Job 11 - La Sainte Bible en Langue Yipunu

Munu uSofar: gabuga ombu Nsambi

¹ Sofar muisi Naama amavosa na Job rie:

² Bivu bipuela bipuela bigodila kabusulu? Ujaba uvosa ugelasi ndunga!

³ Posulu tsiagu tsipopopu tsiugandisa batu uvosa? Gugolasu yisonyi na dipeji diagu.

⁴ Gumavosa rie: Adi nyivosi divu dingensa; nyiina, Nsambi avu mbeji, ngaa na nsiembu.

⁵ Nyulaba ubueji pa Nsambi jaʼ beni ovosa, pa odibula munu andi noguwagula!

⁶ Mbe amagulasa bisuegu bidujabu duandi aduvu tindi duneni mbe gulaba yiri Nsambi agegukilisi dedi na mabi magu.

⁷ Ndeʼ, gurungula ujaba murima uNsambi? Gurungula ujaba dujabu dudugu duMungo Mangolu?

⁸ Duvu dusakama uviolila julu, yi guvaga? Duvu dudonga uviolila bulungi bumuji; yi gujaba?

⁹ Duvu dusakama ne uviolila butamba duvu yiavu ne uviolila mubu!

¹⁰ Pa Nsambi erondi ugaanga mungo mbela pa erondi umubega o bunsonsi anyi ogagana nandi?

¹¹ Nsambi ejabi mimbini esundili ujaba batu babi.

¹² Yilumbu ayi yiduka olubuga muna yilumbu yieni dibaala oledila dimi.

¹³ Vega murima agu ombu Nsambi, musambi makaka ava guimusambilili;

¹⁴ pa makaka magu mavu na muinsi umabi, maliomisi guyasingisa omasalioma o ndagu agu.

¹⁵ Mbana gugoba na muinsi na gugoba tsokudu, gugopupusu na gugolasu goma.

¹⁶ Maguga magu movioga dedi mosi nana mamba mamuwigu.

¹⁷ Nsanunu agu jiuba yika yijalala ne uviolila wisi umuangulu, pisama jiukaluga yijalala yikedi.

¹⁸ Gumueba na yitu ayivu na tsongu; gunolaba motsu mewendi buranga, guba na yivumu.

¹⁹ Yivumu yiagu yigopupusu, bapuela boguromba ugukakisa.

²⁰ Bango mabi betsiemuyi; besaa na yisuemunu bana ditasa dimosi buandi, dufu!