Job 10 - La Sainte Bible en Langue Yipunu

Munu uJob (ususu): Nsambi amasingisa duburu duami umbunganga

¹ Ngelabi ubueji na nsanunu ejiji! Ngobusa utatanga, ngoba sui, nyigulu yika munyongu.

² Nyutsingula Nsambi rie: Guyapega mbela! Nsinguli adivu va gari jetu nagu.

³ Guna nsala upayila dibi? Gulaba ubueji ukambisa yisundu yiagu? Gulaba ubueji uwamusa batu babi?

⁴ Guilabi nana batu belabili? Guikipi yika ama batu bekipi?

⁵ Bilumbu biagu bivu dedi na bietu? Bilima biagu bivu yika pesu?

⁶ Dibandu yi guirondili ujaba mbela tsiami? Dibandu yi guiketsoyisila ujaba mabi mami?

⁷ Diuleba guijabi yiri ngaa na mbela ngorungula ugurina.

⁸ Ndeʼ beni gumansunda, ndeʼ beni guikelisi, mbana gumbunga?

⁹ Gumabumba nana bebumbili yima yidiga; kokolu gukadirangimina mbe guskakabusa mu difufundu.

¹⁰ Yilumbu yimosi gumansunsa o moji nguji ami; nana mutu esoyili mubodi.

¹¹ Gumapega mukata na musonyi gumapega bivisi na miansa.

¹² Na maboti magu, gumapega muvumu, gumambamba na gumakelisa.

¹³ Kabogu guna ditasa adi guinsueyili. Tumba nyijabi ditasa diagu:

¹⁴ ubanda na dibi diami ditega gugensingili kokolu.

¹⁵ Vagaa diambu pa nyina mbela! Ne pa nyina ndunga, nyina yisonyi, yisonyi yimakaanga na maguga mamapiolila!

¹⁶ Pa nyumatisa nesi muru guinduki dedi mosi nana yimbungu yileyili yibulu,

¹⁷ guipopuli na mangolu magu motsu! Guipeyi diambu va julu diambu, kabu agu j ipiolili guimfunisilingi purulu va julu purulu.

¹⁸ Dibandu yi gumasingisa duburu duami? Mbe nyimafu ne mutu mosi mbe asamandaba.

¹⁹ Mbe nyimaweʼ sungingi o ngila mbe dimaba nderi nyisamaba!

²⁰ Tsia bilumbu biami bivu yika mua pesu? Vana dedi, tsie ndundi uba sui mua temu ajisiali.

²¹ Yika uwe nyiwendi, tsiri na ditasa ugabuga o bulongu abuvu yika pisama na pisama,

²² o bulongu abuvu na dimbunga dimukolu o bulongu abu yijalala yivu yika pisama.