Job 27 - La Sainte Bible en Langue Yipunu

Munu uJob (ususu): mungo mbela olabana na Nsambi?

¹ Job amamuewaka rie:

² Nsambi agumakwimina musuga, jaʼ beniejabi! Mungo Mangolu Motsu agumambasa na munyongu, jaʼ beni ejabi.

³ Yitsingu yiami yiotsu te na mangolu ama Nsambi epeyi mosuka,

⁴ ngovosa amagaa masungama, ngofura wandi.

⁵ Ngaa na ditasa uduvega ndunga! Te na muvumu ami utabuga nyuvosanga rie: Nyina ndunga.

⁶ Tsatsabi, ngaa na mbela na ngodedanga. Diufi dimurima ami digensiembi, via!

⁷ Viaga tsiri menu tumba muvinitsi ami, agudila mukilu agumasuegulu batu babi. Jogu abetumuni bodila mukilu ubukongu!

⁸ Je pa Nsambi otabula muvumu mutu mubi mutu eni aki na tsongu?

⁹ Je Nsambi egulu migamu mimungo munyongu ava mutu eni agaangulu na maguga?

¹⁰ Je olaba nsangu na Mungo Mangolu Motsu? Je osambilanga Nsambi temu tsiotsu?

¹¹ Nyudulonsa nana Nsambi esalili, ngodusuega tindi matasa maMungo Mangolu Motsu.

¹² Tumba jenu botsu dumatsiyisa adivu nandi, dibandu yi duivosili mapopopu?

Motsu mavu piovioga

¹³ Adina dikabu adi Nsambi esueyiii batu babi, adina divu dikabu adi Mungo Mangolu Motsu esueyili mungo dikasi:

¹⁴ ne pa obura baana bababaala divita diubabokisa; baana bandi bofu na nsala;

¹⁵ ne bansialutsu boboku na yivunga, bakuili bogu bagobalila.

¹⁶ Pa bogukiga lora jivema nderi difufundu pa bogukiga biduaru ne ubuayila mondi

¹⁷ adiulabana adidi rie: mutu usungama obiduara, musinginyi ogabana lora tsiandi tsivema.

¹⁸ Ndagu aji batu beni bamarunga jivu ndagu nsanda, jivu nderi murorombi umukelisi unungi.

¹⁹ Besilimi na busina temu ajiusita: ava berambuyili biotsu bimatsiemuga.

²⁰ Goma jibapevisi nderi nyidu, yimbongila yibabongi va mukolu.

²¹ Punga jiyiari ayi wisi epalili jibavembuli, jibananguli va mbura tsiogu.

²² Nsambi asamabalasa yingeba, amabavaga nderi nsunda, te na vengu borina ukumba bidimbu.

²³ Bebasiyili masuku ava bebalabili nana, bebasimini ava betsiemuyili.