Job 21 - La Sainte Bible en Langue Yipunu

Munu uJob: maboti mabatu babi nana mavu

¹ Job amawaka rie:

² Guluanu mambu mami, ngegulu mbembugulu tsienu tsisusu.

³ Kokolu tsienu nyirondi uvosa nyinomana uvosa durungula undesanga.

⁴ Je mutu nyitatili? Tsatsabi! Dibandu yi pugu jigonsukila?

⁵ Kengilianu na dukambulungu; nsimininganu, duvola sui.

⁶ Pa nyirangimini motsu ama nyilabingi meʼ uotsu nyireyimingi na goma.

⁷ Dibandu yi batu babi bagefuangingi? Dibandu yi bagetsiemusingi mangolu ava bununu?

⁸ Belabi ne bategula bogu belabi bandelabongu bogu dibangugulu.

⁹ Bavu na tindi duvotsu, bagaa na goma via! Mukilu uNsambi ugebabembi.

¹⁰ Bangombi bogu bejangingi, bangombi bogu bedili mimi amagevioyi.

¹¹ Baana bogu belingingi nderi migamba, bandelabongu bogu besaningi nana berondili.

¹² Bewimbilingi na bandungu na basambi, besangili ava besiyili dimbika.

¹³ Bomana bilumbu biogu na nsangu, dufu duogu dugebi na mambu.

¹⁴ Tumba bamatsingula Nsambi rie: Kakana netu; tugerondi ujaba ama guirondi.

¹⁵ Mungo Mangolu Motsu anyi avu yiri tuba baviga bandi? Yi tudila umusambilanga?

¹⁶ Batu bebana bagebangingi na maboti? Viaga, ngorungula uba na yipoti na batu bebana!

¹⁷ Je lambi tsiogu tsisundili utsima? Je besundili ubungu? Je kabu Nsambi jilabini ombu gogu?

¹⁸ Je bavu nderi mikondu amimavembulu na punga? Je bavu nderi dufufundu adimamatusu na yimbongila?

¹⁹ Kabogu jabanu rie: Baana babatu bebana bokilusu na Nsambi. Mbe divu diwelimina, Nsambi okilisa bango mbela, adina digobalubusa?

²⁰ Jogu bogengila dubungu duogu, bolasu kabu jiMungo Mangolu Motsu.

²¹ Temu ogu jinosuka, bomuekipa mambu mabaana bogu?

²² Je bolensa Nsambi diela? Tsia jandi aguitabulili nesi biansa bunsonsi?

²³ Bamosi befu nesi na digumba, bavu na duvotsu na bavu tindi sikiri.

²⁴ Bamaputa tindi uputa, bana mangolu mabufudu.

²⁵ Basusu befu na munyongu tsiri ulabanga ne maboti.

²⁶ Botsubegabuyi mu difufundu, botsu bekutu na bayinyi.

²⁷ Kebananu, nyijabi matasa menu, nesi bunsonsi abu duitabulili!

²⁸ Duiwivuli rie: Ndagu bango mangolu jika? Ndagu jibatu babi jika? Ka muna diambu di!

²⁹ Jenu dusakawivula balinsi bivu? Yi bewaguli?

³⁰ Mu yilumbu yimaguga mutu mubi edili diambu? Mu yilumbu yikabu Nsambi ewaku kalala?

³¹ Anyi emusiembi? Anyi emugabusili pila?

³² Jaʼ beni ufu efu, bemutsiyi, bekelisi ngila andi.

³³ Bapuela beyenadukanga mfumbi andi, bapuela beyenadukanga yigara yiandi. Bapuela boyenabasisa yiduna na butamba.

³⁴ Mbembugulu tsienu tsika? Kabusulu tsienu tsiri na mfurulu?