Job 24 - La Sainte Bible en Langue Yipunu

Munu uJob (ususu): Nsambi agegubitsi batu babi uvaga dibi diogu

¹ Dibandu yi Nsambi, Mungo Mangolu Motsu asakadila temu utabulanga bunsonsi? Dibandu yi asakadila temu ulabana na basigama bandi?

² Bamosi bekuekisi bilimba bimandilu, basusu bebunguli migamba ami bedayingi.

³ Bamosi bepatuli yisiana buru andi, basusu bebongi ngombi mukuili tuga.

⁴ Bepembusi bijaga mansila, betsotsi bifufu uyenasuemanga.

⁵ Bavu nderi baburu bamusim, bewendingi kedi uyenarombanga biguji. Nyiina, bedilingi biguji bibaana bogu.

⁶ Bejangingi mimbendila mimanungi, bedokulingi mirayisan o manungi mabatu babi.

⁷ Besilimingi penyi, bagaa na biduaru, bagaa na mamfunga ugaga yiotsi.

⁸ Benogulu mfula o mikongu; digambu dimandagu dibarombisi ukota o bansiga.

⁹ Bepatuli mukuili muana agukivu va tulu, bebongi biduaru bibijaga batuga.

¹⁰ Besalingi penyi, bagaa na biduaru, befuangingi na nsala ava beyenabeyila biguji bingana.

¹¹ Bebatsotsi ugamanga matsi maoliva, begamuniningi mirayisan tsiri ubimba ne ubimba.

¹² O misiengi uvu yika bibimu na bibimu; mutu agumanemina egamuyi rie: Kwamusianu; tumba Nsambi agegubitsi batu beni na bingana biogu.

¹³ Batu babi bevini yijalala, bagevioyi mu mansila amavu na yijalala. Nyiina, bagemavioyilingi.

¹⁴ Yikongu eretsimi va muvuvungi, eboki yijaga nesi agumakambulu, mukolu ekevaga mudayitsi.

¹⁵ Yimbembu evivi bakoku batega; evosi rie: Mutu agpndaba, ekubiyi yinsi yiandi tsanda.

¹⁶ Mudayitsi ebuli mandagu mukolu, ava nyangu ekedibiga o gari tsimandagu; agejabi ayi benengili nyangu.

¹⁷ Ombu gogu bebandi yilumbu yika mukolu, bamaguku kala na nsoruru tsimukolu.

¹⁸ Jenu beni duivosi rie: Ka muna mbangu ji betsiemuyi nderi yima ayipevi mu nyidu; mbura ogu jikaluyi mulogu; bagemuedokimina mfuga tsiogu.

¹⁹ Nana yigangi yikamusi mamba anana jogu abevayingi masumu botsiemuga o mbura jiabafu.

²⁰ Nguji ajimababura amabalibana, bavu yika bayinyi na bayinyi bagemuebaranguna. Mutu mubi amaberusa nderi muiri.

²¹ Belasi bagetu maguga nesi binguma bagevayili bakuili maboti.

²² Tumba Nsambi ana mangolu ubinga bango dikasi. Yiotsu yina tsongu jimonyu jisatsi.

²³ Temu tsimosi ebasingisi utasa bagaa na diambu tumba ebagengili yisuisu na ejabi nesi bifu biogu.

²⁴ Batu bebana bomuedila mua mangolu mbana kondini! Betsokimi nderi kembu ajinengini. Begumuyi nderi yirongula ayimatabulu.

²⁵ Adi nyivosi divu dingensa! Anyi ana bukidi undengila yifutsi nolasa yiri ufura nyifuri?