Job 1 - La Sainte Bible en Langue Yipunu

Dumangu dutega duJob

¹ Umaba mutu diina diandi Job o bulongu buOus, mutu eni amaba asunda na asungama; amadumanga Nsambi na amavinanga mabi.

² Amabura yisambuali yibaana bababaala na baana barieru babagetu.

³ Amaba na yisambuali yitosini tsibindombu na tosini yirieru tsibasamo na tosini bangombi na karna yiranu tsibaburu na basalitsi bapuela bapuela. Dibaala dieni amaba muneni uviolila batu botsu bayiari ayi wisi epalili yiPalestine.

⁴ Temu na temu baana bandi bamosi bababaala bamawendanga ombu basusu, mutu mutu na temu andi amalambanga mulambu. Bamanengilanga bibusi biogu birieru uyeji noyenu nogu.

⁵ Bilumbu bimulambu binovioga Job amanengila baana bandi bababaala na amabavayila duliomusu. Amaretsama kedi jineni na amavagulila Nsambi pagu jiunyensa jimuana muana. Job amatasanga rie: Tanguji baana bami bababaala bamavaga dibi vo tanguji bamalensa Nsambi na matasa mogu. Anana Job amavayilanga.

⁶ Kabogu yilumbu yimosi bisi julu bamawenda na misamu ombu Fumu, Satan mufuengilitsi amawenda va mosi nogu.

⁷ Fumu amawivula Satan rie: Agunyi guiruyili? Mufuengilitsi amawagula rie: Utsiengila nyiyenatsiengila bulongu.

⁸ Fumu amamuwivula rie: Gutsilaba musalitsi ami Job? Vagaa mutu aguvu nana jandi va butamba. Avu asunda na asungama na endumingi na eviningi mabi.

⁹ Mufuengilitsi amawivula Fumu rie: Je kulini Job egudumi?

¹⁰ Gusamamugaga, jandi na mukuta andi na biotsu abivu nandi? Gumamugabila miula mu bisalu biandi biotsu na migamba miandi mimabasa bulongu.

¹¹ Tumba samba dikakadiagu nobemba biandi biotsu. Tulelaba, agogusienga va misu mabatu?

¹² Fumu amatsingula mufuengilitsi rie: Laba nyuguwakisa bima biandi biotsu; dimosi buandi guyamubemba. Mufuengilitsi amakegusula va gusu Fumu.

¹³ Yilumbu yimosi baana baJob bamajanganga nonuanganga o ndagu muana taji ogu aguvu yivunda;

¹⁴ yilumbi yimatola ombu Job ayimavosa rie: Bangombi bamafutsanga na baburu bamajanganga va mugula ogu

¹⁵ ava bisi Saba bamabongila migamba miogu na bamaboka basalitsi na majenga. Nsirina waʼ pinsa uyigutsingula misamu.

¹⁶ Yilumbi ayitega uvosa mbe akivosa na yisusu yimaruga na yimavosa rie: Muji Nsambi umabonduyila o julu, umanyensa migamba mibindombu na basalitsi na umabasielasana. Nsirina waʼ pinsa uyigutsingula misamu.

¹⁷ Uvosa mbe akivosa na yisusu yimaruga na yimavosa rie: Bisi Chaldee bamagungasana binombu birieru na bamagaanga basamo, bamayenababega na bamaboka basalitsi na majenga. Nsirina waʼ pinsa uyigutsingula misamu.

¹⁸ Uvosambe akivosa na yisusu yimaruga na yimavosa rie: Baana bagu batsijanganga nonuanganga malamu o ndagu muana taji ogu aguvu yivunda;

¹⁹ mungudi uneni umarugasana o yiari yina yikumu na umaberusa ndagu jiotsu; jimavika bafudu na banumba, jogu botsu bamafu. Nsirina waʼ pinsa uyigutsingula misamu.

²⁰ Mbana Job amaretsama, amapasa yijungi yiandi na amafuga diviolu; amakebuaga va tsi, amagudama na amagolana dibufu;

²¹ amavosa rie: Nyimaba penyi ava nyimaruyila o bulongu na nyuba penyi ava nyugabuyila. Fumu eveyingi na Fumu epatulingi. Ngaa na disusu yika ugabusila Fumu diboti.

²² Mu motsu mana Job asamasumuna; asamavosila Nsambi dibi.