Job 19 - La Sainte Bible en Langue Yipunu

Munu uJob: va disukusulu Mugobutsi okobula

¹ Job amawaka rie:

² Te na temu yi dundasilanga maguga nombulisa murima na posulu tsienu?

³ Dumansienga na uviolila yigumi yikumbu. Dugelabi yisonyi unsoyisa nana?

⁴ Pa ngensa nyimatsimbu adina digedugengili.

⁵ Jenu duitasi baneni duvu? Duitasi duna musuga undasa yisonyi?

⁶ Jabanu yiri Nsambi amambelusa amakaanga mu disinga diandi.

⁷ Guluanu, nyigamuyi rie: Nyimatsungulu, ne mutu mosi agekwamusi; nyibuesi ugamuga, kondini!

⁸ Nsambi amakaga nsiia, ngorungula uvioga; Nsambi amavaga nsila ami yika pisama na pisama.

⁹ Amapatula bundumba buami amapula dugaba duami.

¹⁰ Amakungisa yiari na yiari, yika uweʼ nyiweʼ, tsongu ami jimapatulu nana muiri umarakuga.

¹¹ Nsambi amanyoyila tindi kabu, amapaga dedi mosi na mutu aguimuvini.

¹² Mabadi mandi motsu mamagukama; bamabala nsila utola ombu gami, bamavaga milaku miogu o ndagu ami jitsanda.

¹³ Nsambi amakakasana baana bataji bami nami. Bambatsi bami bamatungila fundu undiyila nsima.

¹⁴ Bisi ndagu ami nesi aba murima, bembusi. Botsu bana bamandibana.

¹⁵ Nesi benyi aba nyimadilanga. Basalitsi bami bekengili nderi muenyi nyivu, nyivu nderi kwaku ogu.

¹⁶ Nyimanengila musalitsi ami, amandimbula; ne nyimamulembiyila, kondini.

¹⁷ Mugatsi ami agorungula uwarila yivumu yiami, ne baana bami bendabi nsoruru.

¹⁸ Nyilensungu nesi na baana bageyi, pa nyiretsimi bendesingi.

¹⁹ Bambatsi bami bamurima bendabi nsorum, aba nyimarondanga bamandiyila nsima.

²⁰ Nyivu yika bivisi na bivisi; nyimasabuyila muyamba.

²¹ Jenu bambatsi bami ndasianu yingeba! Kokolu tsienu, Nsambi jaʼ beni amandimba!

²² Dibandu yi duifubinini na Nsambi uyenakuananga? Dibandu yi duipinini?

²³ Aa mbe diwelimina yiri mambu mami mosonugu mbe mosonugu mu dibuku;

²⁴ mbe bobonga nesi mukaku ubudilu, mbe bobaka amami mu dimanyi, nyiina, moba muna mutubu!

²⁵ Tumba nyijabi yiri Nsonsi ami aji monyu, jandi agutabula bunsonsi busita vava tsi.

²⁶ Ava mukata ami ubungulu, nesi musonyi uotsu yika ubola ne nana nyulaba Nsambi.

²⁷ Meʼ beni nyumulaba nana avu, nyumulaba na misu mami tsiri mutu omundabila. Ka muna nsangu ji, ava nyumulabila.

²⁸ Mbana duwivula rie: Dibandu yi tuimutungili fundu? Dibandu yi tuimukuanini?

²⁹ Dumanu dijenga; kanda tsienu tsidurombisi dufu! Jabanu rie: Nsambi avu nsonsi enu.