Job 23 - La Sainte Bible en Langue Yipunu

Munu uJob: Nsambi agerondi yiri tuvosasana

¹ Job amawaka rie:

² Diuleba nyimadunda utatanga, kondini, mitatu miami migesuki.

³ Aa mbe nyijabi agu nyulabila Nsambi! Mbe nyurungula utola nesi o dimbu diandi,

⁴ mbe nyumulasa diambu diami, mbe nyumupalisila munu ami,

⁵ mbe nyujaba adi owagula mbe nyujaba adi onsingula.

⁶ Je ombetsa na mangolu mandi maneni? Tsatsabi, akulu yika ugulu.

⁷ Mutu usungama otsunda nandi? Nsonsi opeganga ndunga?

⁸ Pa nyuwenda o yiari ayi wisi epalili, agaa guna. Pa nyuwenda o yiari ayi wisi ewendisini, ngemulabi.

⁹ Usala esali o banda, ngemulabi; usuema esuemi o tandu, ngorungula umulaba.

¹⁰ Tumba ejabi nsila aji nyivioyili; dedi mosi nana lora jipitsulu o muji, nyinowetsungu meʼ wami nyupala nyiwelimina.

¹¹ Nyimatsiarila taka tsiandi; nyimawendanga muna nsila andi na nyisamapembuga.

¹² Nyisamabusa maruma mandi; nyimadedila mambu mandi motsu.

¹³ Tumba pa amatabula diambu anyi omugabusa nsima? Adi erondi adina evayi.

¹⁴ Odugusu diotsu adi amatasa upayila ne masusu ama otasila.

¹⁵ La dibandu nyibakimi murima ava aji bebeli nami; yiotsu ayi nyimurangimini, nyimudumingi.

¹⁶ Nsambi amambasa na dukamba, Mungo Mangolu Motsu amambasa yomumu.

¹⁷ Tsiri pisama ajikambisi, tsiri dimungi adikumbi.