nyisamafuila va julu duburu?

¹² Dibandu yi muburisitsi amakwakila? Dibandu yi nyimanuisulu?

¹³ Mbe nyimafu mbe nyiji o ngila sui, mbe nyiji yilu mbe nyiji sui,

¹⁴ va mosi na bakaga na baneni babutamba aberungulili mandagu amamapansiga,

¹⁵ va mosi na baana babakaga abavu na lora na abamabasa mandagu mogu na bima bilorajivema.

¹⁶ Aa mbe nyisamaburu, diwendi rie: nyivu dedi mosi na muana agumaburu afu kala.

¹⁷ O mangila batu babi bagemuepupa, batu abesaa na mangolu uvuma bevumi.

¹⁸ Bakoli wandi uvuma bevumi, bagemuegulu diufi dimungo dikasi,

¹⁹ muviga esaa o tsi durumu dufumu andi. Bageyi na baneni baji dedi.

²⁰ Dibandu yi Nsambi elasili bango maguga yijalala nesi ombu jogu abamatsotsu utsananga na munyongu?

²¹ Uviva bevivi dufu tumba dubarini, bedurombi nderi basusu berombi bungunu.

²² Belabi nsangu nosangila ava bekotili o mangila!

²³ Tumba menu nyivu mutu agugejabi agu eweʼ, Nsambi amandibiga o nsima yibaga.

²⁴ Pa vengu nyuji, yika utsukama nyitsukimi, migamu miami migaa na yilosi.

²⁵ Adi nyidumi adina nyilabi! Maguga motsu ama nyimatasa mamatasuna!

²⁶ Nyisaa na duvotsu, ngaa sui, ngaa na yivumu, nyilabi yika maguga na maguga.