Job 22 - La Sainte Bible en Langue Yipunu

Munu uElifaz: mbela Job

¹ Elifaz muisi Teman amamuevosa na Job rie:

² Mutu orungula uba tsongu jiNsambi? Viaga! Mutu avu tsongu jijaʼ beni.

³ Usungama umutu uvu diambu na Mungo Mangolu Motsu. Yi edili viri pa guisungiyi bifu biagu?

⁴ Guitasi usiemba egusiembi ugutabulila diambu? Mu mbari guiyitsi musuga andi?

⁵ Dingensa egukilisi mu diambu didimbunga diagu na mabi magu amavu mapuela mapuela.

⁶ Gumatsotsa mutu nagu uguvega tuga, gunomupatula yiduaru yiandi, amasiala penyi.

⁷ Gusamavega bango puila mamba, gusamavega bango nsala biguji.

⁸ Gumawakisa bango mangolu bulongu, gumasingisa bango dunangu utsana muna.

⁹ Gumagabusa bakuili miogu na miogu, gumakambisa bisiana.

¹⁰ La dibandu gumarambulu mirambu yiari na yiari, goma jimasundila ugugaanga.

¹¹ Guilabi tindi pisama fio, guilabi minduendu migudiamisi.

¹² Nsambi agaa o julu? Gengila o julu agu bambuelili bavu bavu tindi o julu.

¹³ Mbana guiwivuli rie: Diambu yi Nsambi ejabi? Orungula ulaba ayivu o tsi mamungi?

¹⁴ Mamungi memutsiengili te na agemuelaba kengili, ulinga elingi o yiari yiandi o julu.

¹⁵ Kabogu guirondi uvioga mu nsila jikala aji bavayitsi bamabi bamavioyilanga?

¹⁶ Abamagusulu mbe temu jisakatola, bamasunda uvioga nderi mueyi agumapubuga.

¹⁷ Bamatsingula Nsambi rje: Kakana netu; Mungo Mangolu Motsu, diambu yi orungula utuvayila?

¹⁸ Diuleba amabasa mandagu mogu na busina, viaga, ngorungula uba na yipoti na batu bebana!

¹⁹ Basungama bolaba dubunga duogu na bosangila; agugaa na mbela bobadesanga rie:

²⁰ Labatianu busina buogu bumasielusunu na muji!

²¹ Kabogu kevega ombu Nsambi mbana gudila duvotsu; mbana gumuelabanga maboti na maboti.

²² Gulu malongi mandi, kelisa mambu mandi o murima agu.

²³ Gabuga ombu Mungo Mangolu Motsu, jandi omueguwarisa; kakasana motsu amagaa maboti.

²⁴ Buaga lora agu o difufundu, gukajisila o mujamba va gari mamanyi;

²⁵ Mungo Mangolu Motsu oba lora agu, nesi lora tagu jivema tsipuela tsipuela.

²⁶ Kabogu gulasa Mungo Mangolu Motsu ubueji, gugomueba tsokudu va gtisu Nsambi.

²⁷ Gumusambila, jandi oguguhi, gudugusu pangini itsi gumavangana.

²⁸ Diambu adi gutabula diulabana, yijalala yiumonitsanga nsila tsiagu.

²⁹ Nsambi esundusi bango dunangu, egobuli mavolambombu.

³⁰ Ewaki batu babi kalala, abana bogobulu mu diambu dindunga agu.