Job 18 - La Sainte Bible en Langue Yipunu

Munu uBildad: diambu dimutu mubi

¹ Bildad muisi Chouha amamuevosa rie:

² Temu yi gumanina uvosa mambu meni? Letasati mbana tuvosa.

³ Dibandu yi tuigengulu na Job nderi tuvu bibulu? Dibandu yi guitugengilili nderi biduka?

⁴ Mbe ka ndeʼ Job kabu agu jigutsoyisi, jionyi jiugudisa bulongu? Jionyi jiukamusa mamanyi?

⁵ Yijalala yimutu mubi yiutsima! Milutsu mimuji andi miutsima wandi!

⁶ Yijalala yiukaluga pisama o ndagu andi, lambi andi ajivu jilelugu jiutsima.

⁷ Taka tsiandi tsiugufusu, diuleba ana mangolu, oberuga.

⁸ Taka tsiandi tsiukobana mbusa, osundila utsudama o dubila.

⁹ Owakulu mu murambu va mupilingi murambu eni uba ndindindi.

¹⁰ Mukudu umasuegu o tsi butamba umamurambulu va muanda.

¹¹ Goma jimasundila umugaanga jimamubatiga nenena.

¹² Nsala jimatsiemusa mangolu mandi, maguga memutsiengili yiari na yiari.

¹³ Mukata andi umakuduga, mbunga dufu jimunami.

¹⁴ Amapalusu o ndagu andi, amabegu o mbura jiabafu.

¹⁵ Ndagu andi jiusiala pavala, mutu ususu otsana muna. Fulu jiukuku va mbura andi.

¹⁶ Ngansi tsiandi tsimagumuga o tsi; bitayi biandi bimatatabuga.

¹⁷ Bagemuemurangimina, ne diina diandi digemuerangunu.

¹⁸ Amagusulu o yijalala amakotusu o pisama, amabingusu utsana o mbura jibupinsa.

¹⁹ Agaasila ne muana ne mutegula ombu batu bandi, nesi mutu aguvu monyu va mbura andi.

²⁰ Kula atsiuruga tsiukambulu mu dubungu duandi, dukula duedudu dugaangu na yisonyi.

²¹ Anana dilabinini nandi na ndagu andi. Anana divu na batu abedikuli Nsambi.