Jeremie 6 - La Sainte Bible en Langue Yipunu

Dubungu duneni dumagaanga Jerusalem

¹ BaBenjamin rinanu, rinanu Jerusalem. Siganu mumbanda o Tecoa, religanu yilimbu o Bet-Kerem! Diguga diruyili o banda nesi dubungu duneni!

² Muana mugetu uSion aguvu uboti umabungu!

³ Babungulitsi babindombu betoli ombu gandi na migamba miogu; berangiyi mandagu mogu mamatsanda yiari na yiari, mutu mutu olisila abiandi va mbura andi.

⁴ Begamuyi rie: Kunsamanu utoga divita, ruganu, tʼwendianu va muangulu! Ngebajetua, wisi yika uwenda uiwendi, bidumbitsi bimasakama.

⁵ Ruganu, twendianu ne mukolu, pansianu mandagu!

⁶ Fumu mabadi jendi rie Wanganu miri, runganu bikadi mu bibaga biJerusalem! Musiengi eni vengu ukilusu; o gari uonyi ubanganga purulu na purulu.

⁷ Nana ditanga dipalisingi mamba dedi mosi musiengi eni uipalisingi mbivulu. Dikasi na dubuilgu bivu muna. Nyilabingi yika maali na mapura muna.

⁸ Jerusalem kebana pa tsiri nana nyukakana nagu na nyugubunga te na gusiala mududu.

Batu abagaa na dululu

⁹ Fumu Mabadi jandi rie: Bansialutsu baIsrael bodokulu nderi mirayisan, ndeʼ muebadokulila nderi mudokulitsi urayisan.

(Jeremie)

¹⁰ Na nyi nyuvosa? Anyi nyubonga nana mbeji yin batu bokulu? Matuji mogu mavu madiba bagorungula uba limba; Fumu adi guivosi dirombisi mudesu ogu, bagerondi ugulu.

¹¹ Mbe ka meʼ Fumu nyimabasa de na kabu, ngomuerungula ujisuega. Nyulasa kabu ami ombu muana aguvu munapsila nesi mu bibengunu bibafudu na banumba nesi ombu babaala na bagetu nesi ombu binunu nesi ombu abewendi makongama.

(Fumu)

¹² Fumu amabuesa rie: Ava nyulasila bisi bulongu mangolu mami mandagu mogu mapatulu na basusu nesi manungi mogu nesi bagatsi bogu wandi.

¹³ Ubanda na tindi ngebi te na tindi yivunda botsu besansi bansi va mambi; ubanda na mubiyitsi te na muvagulitsi upagu botsu bediongingi.

¹⁴ Begengili mapura mabatu bami nderi migaruga, mbana bevosi rie: Duvotsu! Duvotsu! Tumba duvotsu dugatsi.

¹⁵ Fumu ewivuli rie: Belabi yisonyi mu mbari bamavaga nsoruru? Bagelabi yisonyi, bagelabi bana mbela. La dibandu boberuyila va mosi na jogu abeberuyi; va temu eni nyubakilisa na bobetsu.

¹⁶ Fumu amavosa rie: Vioganu mu mansila, gengilanu na wivulanu mansila makala, labanu nsila ajivu jiboti na jivioyilinganu na dudila yivumu. Tumba bamawaka rie: Tugojivioyila.

¹⁷ Nyimabasunsa bawatsi ubalubusa rie: Banu limba ugulu diufi dimumbanda Tumba bamawaka rie: Tugoba limba!

¹⁸ Jenu bisi malongu, guluanu! Jenu bisi dibundu, jabanu adi bolaba!

¹⁹ Jenu bisi bulongu buotsu, guluanu! Nyulasa batu bebaba purulu atsiuba yisaku yimatasa mogu mabi; mu mbari basamaba limba ugulu mambu mami na bamalensa migaga miami.

²⁰ Je nyina nsala jibima bimbunga jiboti abiruyili o Saba? Je nyina nsala jibima bimbunga jiboti bibulongu buvala? Pagu tsiogu tsiunyensa tsigendasi ubueji nesi pagu tsiogu tsisusu.

²¹ La dibandu Fumu evosili rie: Gulu nyusunsa mamanyi va gusu ogu amobadukusu mabaku, taji na muana boduku mabaku va mosi nesi mbatsi na mbatsi na bofu.

Muvinitsi oruyila o banda

²² Fumu evosi rie: Labatianu batu beruyili o bulongu bubanda dilongu dineni dimarambuyila o masuka mabutamba.

²³ Bagora bandi bavu na bapita na majenga; bana dikasi na bagaa na yingeba; mufi mogu mavu nderi diufi dimubu; beruyi mu julu tsibakabala na bavu bakunsama utoga nagu ndeʼ muana mugetu uSion!

(Batu)

²⁴ Ava tumagululu ubambana bebambini nyuru tsietu tsimavola na munyongu umatugaanga nderi mugetu agumagaangu na misongu.

²⁵ Duyapala mu manungi, duyavioga mu mansila; mu mbari amuna muvinitsi avu na dunsiensi duvu yiari na yiari.

(Fumu)

²⁶ Muana mugetu ubatu bami, duara siela na golana dibufu, duara yifuila ayivu nderi gumabokisa divingu, lilanga na mabembu! Mu mbari mubungitsi osundila ugurasuna.

Budilu abugorungula uliomusu (Fumu)

²⁷ Jeremie, nyimaguvaga nderi muleyitsi na watsi va gari batu bami yiri gujaba notsiyisa ama bevayi.

(Jeremie)

²⁸ Jogu botsu bavu mimbini na babeyitsi bamatamba. Bavu batu bagala nderi kunga nesi madilu, bamakebivisa.

²⁹ Duba dumanyenga yiumbu yimasielusunu na muji; yika kulini bepitsili yika mambi na mambi.

³⁰ Bebanengili mambi malora jivema mu mbari Fumu amababusa.