Job 15 - La Sainte Bible en Langue Yipunu

¹ Elifaz muisi Teman amamuevosa na Job rie:

² Je posulu tsiandi tsivu mapopopu?

³ Je utsunda etsundi ukevega ndunga? Je evosi mambu amagaa na tsongu?

⁴ Guitsiemusi nesi goma Nsambi, guibivisi yimogu yiagu na Nsambi.

⁵ Mabi magu merumi posulu tsiagu, guivosi nderi mutu aguvu na ndunga.

⁶ Tsiri menu, ndeʼ beni guikevega mbela, motsu ama guivosi megusingisili bumbeji.

⁷ Je ndeʼ gumareyila babaala botsu uburu? Je ndeʼ gumaburu ne mikongu mikasundu?

⁸ Je ndeʼ gumanengulu utabula mambu va mosi na Nsambi? Je yika ndeʼ aguvu na dujabu?

⁹ Diambu yi guijabi adi jetu tugejabi? Dujabu yi duvu nagu adugaa na benyi?

¹⁰ Va gari etu vagaa binunu abivu na diela dibisalu? Abamanuna uviolila taji agu?

¹¹ Je dubembugu duNsambi dugaa duwelimina nagu? Mambu mandi mageguvotsi murima?

¹² Dibandu yi gumabengisa misu? Dibandu yi guitugengili va kodu disu?

¹³ Dibandu yi guilasili Nsambi fuiri agu? Dibandu yi guivosili Nsambi puela mambu?

¹⁴ Je mutu orungula uba alioma? Mutu orungula ukevega ndunga?

¹⁵ Lesa bisi julu Nsambi agebawamusi na julu jigaa jilioma va gusu andi,

¹⁶ tambusa na mungo nsoruru na mulensitsi, jogu abevayingi mabi nderi batu benu mamba.

¹⁷ Kululuati, nyirondi uvosa nagu! Nyuvosa ama nyimalaba.

¹⁸ Malongi ama bango diela bamajabisa, bifu abi bataji bogu bamabalonsa.

¹⁹ Nsambi amabavega bulongu buogu pinsa, mbe basakawiji bifu bibatu bangana:

²⁰ Batu babi belabingi munyongu bilumbu biotsu, bekipingi temu jibarumitsi.

²¹ Ugulu begulu posulu atsibalasi goma. Mubungitsi ebabungi, bageditumuni paga.

²² Ne mukolu bagaa na ditasa urina, bejabi yiri bosundila uboku,

²³ boba biguji bibanyunga bagetumuni paga, yilumbu yipisama yiubabunga.

²⁴ Nyiina, yilumbu yieni yiubalasa goma, munyongu na maguga biubalasa goma, biubabakiga mirima dedi mosi nana kaga ajimakunsama utoga ebakimini murima.

²⁵ Anana mutu agumakematisa va gusu Nsambi olabila aguilasi Mungo Mangolu Motsu kanda tsiandi.

²⁶ Edili bukidi ukelasa ombu Nsambi nderi mutu oyiwendi na ngubu va dikaka.

²⁷ Jaʼ uotsu amaputa na avu yika matsi na matsi.

²⁸ Etsanini o misiengi amimapansu no mandagu mamidudu amorakuga namapapa.

²⁹ Agorungula uba yisina, busina buandi butsiemuga namapapa. Agomuebanganga na duyitsu.

³⁰ Agorungula urina pisama. Avu nderi muiri, muiri agu muji umagumusa magaji; Nsambi omubunga na punga ajiupalila munu andi.

³¹ Pa evayili mabi yitu, amakedunsa, mabi moba yisaku yiandi.

³² Ofu mbe temu andi jisakatola, oba nderi yitayi ayigaa na maka.

³³ Oba nderi mfuga ayiburi mirayisan, amamagolula tsosu, oba nana muoliva agumagolula tsangu tsiandi.

³⁴ Nyiina, dibuli dibatu babi dimavegu mbela jibunguma, muji usielasana mandagu mabatu beni amamabasa na mabi.

³⁵ Befunisingi mabi, bifu biogu bedunsingi batu.