Job 17 - La Sainte Bible en Langue Yipunu

Munu uJob (ususu): yitu yimasuka

¹ Muvumu ami umatabuga, bilumbu biami bimasuka, ngilauvivajipivi.

² Badesitsi bensiengili yiari na yiari, bisiengu biogu bigepeyi dukanda?

³ Nsambi abi nderi dugasu duami, anyi oba nderi tuga ami?

⁴ Gumatsiemusa dujabu duotsu dubambatsi bami; kabogu guyabasingisa ukematisa.

⁵ Bavu nderi mutu agu nongu jibuagulu, abefundi bambatsi bogu na baana bogu boba bidunga.

⁶ Batu bamapaga kwaku. Bemfutingi nesi mateji.

⁷ Nyimagaangu na yisonyi; bilema biami biotsu bimadeda.

⁸ Batu basungama bamabakama mirima, abekevega ndunga bamalasa yisonyi; bendabi nyiji mutu mubi.

⁹ Bevosi rie: Mutu usungama awarili; abagaa na mbela badilingi mangolu yilumbu na yilumbu.

¹⁰ Ruganu jenu botsu na gabuganu! Ngelabi ne mutu mosi va gari enu aguvu na diela!

¹¹ Ayina yi? Bilumbu biami bimasuka, bisalu biami bimapansu, biotsu abi nyimarondanga!

¹² Belabi mukolu nderi yijalala belabi yijalala yivu ava pisama jikivu vana.

¹³ Yi nyimueviva? Mbura jiabafu jiuba yitsanunu yiami, nyuwala tangi ami o pisama!

¹⁴ Nyigamuyili ngila rie: Ndeʼ guvu taji ami! Nyigamuyili bayinyi rie: Jenu duvu nguji ami nesi yibusi yiami!

¹⁵ Tsongu ami jika? Jiumuelabana?

¹⁶ Jiuwenda nami o mbura jiabafu? Jiugabuga nami o difufundu.